ގައުމަށާއި ރައްޔިތުންނަށް ކުރިމަތިވެފައިވާ މައްސަލަތަކާމެދު ބަހުސްކުރަން ވެސް ވެރިކަން ކުރާ ކޯލިޝަނުގައި ހިމެނޭ މައި ޕާޓީ އެމްޑީޕީން އިސްވެ ހުރަސްއަޅަމުންދާ ކަމަށް ވިދާޅުވެ، ގަލޮޅު އުތުރު ދާއިރާގެ މެމްބަރު އީވާ އަބްދުﷲގެ ޖަޒުބާތުތައް ރައްޔިތުންގެ މަޖިލީހުގެ ތަޅުމަށް މިއަދު ބަންޑުންކޮށްލައްވައިފި އެވެ.
ލ. ގަމު ރީޖަނަލް ހޮސްޕިޓަލަށް ކުރިމަތިވެފައިވާ މައްސަލަތައް ދެނެގަނެ، ސިއްހީ ހިދުމަތުގެ ފެންވަރު ރަނގަޅުކޮށް ހިންގުން ހަރުދަނާކޮށް ހުރި މައްސަލަތައް ވީހާވެސް އަވަހަށް ހައްލު ކޮށްދިނުމަށް މާވަށު ދާއިރާގެ އިދިކޮޅު މެމްބަރު މުހައްމަދު ސައީދު މިއަދު މަޖިލީހަށް މައްސަލައެއް ހުށަހެޅުއްވި އެވެ.
މަޖިލީހުގެ މެޖޯރިޓީ އެމްޑީޕީން ކޮންޓްރޯލްކުރާއިރު، ސައީދު ހުށަހެޅުއްވި މައްސަލަ ބަހުސްކުރަން މަޖިލީހަށް ބަލައިގެންފައިވަނީ ވަރަށް ހަނިގޮތަކަށެވެ. އެ މައްސަލަ ބަލައިގަންނަން 20 މެމްބަރަކު ވޯޓު ދެއްވިއިރު، އެ މައްސަލައާ ދެކޮޅަށް 11 މެމްބަރުން ވޯޓު ދެއްވި އެވެ. މައްސަލަ ބޭރުކޮށްލަން ވޯޓު ދެއްވި މެމްބަރުންގެ ތެރޭގައި ގިނައީ އެމްޑީޕީއަށް ނިސްބަތްވާ މެމްބަރުންނެވެ.
އެ މައްސަލައަށް ބަހުސް ކުރައްވަމުން، އީވާ ވަނީ އެކަމާ ވަރަށް ބޮޑަށް ހިތްހަމަނުޖެހުންފާޅު ކުރައްވައިފަ އެވެ.
މަޖިލީހުގެ ނައިބު ރައީސްކަން ވެސް ކުރައްވައި އީވާ ވިދާޅުވި ގޮތުގައި، އިދިކޮޅު މެމްބަރަކު ވިޔަސް، ރައްޔިތުންނަށް ދިމާވެފައިވާ ބޮޑު މައްސަލައަކާ ގުޅިގެން ހުށަހެޅި ކަމެއްގައި މަޖިލީހުގެ މެޖޯރިޓީ ބޭނުންކޮށްގެން އެ ބަހުސް ވެސް ކުރިއަށް ނުގެންދަން އެމްޑީޕީން އުޅެންޖެހޭ އެއްވެސް ސަބަބެއް ވިސްނިވަޑައިނުގަންނަވާ ކަމަށެވެ.
ސައީދު ހުށަހެޅުއްވި މައްސަލާގައި އިބާރާތުގައި ވެސް ސަރުކާރުން ކަމެއް ނުކުރާ ކަމަށް ބަޔާންކޮށްފައިނުވާއިރު، އެ މައްސަލަ ކޮމިޓީއަށް ގެންގޮސްގެން ބަލައިދިނުމަކީ މަޖިލީހުގެ މެމްބަރުންގެ ހައިސިއްޔަތުން ވެސް އަހުލާގީ ޒިންމާއެއް ކަމަށް އީވާ ވިދާޅުވި އެވެ.
މިތަނުން ރަތަށް ފިތިއްޔާ ލ. އަތޮޅު ރައްޔިތުންނަށް ނޭނގޭނީތޯ ހޮސްޕިޓަލުގެ ހާލަތު؟ މިތަނުން ރަތަށް ފިތީމާ ލ. އަތޮޅުގެ ރައްޔިތުންނަށް އެނގޭނީ މައްސަލަ މިއޮތީ މިގޮތަށޭ އެކަމަކު މަޖިލީހުން، އެމްޑީޕީން މި މައްސަލަ ބަލާކަށް ބޭނުމެއް ނުވިއޭ،" އޭނާ ވިދާޅުވި އެވެ.
އެމްޑީޕީގެ މެޖޯރިޓީ އޮވެމެ، މަޖިލިސް މިހާރު ވެއްޓިފައިވާ މިންވަރު ސިފަކޮށް ދެއްވަން އީވާ ވަނީ މިސާލެއްގެ ގޮތުން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި މަޖިލީހުގައި ކަންހިނގާ ދިޔަ ގޮތް މިސާލެއްގެ ގޮތުގައި ނަންގަވައިފަ އެވެ.
އީވާ ވިދާޅުވި ގޮތުގައި އޭރު ޕީޕީއެމްގެ މެޖޯރިޓީ އޮތް މަޖިލީހުން އެއްވެސް ކަމަކަށް ބަހުސް ކުރުމަށް ފުރުސަތު ނުދިނުމުން އެމްޑީޕީގެ މަދު މެމްބަރުން އަޑުއުފުލަންޖެހުނީ ދަތި އުނދަގުލުގަ އެވެ.
"އެމްޑީޕީއަށް 65 ގޮނޑި ލިބުނީމާ، މަނިކުފާނު [މުހައްމަދު ނަޝީދު] ވެސް އަދި އަޅުގަނޑު ވެސް މަޖިލީހުގެ ރައީސްކަމާއި ނައިބު ރައީސް ކަމަށް ކުރިމަތިލަމުން އަޅުގަނޑުމެން ދެންނެވިން މައިނޯރިޓީ ޕްރޮޓެކްޓު ކޮށްދޭނަމޭ. އަގުލަބިއްޔަތު ބޭނުންކުރާނީ ނާޖާއިޒު ގޮތަކު ނޫނޭ،" އީވާ ވިދާޅުވި އެވެ.
ޖަމާއަތެއްގެ ގޮތުގައި، އެމްޑީޕީގެ ޕާލިމަންޓަރީ ގުރޫޕު އަމިއްލަ ނަފްސަށް މިހާ އިތުބާރު ގެއްލުނީ ކޮން އިރަކުތޯ އަޅުގަނޑުގެ ސުވާލު އުފެދެނީ."
އެމްޑީޕީގެ ޕާލިމަންޓަރީ ގުރޫޕަށް ފާޑުވިދާޅުވަމުން އީވާ ވިދާޅުވީ އެ ގުރޫޕު މިއަށްވުރެ ބޮޑަށް ތަސައްރަފު ފުދެންޖެހޭ ކަމަށެވެ.
"މިއީ [މަޖިލިސް] ސިޔާސީ ކަންކަމުގެ ނާރެސް. މިއީ ސިޔާސީ ބަހުސްގެ ނާރެސް. ބަހުސް ކުރިއަށް ގެންދަން އެމްޑީޕީން ފުރުސަތު ދޭން އެބަޖެހޭ،" އީވާ ތަކުރާރުކޮށް ވިދާޅުވި އެވެ.
އޭނާ ވިދާޅުވި ގޮތުގައި ރާއްޖޭގައި މައްސަލަތައް ނެތް ކަމަށް ދައްކަން ސަރުކާރުން ކިތަންމެ މަސައްކަތެއް ކުރި ނަމަވެސް، ކަމުގެ ހަގީގަތް ރައްޔިތުންނަށް އޮޅިފައެއް ނެތެވެ.
"ކިރިޔާ ވެސް މައްސަލައެކޭ ބުނާއިރަށް އެއީ ސަރުކާރާ ޖައްސާލުންކަމަށް ބުނަންޏާ، 2023 ވަރަށް އުނދަގޫވާނެ،" އަންނަ ރިޔާސީ އިންތިހާބަށް އިޝާރާތް ކުރައްވަމުން އީވާ ވިދާޅުވި އެވެ.
އެހެން މެމްބަރުން ބުނީ ކީކޭ؟
ސައީދު ހުށަހެޅުއްވި މައްސަލަ ނިސްބަތްވާ ފޮނަދޫ ދާއިރާގެ އެމްޑީޕީ މެމްބަރު މޫސާ ސިރާޖު ވިދާޅުވީ، އޭނާގެ ދާއިރާގެ ރައްޔިތުންނާ ގުޅުންހުރި މައްސަލައެއް އޭނާ ތަމްސީލުކުރައްވާ ޕާޓީން އޮއްބާލަން މަސައްކަތްކުރުން "ލަދުވެތި" ކަމަށެވެ.
ސިރާޖުގެ އިތުރުން އިނގުރައިދޫ ދާއިރާގެ އެމްޑީޕީ މެމްބަރު ހަސަން އަހުމަދު ވެސް ވަނީ ގަމު ރީޖަނަލް ހޮސްޕިޓަލުގެ ބޯޑުން ވަކި ބަޔަކަށް ވަޒީފާ ދީގެން އެތަނުގެ ހާލަތު މިފަދަ ނިކަމެތި ހާލަތަކަށް ވެއްޓުމުގައި ވަރަށް ބޮޑަށް އިހުމާލުވެފައިވާ ކަމަށް ތުހުމަތު ކުރައްވައިފަ އެވެ.
އެމްޑީޕީގައި ދެ ފެކްޝަން އުފެދި، އެ ކޯޅުން މިހާރު ވަނީ ރަނގަޅަށް ވެސް މަޖިލީހުގެ ތަޅުމަށް ފެތުރިފަ އެވެ. މަޖިލީހުގެ ރައީސް އަދި އެމްޑީޕީ ރައީސް ނަޝީދުގެ ފެކްޝަނުން ސަރުކާރަށް ފާޑުކިޔައި މަޖިލީހުގެ ތެރެއިން "ޖެއްސުން" ކުރާ ކަމުގެ ތުހުމަތު ރައީސް އިބްރާހިމް މުހައްމަދު ސޯލިހަށް ތާއިދުކުރައްވާ މެމްބަރުން ގެންދަވަނީ ކުރައްވަމުންނެވެ.
ސައީދު ހުށަހެޅުއްވި މައްސަލައިގެ ބަހުސްގައި ވެސް އެ މެމްބަރުން ވަނީ ސިއްހީ ދާއިރާ ތަރައްގީއަށް މި ސަރުކާރުން ކުރިން ނުދެކޭ ފަދަ މަސައްކަތްތަކެއް ކޮށްފައިވާކަމަށް ވިދާޅުވެ. ސަރުކާރު ދިފާއުކުރައްވައި ވާހަކަ ދައްކަވައިފަ އެވެ.
