ރާއްޖޭގައި ބޭއްވޭ އެންމެ ބޮޑު ފުޓްސަލް މުބާރާތް ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022 ގެ ޗެމްޕިއަންކަން ރޭ ތ. ތިމަރަފުށިން ދިފާއުކުރިއިރު، މުބާރާތުގެ ޗެމްޕިއަންކަން ތިމަރަފުށްޓަށް ހުރިހާ ގޮތަކުން ވެސް ހައްގުވާ ކަމަށް ޓީމުގެ ކޯޗު އަލީ ފަހުމީ (އައްޔަ) ބުނެފި އެވެ.
ނުވަދިހަ އެއް ރަށުގެ މެދުގައި މި ފަހަރުގެ ގޯލްޑަން ފުޓްސަލް ޗެލެންޖް ކުޅުނުއިރު، ތިމަރަފުށިން ޗެމްޕިއަންކަން ހޯދީ ރޭ ގާފަރު އަތުން ޕެނަލްޓީ ޖަހައިގެން މޮޅުވެގެންނެވެ. ހުޅުމާލެ ރެހެންދި ފުޓްސަލް ދަނޑުގައި ރޭ ކުޅުނު މެޗުގެ ފުރިހަމަ ވަގުތު ހަމަވިއިރު، ގާފަރާއި ތިމަރަފުށި އޮތީ 2-2 އިން އެއްވަރުވެފަ އެވެ. ޕެނަލްޓީގައި ތިމަރަފުށި ކުރިހޯދީ 3-2 އިންނެވެ.
"އަލްހަމްދުލިއްލާހި ފުރަތަމަ ވެސް ލިބުނު ކާމިޔާބީ އަށް. އަޅުގަނޑު ދެކެނީ މިއީ އަޅުގަނޑުމެން ކުރި މަސައްކަތަށް ލިބުނު ހައްގު އެއްޗެކޭ. މި ޓީމު ލީ އެފަޓާ ހުރިހާ އެއްޗަކަށް ބަލާއިރު ދެކެނީ މިއީ އަޅުގަނޑުމެންނަށް ހައްގު ކާމިޔާބެއް ކަމަށް މި ޗެމްޕިއަންކަން ހޯދުމަކީ،" ރާއްޖޭގައި ގިނަ އަހަރުތަކެއް ވަންދެން މޮޅު ކުޅުމެއް ދެއްކި ފުޓްސަލް ކުޅުންތެރިޔާ އައްޔަ ބުންޏެވެ.
ރޭގެ މެޗުގެ ތެރެއިން އައްޔަ ފުރަތަމަ ހާފު ނިމުމުން ޓީމުގެ ކުޅުންތެރިންނާ ވާހަކަ ދައްކަނީ.-- ފޮޓޯ: އަބްދުﷲ އިޔާން/ އަދަދު
"ވަރަށް ބޮޑަށް ޝުކުރިއްޔާ އެހީތެރިވެދިން ހުރިހާ ފަރާތްތަކަށް ތިމަރަފުށީގެ ސަޕޯޓަރުންނަށް،"
ތިމަރަފުށްޓަކީ ގޯލްޑަން ފުޓްސަލް ޗެލެންޖް ހަ ފަހަރު ބޭއްވިއިރު ތިން ފަހަރު ތަށި އުފުލާލި މުބާރާތުގެ އެންމެ ކާމިޔާބު ޓީމެވެ. އެންމެ ފުރަތަަމަ 2016 ވަނަ އަހަރު ތިމަރަފުށިން ޗެމްޕިއަންކަން ހޯދިއިރު، އައްޔަ އަކީ ޓީމުގެ މުހިންމު ކުޅުންތެރިއެކެވެ. އެ ފަހަރު ސ. ފޭދޫ އަތުން ފައިނަލުގައި ތިމަރަފުށި މޮޅުވީ 4-1 އިންނެވެ. އޭގެ ފަހުން 2019 ވަނަ އަހަރުގެ ފައިނަލުގައި އައްޔަގެ ކޯޗުކަމުގައި ތިމަރަފުށިން ވަނީ ބ. އޭދަފުށި 5-2 އިން ބަލިކޮށް ޗެމްޕިއަންކަން ހޯދައިފަ އެވެ. އޭގެ ފަހުން ކޮވިޑް-19ގެ ސަބަބުން އައި ހުއްޓުމުގެ ތެރޭގައި ގޯލްޑަން ފުޓްސަލް ޗެލެންޖްގެ މުބާރާތެއް ނުބާއްވަ އެވެ.
އައްޔަ ދެކޭގޮތުގައި މި މުބާރާތުގައި ޗެމްޕިއަންގެ ހައިސިއްޔަތުން ތިމަރަފުށިން "ހެޓްރިކް" ފުރިހަމަ ކުރުމަކީ އެންމެ ފުރަތަަމަ ވެސް ކަނޑައެޅި ޓާގެޓް ކަމަށެވެ.
"ވަރަށް އުފާވޭ އަސްލު ރަށަށް ޓަކައި މި ކަހަލަ ކަމެއް ކޮށްދެވުނީތީ. ރަށު ރައްޔިތުން އެ ބަލައިގަންނާތީ ވަރަށް ހިތްހަމަޖެހޭ އަސްލު،" މި ފަހަރުގެ މުބާރާތުގެ މޮޅު ކޯޗުގެ މަގާމު ހޯދި އައްޔަ ބުންޏެވެ.
"އަސްލު އެންމެ މުހިންމު ކަމަކީ މިހެން ޓީމެއް މުބާރާތަކަށް ގެންގުޅޭ ކަމަށްވާނަމަ ހުރިހާ އެއްޗެއް އެންމެ ޕާފެކްޓްކޮށް (ފުރިހަމަ އަށް) ހުރުން. ދަނޑުބޭރުން ދަނޑުތެރެއިން، މެނޭޖްމަންޓް ޓީމު ވޯކް ދެން، ޑިސިޕްލިން މި ހުރިހާ އެއްޗެއް ހުރެގެން ނަތީޖާ ނުކުންނާނީ. ދެން އިންނާނީ މަސައްކަތް. އެ މަސައްކަތުން މި ކާމިޔާބު ލިބެނީ،"
ޗެމްޕިއަންކަން ހޯދި ތިމަރަފުށީ ޓީމު ތަށްޓާ އެކު އުފާފާޅުކުރަނީ،-- ފޮޓޯ: އަބްދުﷲ އިޔާން/ އަދަދު
ގޯލްޑަން ފުޓްސަލް ޗެެލެންޖްގެ ފައިނަލުގައި ތިމަރަފުށިން ކުޅުނު ތިން ފަހަރުގެ ތެރެއިން ޕެނަލްޓީ ޖަހައިގެން މޮޅުވީ ހަމައެކަނި ފަހަރަކީ ރޭގެ ފައިނަލުގަ އެވެ.
އައްޔަ ބުނީ މެޗުގެ ކުރިން ކުޅުންތެރިން ގާތުގައި ޕެނަލްޓީ އަށް ދާން ބޭނުންނުވާ ކަމަށެެވެ. އެކަމަކު، ގާފަރު ޓީމުގެ ފެންވަރު އެނގޭތީ އައްޔަ ހުރީ ޕެނަލްޓީ އަށް ވާން ޖެހޭ ތައްޔާރީ ވެސް ސިކުނޑީގައި ބަހައްޓައިގެންނެވެ.
"ބްރީފިންގައި ވެސް އެ ކުދިންނަށް ބުނެދިން އެއްޗެއް އެއީ ޕެނަލްޓީ އަށް ދާން ބޭނުންނުވާ ވާހަކަ. ރާއްޖޭގެ ގިނަ ބަޔަކު ވެސް ގަބޫލުކުރާނެ ޕެނަލްޓީ އަށް ނުގޮސް ވެސް މީތި ތިމަރަފުށިން ވިން ކުރާނެ ކަމުގެ. އެކަމު ރެޑީވިން ޕެނަލްޓީ އަށް ވެސް. ކޮންފިޑެންސް ވެސް އިން ޓީމާ މެދު،" އައްޔަ ބުންޏެވެ.
ގޯލްޑަން ފުޓްސަލް ޗެލެންޖްގެ އިިންޑިވިޖުއަލް އެވޯޑްތައް ވެސް ޑޮމިނޭޓްކުރީ ތިމަރަފުށިންނެވެ. އެންމެ ގިނަ ގޯލު ޖެހި ކުޅުންތެރިއަކީ ތިމަރަފުށީގެ އަލީ ޝިފާއު (ރޮނާ) އެވެ. ގަދަ ފަސް ކުޅުންތެރިންގެ ތެރޭގައި ތިމަރަފުށީގެ އިބްރާހިމް އަސްވަދު (ގަބޭ) އާއި ކެޕްޓަން އިބްރާހިމް ސިނާހު (ސިނާ) ހިމެނެ އެވެ. އެންމެ މޮޅު ކުޅުންތެރިޔާ، ފުޓްސަލް ކިންގްގެ ލަގަބު އެރުވީ ގަބޭ އަށެވެ.
