ރޯދަ މަސް ތެރޭގައި ފަލަސްތީނުގައި ހަމަޖެހުން ޔަގީން ކުރަން އިޒްރޭލުގެ ވެރިން އުރުދުންއަށް ވަޑައިގެން މަޝްވަރާ ކުރަމުން އެބަދެ އެވެ.
އިޒްރޭލުގެ ޑިފެންސް މިނިސްޓަރު ބެނީ ގާންޓްޒް އަންގާރަ ދުވަހު ވަނީ އުރުދުންގެ ރަސްގެފާން އަބްދުﷲ ދެ ވަނައާ ބައްދަލުކުރައްވާފަ އެވެ.
މިދިޔަ އަހަރުގެ ރޯދަ މަހު އިޒްރޭލާއި ފަލަސްތީނާ ދެމެދު ހަމަނުޖެހުން ބޮޑުވެ، 11 ދުވަހުގެ ހަނގުރާމައެއް ކުރި އެވެ.
އިޒްރޭލުގެ ރައީސް އިސްހާގް ހެރްޒޮގް ވެސް ބުދަ ދުވަހު އުރުދުންގެ އައްމާނަށް ވަޑައިގަންނަވާނެ އެވެ. އޭގެ ކުރިން އުރުދުންގެ ރަސްގެފާން އަބްދުﷲ ވަނީ ހުޅަނގު އައްސޭރިއަށް ވަޑައިގެން ފަލަސްތީނުގެ ރައީސް މަހްމޫދް އައްބާސްއާ ބައްދަލުކުރައްވާފަ އެވެ.
ރަސްގެފާން އަބްދުﷲ ގާންޓްޒްއަށް ގޮވާލެއްވީ އަލް އަގްސާ މިސްކިތުގައި މުސްލިމުން އަޅުކަން ކުރުމަށް ހުރި ހުރިހާ ހުރަސްތަކެއް ނައްތާލުމަށެވެ. އަދި ހަމަނުޖެހުން އުފެދިދާނެ ފަދަ ކަންކަމާއި ހާލަތްތައް މަގުފަހި ނުކުރުމަށް ވެސް ގޮވާލެއްވި އެވެ.
ގާންޓްޒްގެ ވާހަކައިގައި ފާހަގަކުރެއްވީ ސަރަހައްދީ ހަމަޖެހުން ގާއިމްކޮށް، ޓެރަރިޒަމާ ދެކޮޅަށް މަސައްކަތް ކުރުމުގެ މުހިއްމު ކަމެވެ.
މިދިޔަ އާދީއްތަ އަދި ހޯމް ދުވަހު ހަތަރު އަރަބި ގައުމަކުން ވަނީ އިޒްރޭލުގައި ބޮޑު ބައްދަލުވުމެއް ބާއްވާފަ އެވެ. އިޒްރޭލާ އެކު ގުޅުން ގާއިމްކޮށްފައިވާ އެ ގައުމުތަކުގެ އިތުރުން އެމެރިކާއިން ވެސް މަޝްވަރާތަކުގައި ބައިވެރިވި އެވެ.
އިޒްރޭލާ އެކު ގުޅުން ގާއިމްކޮށްފައިވާ އަރަބި ގައުމުތަކުގެ ތެރެއިން އެ ބައްދަލުވުމުގައި ބައިވެރިނުވަނީ އުރުދުން އެކަންޏެވެ.
ބައްދަލުވުމަށް ފަހު އެމެރިކާގެ ސެކެޓްރީ އޮފް ސްޓޭޓް ވަނީ ފަލަސްތީނުގެ ރައީސް މަހްމޫދް އައްބާސްއާ ބައްދަލުކުރައްވާފަ އެވެ.
މަހްމޫދް އައްބާސް ހުޅަނގުގެ ގައުމުތަކަށް ފާޑުވިދާޅުވެ، ޔޫކްރެއިން ހަނގުރާމައާ ގުޅިގެން ރަޝިއާއަށް ފިޔަވަޅު އަޅަމުންދާ އިރު، ފަލަސްތީނާ މެދު އަމަލު ކުރާ ގޮތުގެ ސަބަބުން އިޒްރޭލާ މެދު ފިޔަވަޅު ނާޅާތީ ޝަކުވާ ކުރެއްވި އެވެ.
