ޓީރެކްސް ބާސްކެޓްބޯޅަ ކްލަބުން އަލަށް ގެނައި ހަތަރު ކުޅުންތެރިންނާ އެކު ޓީމު އިތުރަށް ވަރުގަދަވާނެ ކަމަށް އެ ޓީމުގެ ކެޕްޓަން އަހުމަދު ޒަބީރު (ޒަބީ) ބުނެފި އެވެ.
މި ވަގުތު އޮތް އެންމެ ދުވަސްވީ އެންމެ ކާމިޔާބު ބާސްކެޓްބޯޅަ ކްލަބް، ޓީރެކްސް އިން 13 އަހަރު ފުރުން ފާހަގަކުރި އިވެންޓްގައި އެ ޓީމުން ގެނައި ހަތަރު ކުޅުންތެރިންގެ ތެރެއިން ދެ ކުޅުންތެރިންނަކީ ވާދަވެރި ކިންގްސް ބާސްކެޓްބޯލް ކްލަބްގެ މުހިންމު ދެ ކުޅުންތެރިންނެވެ. އެއީ ގައުމީ ބާސްކެޓްބޯޅަ ޓީމަށް ވެސް ގިނަ އަހަރުތަކެއް ވަންދެން ކުޅެމުން އައި ތަޖުރިބާކާރު ދެ ކުޅުންތެރިން ކަމަށްވާ އިބްރާހިމް އަންފާލް ޝަރީފް (އަންޓެ) އާއި މުހައްމަދު ހުވައިލިދު އަލީ (ހުވޭ) އެވެ.
"މި ދެ މީހުންނަކީ (އަންޓެ އާއި ހުވޭ އަކީ) ހަމަ ފުންނާބު އުސް ދެ މީހުން، ވަރުގަދަ ތަޖުރިބާކާރު ދެ ކުޅުންތެރިން ހަމަ. އެހެންވީމަ އެ ކުޅުންތެރިންނާ އެކު ޓީރެކްސް ރަނގަޅުވާނެ އިތުރަށް،" ޓީރެކްސް އިން އަންޓެ އާއި ހުވޭގެ ސޮއި ހޯދުމާ ބެހޭގޮތުން ޒަބީ "އަދަދު" އަށް ބުންޏެވެ.
"އަހަރެމެން އެންމެން ކެރިއަރު ފެށީ އެއްކޮށް. (އެކަމަކު ކްލަބް ލެވަލްގައި) ގިނަ ފަހަރަށް ދެކޮޅެއްގައި މި ތިބެނީ. ކެރިއަރުގެ ފަހުކޮޅުގައި އެއްކޮށް (އެއް ކްލަބަކަށް) ކުޅެލައި. ރަނގަޅު ކާމިޔާބީތަކެއް ހޯދަން މި ފުރުސަތުގެ ބޭނުންހިފޭނެ. އެ ގޮތަށް އެންމެން ވެސް ދެކޭތީ އެ ބޭނުން އިނީމަ މި ދެ ކުޅުންތެރިން ޖޮއިން ކުރީ (ޓީރެކްސްއާ ގުޅުނީ)،"
ޓީރެކްސް އިން ޓީމު ވަރުގަދަކޮށްފައި މި ވަނީ މި ފަހަރުގެ ގައުމީ ލީގާއި ގައުމީ މުބާރާތުގައި ކާމިޔާބު ހޯދަން ބޭނުންވާ ވަރަށް އެންމެ ބޭނުންވާ ގޮތަށް ކަންކަން ނުދިއުމުންނެވެ.
ގައުމީ ލީގުގެ ދެ ވަނަ އަށް ދިޔައިރު، ގައުމީ މުބާރާތުން ލިބުނީ ތިން ވަނަ އެވެ. ގައުމީ މުބާރާތުގެ ތިން ވަނަ ސެމީގައި ޓީރެކްސް ބަލިވީ ރެޑްވިންގްސް އަތުންނެވެ.
ޒަބީ ބުނީ މި ފަހަރުގެ ސީޒަން ދިޔަ ގޮތާ ބަލާއިރު، ދެން ކުރިއަށްދާން ޓީރެކްސް އިން ބޭނުންވާނެ ކަންކަން ފުރިހަމަކުރަން އަންޓެ އާއި ހުވޭ އަށް މުހިންމު ރޯލެއް ކުޅެވިދާނެ ކަމަށެވެ.
"މި ފަހަރު ސީޒަނުގައި މިދިޔަ ގޮތަށް ބަލާއިރު، ޓީރެކްސް އަށް މި ލިބުނީ ވަރަށް ޕާފެކްޓް ދެ ކުޅުންތެރިން. ޕްރެކްޓިކްސް އަށް އައުމާއި ވަރަށް ޑިސިޕްލިން ދެ މީހުން. ގޭމް ޗޭންޖިން ދެ މީހުން ލިބުނީ،" ޒަބީ ބުންޏެވެ.
ޓީރެކްސް ޓީމުގެ އޮފިޝަލުންނާއި ކުޅުންތެރިން ފޮޓޯ އަކަށް ހުއްޓިލައިގެން.
ޓީރެކްސް އިން ދެން ގެންދިޔައީ މުސްތަގުބަލަށް ބިނާކުރާ ޕްރޮޖެކްޓެއްގެ ދަށުން ހުސެއިން ނަދީމް އެވެ. އަދި ކުރިން ގިނަ ޓިމުތަކުން ފެނިގެންދިޔަ ޑިސިޕްލިން ކުޅުންތެރިއެއް ކަމަށްވާ ހައިޝަމް ވެސް ވަނީ ޓީރެކްސްއާ ގުޅިފަ އެވެ.
ޒަބީ ބުނީ ހައިޝަމް އަކީ ވަރަށް ހުނަރުވެރި ކުޅުންތެރިއެއް ކަމަށާއި އޭނާ ޓީރެކްސްއާ ގުޅުނީ ކެރިއަރުގައި އަނެއް ލެވަލަށް ދިއުމަށް ކުރާ މަސައްކަތުގައި ޓީރެކްސް ކަހަލަ ޓީމަކާ އެކު އެ އަމާޒަށް ވާސިލްވެވޭނެތީ ކަމަށެވެ.
މީގެ އިތުރުން ޓީރެކްސްގެ ކޯޗު، އަލީ ފަޒްލީ (އޮލިމްޕިކް)އާ މެދު ހައިޝަމްގެ އިތުބާރު ބޮޑުވުން ވެސް އެއީ ޓީރެކްސް އަށް ކުޅެން އޭނާ ބޭނުންވި ސަބަބެކެވެ.
ޓީރެކްސް އިން ދެން ސޮއިކުރި ނަދީމް އަކީ ހަމައެކަނި ކްލަބްގެ މުސްތަގުބަލަށް ކުރި އިންވެސްޓެއް ނޫނެވެ. ގައުމީ ޓީމުގެ ކެޕްޓަންކަން ކުރަމުން އަންނަ ޒަބީ ބުނީ ނަދީމް ގެނައުމަކީ ޓީރެކްސް އިން "ނެޝަނަލް ޕްރޮޖެކްޓެއް" ގޮތަށް ކުރެވޭ މަސައްކަތެއް ކަމަށެވެ.
