އިޒްރޭލުގެ ތެލް އަވީވް ސިޓީގައި ބަޑި ހިފައިގެން އުޅުނު ފަލަސްތީނު މީހަކު ދިން ހަމަލާއެއްގައި ފަސް މީހުން މަރުވެއްޖެ އެވެ.
މިއީ ހަފްތާއެއް ތެރޭގައި އިޒްރޭލުގައި ދިން ބަޑީގެ ތިން ވަނަ ހަމަލާ އެވެ. ބުދަ ދުވަހު ހަމަލާ ދިނީ ޔަހޫދީން ގިނައިން ދިރިއުޅޭ ހިސާބެއްގަ އެވެ.
ހަމަލާ ދިން މީހާ ހުއްޓުވީ އެ ހިސާބަށް ފުލުހުން އައިސް އޭނާގެ ގަޔަށް ބަޑި ޖަހައި މަރާލައިގެންނެވެ.
މިދިޔަ އަންގާރަ ދުވަހާއި އާދީއްތަ ދުވަހު ވެސް އިޒްރޭލުގައި ދިރިއުޅޭ އަރަބިން ވަނީ ބަޑީގެ ހަމަލާތަކެއް ދީފަ އެވެ. އެ ހަމަލާތަކުގައި ހަ މީހުން މަރުވި އެވެ.
ސިފައިންނާއި ފުލުހުން އެލާޓަށް ގެނެސްފައިވާ އިރު، ބުދަ ދުވަހުގެ ހަމަލާގައި މަރުވި މީހުންގެ ތެރޭގައި ފުލުހަކު ވެސް ހިމެނެ އެވެ.
ހަމަލާ ދިން މީހާއަކީ އިޒްރޭލުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގެ ޖެނިން އަވަށަށް ނިސްބަތްވާ 26 އަހަރުގެ ފިރިހެނެކެވެ.
މީގެ ކުރިން އޭނާ ވަނީ އިޒްރޭލުގެ ޖަލެއްގައި ދުވަސްތަކެއް ހޭދަކޮށްފަ އެވެ. އިޒްރޭލުގެ ބޮޑު ވަޒީރު ނަފްތާލީ ބެނެޓް ވިދާޅުވީ ހާލަތު ގޯސްވަމުން ދާތީ ކެބިނެޓުގެ ކުއްލި ބައްދަލުވުމެއް ބާއްވާނެ ކަމަށެވެ.
"އިޒްރޭލަށް މި ކުރިމަތިވަނީ އަރަބިންގެ ފަރާތުން ޓެރަރިޒަމްގެ ބޮޑު ރާޅަކާ. ސެކިއުރިޓީ ފައުޖުން އެބަ އޮޕަރޭޓް ކުރޭ. ޓެރަރިޒަމާ ދެކޮޅަށް ހަނގުރާމަ ކުރާނީ ދަގަނޑު އަތަކާ އެކު އެއްވެސް ދޫދިނުމެއް ނެތި." އޭނާ ވިދާޅުވި އެވެ.
ފަލަސްތީނުގެ ރައީސް މަހްމޫދް އައްބާސް ވެސް ހަމަލާތައް ކުށްވެރި ކުރައްވައި ވިދާޅުވީ، ހަމަޖެހުން ގެންނަން މަސައްކަތް ކުރާ މި ދަނޑިވަޅުގައި، ހަމަލާތަކާ ހެދި ހާލަތު ގޯސްވުމަށް މަގުފަހިވެދާނެ ކަމަށޭވެ.
ނަމަވެސް، ގާޒާގައި ވެރިކަން ކުރާ ހަމާސްއިން ހަމަލާތަކަށް މަރުހަބާ ކިޔައި، ބުނީ ތެލް އަވީވްގައި ހިންގާ އޮޕަރޭޝަނާ މެދު ފަހުރުވެރިވާ ކަމަށެވެ.
އިޒްރޭލުގައި ފާއިތުވި ހަފްތާގައި އެންމެ ފުރަތަމަ ހަމަލާ ދިނީ އިސްލާމިކް ސްޓޭޓް (އައިއެސް) އާ ގުޅެން މަސައްކަތް ކުރި މީހެކެވެ. އޭނާ ވެސް އިޒްރޭލުގެ ޖަލުގައި ކުރިން ބަންދުކުރި އެވެ.
އޭގެ ފަސް ދުވަސް ފަހުން ދެ ވަނަ ހަމަލާ ދިން އިރު، އެ ހަމަލާގައި ތިން މީހުން ބައިވެރިވި އެވެ. އެ ހަމަލާގެ ޒިންމާ އުފުލީ އައިއެސް އިންނެވެ.
