ސްރީލަންކާގައި ހިންގާ އިއާދަކުރަނިވި ހަކަތައާ ގުޅޭ މަޝްރޫއުތަކަށް އެމެރިކާއިން ކްރެޑިޓް ފެސިލިޓީ ފޯރުކޮށްދޭން ނިންމައިފި އެވެ.
އެމެރިކާގެ ސަފީރު ޖޫލީ ޗުންގް ވިދާޅުވީ ޔޫއެސްއެއިޑުން ލަންކާގެ އިއާދަކުރަނިވި ހަކަތައާ ގުޅޭ މަޝްރޫއުތަކަށް އެހީ ވާނެ ކަމަށެވެ.
ސަފީރު އެގޮތަށް ވިދާޅުވީ ހޯމަ ދުވަހު ރައީސް ގޮތަބަޔަ ރާޖަޕަކްސަގެ އަރިހަށް ކުރެއްވި އިހްތިރާމްގެ ޒިޔާރަތެއްގައި ކަމަށް ލަންކާގެ ރައީސް އޮފީހުން ބުންޏެވެ.
އެމެރިކާގެ ސްޓޭޓް ޑިޕާޓްމަންޓްގެ އިސް އޮފިޝަލް ވިކްޓޯރިއާ ނުލެންޑް ލަންކާއަށް ކުރެއްވި ދަތުރުގައި ލަންކާ ސަރުކާރުން ދެއްވި އެހީތެރިކަމަށް ސަފީރު ޝުކުރު އަދާކުރެއްވި އެވެ.
ރައީސް ގޮތަބަޔަ ވަނީ ލަންކާއަށް ދިމާވެފައިވާ އިގްތިސާދީ އަދި މާލީ ކާރިސާ އުފެދުނު ގޮތާއި ބޭނުންވާ އެހީތަކާ ގުޅޭ ގޮތުން ސަފީރާ އެކު މަޝްވަރާ ކުރައްވާފަ އެވެ.
އެގޮތުން އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީ ހޯދުމުގައި އެމެރިކާގެ އެއްބާރުލުން ލިބޭނެކަމުގެ އުއްމީދު ގޮތަބަޔަ ފާޅުކުރެއްވި އެވެ.
ސަފީރު ވަނީ އައިއެމްއެފްގެ އެހީ ހޯދަން ލަންކާ ސަރުކާރުން ނިންމާފައި ވާތީ އެކަމަށް މަރުހަބާ ވިދާޅުވެފަ އެވެ.
ލަންކާ ސަރުކާރުން އައިއެމްއެފްގެ އެހީ ހޯދަން ނިންމި އިރު، ބައެއް ތަޖުރިބާކާރުން ވަނީ މީގެ ކުރިން ވެސް އެ ނިންމުން ނިންމުމަށް ބާރު އަޅާފަ އެވެ. ނަމަވެސް ކުރިން ސަރުކާރުން އެ ގޮތް ބޭނުމެއް ނުވި އެވެ.
ލަންކާ ސަރުކާރާ އެކު ބޭއްވި މަޝްވަރާތަކަށް ފަހު އައިއެމްއެފްއިން ނެރުނު ރިޕޯޓުގައި ބުނީ ކުރު އަދި ދިގު ރާސްތާގައި އިގްތިސާދީ ހަމަޖެހުން ގާއިމްކޮށް، ދަރަނި ދެއްކުން ދެމެހެއްޓުމަށް ހަރުދަނާ ސިޔާސަތެއް ގެންގުޅެން ޖެހޭ ކަމަށެވެ.
އެގޮތުން މުދަލާއި ހިދުމަތުން ނަގާ ވެލިއު އެޑެޑް ޓެކްސް (ވީއޭޓީ) އާއި ފަރުދުންގެ އާމްދަނީއިން ނަގާ އިންކަމް ޓެކްސް މަތި ކުރަން ލަފާ ދިނެވެ.
އޭގެ އިތުރުން ޕަބްލިކް ކުންފުނިތަކަށް ލިބެމުންދާ ގެއްލުންތައް ކުޑަ ކުރުމަށް ހަކަތައިގެ އަގުތަކަށް އިސްލާހީ ބަދަލު ގެނައުމަށް ވެސް ލަފާ ދިނެވެ.
