ކަލަންޑަރުގައިވާ ގޮތުން ނަމަ މާދަމާ އަކީ ރޯދަ މަހުގެ ފުރަތަމަ ދުވަހެވެ. މަދާމާ ބާޒާރަށް ދާނަމަ ތަފާތު ތިން ކަމަކަށް ވިސްނާލުން ރަނގަޅެވެ. މި ތިން ސަބަބަށް ވިސްނާއިރު، ފަހަރުގައި އެންމެ ރަނގަޅު ގޮތަކީ މާދަމާ ބާޒާރަށް ނުދިއުން ކަމަށް ވެސް ވެދާނެ އެވެ.
ފުރަތަމަ ސަބަބު
ސައިކޮލޮޖިކަލް ގޮތުން ބަލާއިރު، ބަނޑުހައިވެފައި ހުންނައިރު ކާ އެއްޗެއްސަށް ޝައުގުވެރިވުން އިތުރުވެ އެވެ. ދިރާސާތަކުން ދައްކާ ގޮތުގައި ބަނޑުހައި ވެގެން ހުރެ ބާޒާރު ކުރާ މީހުން، އެ ނޫން މީހުންނަށް ވުރެ 60 ޕަސެންޓު އިތުރަށް ހަރަދު ކުރެ އެވެ. އަދި، ބަނޑުހައިވެ ހުރެ ބާޒާރު ކުރާއިރު ގަނެވޭ އެއްޗެހީގެ ތެރޭގައި، ކެލޮރީސް ގިނަ ބާވަތްތައް އިހުތިޔާރު ކުރެވެ އެވެ.
ރޯދަމަހު، ބާޒާރު ކުރަން ދާނަމަ، ތަރާވީސް ނިންމާލާފައި ގެއަށް އަންނަމުން ވެސް ބާޒާރު ކޮށްލެވިދާނެ އެވެ. އެހާއިރު ވެސް މާރުކޭޓު ހުޅުވާފައި ހުންނާނެ އެވެ. ރޯދަ އަށް ހުރެ ބާޒާރު ކުރަން ދާނަމަ އެންމެ ރަނގަޅީ ހެނދުނު ގަޑީގައި ދިއުމެވެ. ހަވީރު ގަނޑީގައި ހިނގައްޖެނަމަ، މާބޮޑަށް ފޮނި މީރު އެއްޗެއްސަށް ހިތްޖެހި ގެގާއި ހަދާފައި ހުނަން އެއްޗެހި ބާކީވާ ވަރަށް ބާޒާރު ކުރެވިދާނެ އެވެ. އަދި، ހަވީރު ގަޑީގައި ޓްރެފިކް ވެސް ބާރު ބޮޑުވާނެ އެވެ.
ތަރުކާރީގެ ބާވަތްތައް ވިއްކާ ފިހާރަ އެއް: ރޯދަމަހުގެ ފުރަތަމަ ދުވަހު ބާޒާރުކުރަންދާ މީހުން ވަރަށް ގިނަވޭ-- އަދަދު ފޮޓޯ އަހުމަދު ސައީދު
ދެވަނަ ސަބަބު
ގިނަ ދޯނި ފަހަރު ވީ، މުލު ރޯދަ ދުވަހަށް ރަށަށް ފުރައިފަ އެވެ. އެ ދޯނި ފަހަރު އެނބުރި އަންނާނީ ފުރަތަމަ ރޯދަ ރަށުގައި ހިފައިފަ އެވެ. މާލެ އާ ކައިރި އއ. ތޮއްޑޫ އާއި ކ. ކާށިދޫ ފަދަ ދަނޑުވެރި ރަށް ރަށުން ރޯދަ މަހުގެ ފުރަތަމަ ދުވަހަށް ސަޕްލައި ގެންނާނެ އެވެ.
ރާއްޖޭގެ ހުރިހާ ހިސާބެއްގެ ދޯނިފަހަރު ނާންނާތި، ރޯދަމަހުގެ ފުރަތަމަ ދުވަހަކީ ބާޒާރުގައި ތަކެތި އެންމެ ތިޔާގި ނޫން ދުވަހަށް ވުމަކީ އެކަށީގެންވާ ކަމެކެވެ.
ތިން ވަނަ ސަބަބު
ރޯދަމަހުގެ ފުރަތަމަ ދުވަހަކީ ބާޒާރުގައި ތަކެތި އަގު ބޮޑު ދުވަހަކަށް ވާނެ ކަމަށް އަބަދުވެސް ގަބޫލުކުރެ އެވެ. ސަބަބުތަކެއް ނެތިއެއް ނޫނެވެ. ވޭތުވެދިޔަ ރޯދަމަސް ތަކަށް ބަލާއިރު، ބާޒާރުގައި ތަކެތީގެ އަގު ހަމައަކަށް އެޅުމަށް ދެތިން ދުވަސް ނަގަ އެވެ. ސަޕްލައި އާއި ޑިމާންޑު އެނގޭނީ ރޯދަމަސް ފެށުމުންނެވެ.
މި އަހަރުގެ ރޯދަ މަހާ ދިމާކޮށް، އއ.ތޮއްޑޫގެ އިތުރުން ރާއްޖޭގެ އެހެނިހެން ރަށްރަށުންނާއި އިންޑިޔާ އިން ކަރާ ވިއްކަން ގެންނާނެ އެވެ. މިހާރު 25ރ. އަށް ކިލޯ އެއް ލިބެން ހުރި ކަރާގެ އަގު، ރޯދަ މަހުގެ ފުރަތަމަ ދުވަހަށްފަހު ދަށް ވުމަކީ ވެސް ގާތް ކަމެކެވެ.
ވިޔަފާރިކުރާ މީހުން އެތައް ގުނައެއް ރޯދަ މަހު އިތުރުވެ އެވެ. ވިޔަފާރިވެެރިން އެކަމުގެ ފައިދާ ނަގަ އެވެ. ގިނަ މީހުން އަގަށްވުރެ ބޮޑަށް ބަލަނީ އެމީހަކު ބޭނުންވާ އެއްޗެއް ގަންނަން ލިބޭތޯ އެވެ. ކޮވިޑް-19ގެ ސަބަބުން ވޭތުވެދިޔަ ދެ ރޯދަ މަހު އަހަރެމެން ތިބީ ގޭ ބަންދުގަ އެވެ.
ބާޒާރުކުރަން ދާއިރު، ކޮންމެހެން ވިސްނަންވީ ކަންތައްތަކެއް
ބަދިގެތެރެ ބަލަހައްޓާ މީހުން ގާތު އަހާ އޮޅުން ފިލުވައިގެން ގަންނަންވާ އެއްޗެހީގެ ލިސްޓެއް ހެދުމަކީ މުހިންމު ކަމެކެވެ. ފަސް މީހުން ތިބޭ ގެއެއް ނަމަ ގަންނާނީ ކޮން ސައިޒެއްގެ ކަރައެއްތޯ ވިސްނާލުން ވެސް މުހިންމެވެ.
ބާޒާރުމަތީގައި ހުންނަ ދެ ލޯކަލް މާރުކޭޓަށް ވުރެ، މާލެ ތެރޭގައި ހިންގާ ލޯކަލް މާރުކޭޓު ތަކުގައި ތަކެތީގެ ކިލޯ އަކުން ފަސް ރުފިޔާ ވަރު އަގު ބޮޑުވެދާނެ އެވެ. އެއީ، އެމީހުން ބާޒާރުން އެއްގަމަށް، ޕިކަޕުގައި އެއްޗެހި އުފުލަން ޖެހޭތީ އެވެ.
ކިލޯ އަކުން ފަސް ރުފިޔާ އަގުހެޔޮ ކުރަން ބޭނުންނަމަ، އަގު އަހާފައި، އަނބުރާލާފައި ދާން ހިނގައި ގަންނާށެވެ. އޭރުން ފަސް ރުފިޔާ ކަނޑާލާފައި ދޭން އެއްބަސް ވާނެ އެވެ.
ހުރިހާ ގޮޅި ތަކުގައި ޑިސްޕްލޭގައި ވިއްކަން ބަހައްޓާފައި ހުންނަނީ އެންމެ ތާޒާ އެއްޗެއްސެއް ނޫނެވެ. ތާޒާބައި ބަހައްޓާފައި ހުންނަނީ އަށި ދަށުގައި ފޮށިގަނޑެއްގަ އެވެ.
"ދައްތާ، އަދި ތާޒާ އެއްޗެހި އެބަހުރި،" އަތްލާފައި އަގު އަހާފަ، ނުގަނެ މަޑުކޮށްލުމުގެ ފައިދާ އަކީ އެއީ އެވެ.
ރޯދަމަހު މާރުކޭޓުގައި އެއްޗެހި އަގުހެޔޮވާ ހާއްސާ ގަޑިއެއް އޮވެ އެވެ. ރޯދަ ވީއްލައިގެން މަޣްރިބް ނަމާދުގެ ފަހު އަވަހަށް ބާޒާރަށް ދާށެވެ. އެ ގަޑީގައި މަސް މާރުކޭޓުގައި މަސް ވިއްކާ އަގު ވަރަށް ބޮޑުތަން ހެޔޮވާނެ އެވެ.
