ޓީރެކްސް ބާސްކެޓްބޯލްގެ 13 ވަނަ އަހަރީ ދުވަސް ފާހަގަކުރުމާ ދިމާކޮށް އެ ކްލަބުން ގައުމީ ބާސްކެޓްބޯޅަ ޓީމުގެ ތަޖުރިބާކާރު ދެ ކުޅުންތެރިން ކަމަށްވާ އިބްރާހިމް އަންފާލް ޝަރީފް (އަންޓެ) އާއި މުހައްމަދު ހުވައިލިދު އަލީ (ހުވޭ)ގެ ސޮއި ހޯދައިފި އެވެ.
ޓީރެކްސް އިން ދެން ގެންދިޔައީ މުސްތަގުބަލަށް ބިނާކުރާ ޕްރޮޖެކްޓެއްގެ ދަށުން ހުސެއިން ނަދީމް އެވެ. އަދި ކުރިން ގިނަ ޓިމުތަކުން ފެނިގެންދިޔަ ޑިސިޕްލިން ކުޅުންތެރިއެއް ކަމަށްވާ ހައިޝަމް ވެސް ވަނީ ޓީރެކްސްއާ ގުޅިފަ އެވެ.
ޓީރެކްސް އިން ޓީމު ވަރުގަދަކޮށްފައި މި ވަނީ މި ފަހަރުގެ ގައުމީ ލީގާއި ގައުމީ މުބާރާތުގައި ކާމިޔާބު ހޯދަން ބޭނުންވާ ވަރަށް އެންމެ ބޭނުންވާ ގޮތަށް ކަންކަން ނުދިއުމުންނެވެ. ގައުމީ ލީގުގެ ދެ ވަނަ އަށް ދިޔައިރު، ގައުމީ މުބާރާތުން ލިބުނީ ތިން ވަނަ އެވެ.
ރޭ ޓީރެކްސްއާ ގުޅުނު ހަތަރު ކުޅުންތެރިން (ކ.ވ): އަންފާލް، ނަދީމް، ހައިޝަމް އަދި ހުވައިލިދު
އަންޓެ ބުނީ ޓީރެކްސް އަށް ކުޅެން ނިންމީ ގިނަ ސަބަބުތަކަށް ބެލުމަށް ފަހު ކަމަށެވެ. އޭގެ ތެރެއިން ބައެއް ކަންތައްތަކުގެ ގޮތުގައި އަންޓެ ފާހަގަކޮށްފައިވަނީ ގައުމީ ޓީމުގެ ކެޕްޓަން އަހުމަދު ޒަބީރު (ޒަބީ)ގެ އިތުރުން ޓީރެކްސްގައި ތިބި ގައުމީ ޓީމުގެ އެހެން ކުޅުންތެރިންނާ އެއް ޓީމަކަށް ކުޅެލައި، ގައުމީ ޓީމަށް ވެސް ފައިދާވާނެ ގޮތަށް އާ ޗެލެންޖެއް ނެގުމަށް ކަމަށެވެ.
"އެންމެ ފަހުން ދެ މުބާރާތުގައި ވެސް ގައުމީ ޓީމަށް މި ދިމާވީ އެންމެ ބޭނުންވި ގޮތެއް ނޫން. އެހެންވެ، ކެރިއަރުގައި ދެން މި ނެގި މޫވްއާ އެކު ބޭނުންވީ ގައުމީ ޓީމަށް ވެސް ފައިދާވާނެ ގޮތަށް ދާން. ޓީރެކްސްގައި މިތިބީ ޒަބީ މެން ޗިކަނޭ މެން. ރިޓަޔާކުރާ ހިސާބަށް ދާއިރު އާ ޗެލެންޖެއް ނަގައި، ގައުމީ ޓިީމުގެ ވެސް ކާމިޔާބީ އަށް ބަލާފައި ނެގި ޑިޒިޝަނެއް މިއީ،" އަންޓޭ ބުންޏެވެ.
"މި ގޮތަށް ބަދަލުވެ، ގައުމީ ޓީމުގެ ކުޅުންތެރިންނާ އެއް ޓީމަކަށް ކުޅުމުން ގައުމީ ޓީމަށް ދާއިރު ކޮމްބިނޭޝަން ކަންކަން ވެސް ހުންނާނީ ރަނގަޅަށް ކަމަށް ފެންނަނީ. ގައުމީ ޓީމުގެ ކުޅުންތެރިން މި ތިބީ ކިންގްސް އާއި ޓީރެކްސްގައި ގިނައިން. އެ ގޮތަށް ބަލާއިރު، ކިންގްސް އަށް ފަހު ދެން އިން ޗެެލެންޖަކީ ޓީރެކްސް،"
ރޭ ބޭއްވި ޓީރެކްސްގެ އިވެންޓްގެ ތެރެއިން.-- ފޮޓޯ: ޓީރެކްސް ބާސްކެޓްބޯލް ކްލަބް
ގައުމީ ޓީމުގެ ވައިސް ކެޕްޓަންކަން ކުރަމުން އަންނަ ހުވޭ އަކީ ރާއްޖޭގެ ބާސްކެޓްގައި ތަޖުރިބާކާރު ކުޅުންތެރިއެކެވެ.
ޓީރެކްސްއާ ގުޅުމާ ބެހޭގޮތުން ހުވޭ ބުނީ ޓީރެކްސް އައި އެންމެ ބޮޑު ސަބަބުތަކުގެ ތެރޭގައި ޒަބީއާ އެއް ޓީމަށް ކުޅުމާއި އާ ޗެލެންޖެއް ނެގުން ހިމެނޭ ކަމަށެވެ.
"ކުޑައިރުއްސުރެ ޒަބީ މެންނާ އެއްކޮށް މި އުޅެނީ. މުޅިން މިހާތަނަށް ކޮމްޕެޓިޓިވްކޮށް (ކްލަބް ލެވަލްގައި) ކުޅެފައި ހުރީ ޒަބީއާ ދެކޮޅަށް. ދެން، އެހެންވެ، ބޭނުންވީ ރިޓަޔާކުރުން ވެސް ގާތުގައި އޮތުމާ އެކީގައި ޒަބީއާ އެއް ޓީމަކަށް ކުޅެލައި އާ ޗެލެންޖެއް ނަގަން،" ހުވޭ ބުންޏެވެ.
އަންޓެ އެކޭ އެއްގޮތަށް ހުވޭ ވެސް ފާހަގަކުރި މުހިންމު ޕޮއިންޓަކީ ޓީރެކްސްއާ ގުޅުމަކީ ގައުމީ ޓީމަށް ދާއިރު، ކުޅުންތެރިންގެ ކޮމްބިނޭޝަން ރަނގަޅު ކުރުމާއި އެހެން ޓާގެޓްތައް ހާސިލްކުރަން މުހިންމު ބަދަލެއްގެ ގޮތުގަ އެވެ.
ދެހާސްނުވަ ވަނަ އަހަރު ވުޖޫދުވި ޓީރެކްސް ކާމިޔާބު 13 އަހަރު ފާހަގަކުރަން ރޭ ބޭއްވި އިވެންޓްގައި އެ ކްލަބަށް އެކި ގޮތްގޮތުން މިވީ މުއްދަތުގައި ހިދުމަތްކޮށްދެއްވި ފަރާތްތައް ބައިވެރިވި އެވެ. ދިހަ އަހަރަށް ވުރެ ގިނަ ދުވަހު ޓީރެކްސް އިން ބާސްކެޓްގައި ހަރަކާތްތެރިވިއިރު، ގިނަ ކަންތައްތަކެއް ވަނީ ހާސިލްކޮށްފަ އެވެ.
