މޯލްޑިވިއަނުން ދާދިފަހުން ދަތުރުތައް ފެށި ސްރީލަންކާގެ ރަތުމަލާނާގައި އޮންނަ ކޮލޮމްބޯ އިންޓަނޭޝަނަލް އެއާޕޯޓަށް ޝެޑިއުލް ދަތުރުތައް ފަށާނީ ރޯދައަށް ފަހު ކަމަށް އައިލެންޑް އޭވިއޭޝަނުން ބުނެފި އެވެ.
ބައި ގަރުނުގެ މެދުކެނޑުމަކަށް ފަހު ކޮލޮމްބޯ އިންޓަނޭޝަނަލް އެއާޕޯޓަށް ބައިނަލްއަގުވާމީ ފްލައިޓު ދަތުރުތައް ފެށީ، މިދިޔަ އަންގާރަ ދުވަހު އެވެ. އެ ދުވަހު އެއާޕޯޓަށް ފުރަތަމަ ޖެއްސި ފްލައިޓަކީ ވެލާނާ އިންޓަނޭޝަނަލް އެއާޕޯޓުން ދަތުރުކުރި މޯލްޑިވިއަންގެ ފްލައިޓެކެވެ.
އޭގެ ފަހުން ދަތުރެއް ނުކުރި ނަމަވެސް، ދިވެހިންގެ ތެރޭގައި މިކަމަށް އޮތް ތަރުހީބު ބޮޑު ކަމަށާއި ކުރިން ވެސް ރާވާފައިވާ ގޮތަށް ރޯދައިގެ ފަހުން ޝެޑިއުލް ދަތުރުތައް ފަށާނެ ކަމަށް އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނީފާ މި ނޫހަށް ވިދާޅުވި އެވެ.
"އަޅުގަނޑުމެން ޖީއެސްއޭ މެދުވެރިކޮށް އެމްބަސީގައި ބޭއްވި ބައްދަލުވުންތަކާއި އިންކުއަރީސްތަކަށް ބަލާއިރު ދިވެހިންގެ ތެރެއިން ޑިމާންޑު އެބައޮތް"
އަދި ވިދާޅުވީ، އެ ތާރީހު ފަހުން އާންމުކުރާނެ ކަމަށެވެ.
ރޯދައަށް ފަހު ޝެޑިއުލް ދަތުރުތައް ފަށާނެ ކަމަށް މޯލްޑިވިއަނުން ބުނާއިރު، މި ދަތުރުތައް ހުއްޓާލާފައިވާ ކަމަށް ލަންކާ މީޑިއާތަކުން ރިޕޯޓުކޮށްފައިވެ އެވެ.
މީޑިއާތަކާއި ލަންކާ އާންމު ރައްޔިތުންގެ ފާޑުކިޔުން ބޮޑަށް އަމާޒުވީ އިގުތިސޯދީ ކާރީސާއެއްގެ ތެރޭގައި، ހަ މިލިއަން ރުޕީސް (3.15 މިލިއަން ރުފިޔާ) ހަރަދުކޮށްގެން ބޮޑު ހަފުލާއެއް ބޭއްވުމަށް ފަހު ދަތުރުތައް ހުއްޓާލީ ކަމަށް ނިންމާފަ އެވެ.
ލަންކާ ސަރުކާރުން އެދިގެން މޯލްޑިވިއަނުން މި ދަތުރުތައް ފެށީ، ކޮލޮމްބޯ އިންޓަނޭޝަނަލް އެއާޕޯޓަކީ ދިވެހިން އާންމުކޮށް ދިރިއުޅޭ ދެހިވަލަ އާއި ވެއްލަވައްތަ އާއި މައުންޓު ލެވީނިއާ އާ ކައިރި ސަރަހައްދަކަށް ވެފައި، ސީދާ ދަތުރުތައް ފެށުމުން ދިވެހިންނަށް ފަސޭހަތަކެއް ލިިބޭނެތީ އެވެ.
