އިޒްރޭލުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގައި ހުންނަ ޖެނިން ރެފިއުޖީ ކޭމްޕުގައި އިޒްރޭލުން ހިންގި ބަލައި ފާސްކުރުމުގެ އޮޕަރޭޝަނެއްގައި ފަލަސްތީނުގެ ދެ މީހުން މަރުވެ، 15 މީހުންނަށް އަނިޔާވެއްޖެ އެވެ.
އިޒްރޭލް ސިފައިން ބުނީ ޖެނިން ރެފިއުޖީ ކޭމްޕުން "ޝައްކު ކުރެވޭ ޓެރަރިސްޓުން" ހައްޔަރު ކުރަމުން ދަނިކޮށް، ފަލަސްތީނު ބަޔަކު ބަޑި ޖަހަން ފެށި ކަމަށެވެ. އިޒްރޭލް ސިފައިން ބަޑި ޖެހީ ރައްދުގައި ކަމަށާއި ސިފައިންގެ އެކަކަށް އަނިޔާވި ކަމަށް ބުންޏެވެ.
ބަލައި ފާސްކުރުމުގެ އޮޕަރޭޝަން ހިންގި އިރު ރެފިއުޖީ ކޭމްޕު ކައިރީގައި ހުންނަ އަވަށަކަށް ނިސްބަތްވާ މީހަކު ވަނީ އިޒްރޭލުގައި ބަޑިން ހަމަލާ ދީ ފަސް މީހުން މަރާލާފަ އެވެ. އެއީ ފާއިތުވި ހަފްތާގެ ތެރޭގައި އެގޮތަށް ދިން ތިން ވަނަ ހަމަލާ އެވެ.
އޭގެ އިތުރުން ބުރާސްފަތި ދުވަހު ވެސް ހުޅަނގު އައްސޭރީގައި ފަލަސްތީނުގެ ރައްޔިތަކު ވަނީ އިޒްރޭލުގެ މީހެއްގެ ގަޔަށް ވަޅި ހަރާފަ އެވެ. ހަމަލާ ދިން މީހާގެ ގަޔަށް ބަޑި ޖެހުމަށް ފަހު، ފުލުހުން އޭނާ މަރާލިއެވެ.
ފާއިތުވި ދެ ހަފްތާ ތެރޭގައި ދިން ތަފާތު އެކި ހަމަލާތަކުގައި އިޒްރޭލުގެ 11 މީހުން ވަނީ މަރުވެފަ އެވެ. ބޮޑު ވަޒީރު ނަފްތާލީ ބެނެޓް ވިދާޅުވީ ކުރިމަތިވެފައި ވަނީ "ޓެރަރިޒަމްގެ ރާޅެއް" ކަމަށެވެ. އެއް ހަމަލާގެ ޒިންމާ އުފުލީ އިސްލާމިކް ސްޓޭޓް (އައިއެސް) ގްރޫޕުންނެވެ.
