ލޮސްއެންޖެލިސް ގައި ރޭ ބޭއްވި "އޮސްކާ" އެވޯޑު ހަފްލާގެ އެންމެ ހޫނު ހަބަރަކަށްވީ، ހަފްލާ ހިނގަމުން ދަނިކޮށް، މެދުތެރެއިން ޕްރެޒެންޓަރު އަދި ކޮމީޑިއަން ކްރިސް ރޮކް ޖެހި ޖޯކަކާ ހެދި މަޝްހޫރު އެކްޓަރު ވިލް ސްމިތު ރުޅިގަދަވެ، ސްޓޭޖަށް އަރައި އޭނާގެ ކަންކަށިމަތީގައި ޖެހި ހާދިސާ އެވެ.
އެމެރިކާގެ ނޫސްތައް ބުނާ ގޮތުން، މި އަމަލާ ހެދި، ހަމަ އެ ހަފްލާގައި އެންމެ މޮޅު އެކްޓަރު ގެ އެވޯޑް ލިބުނު ވިލް ސްމިތުގެ އަތުން އޭނާގެ އެވޯޑު އަތުލުމަކީ އެކަށީގެންވާ ކަމެކެވެ.
އޮސްކާ އެވޯޑު ދޭ "އެކަޑެމީ އޮފް މޯޝަން ޕިކްޗާ އާޓްސް އެންޑް ސައިންސަސް" އިން އެވޯޑު ދިނުމުގައި ހަރުކަށި މިންގަނޑުތަކެއް ގެންގުޅެ އެވެ.
އެކަޑެމީ އިން 2017 ވަނަ އަހަރު ރިލީޒްކުރި، އަހުލާގީ މިންގަނޑު ނުވަތަ ކޯޑް އޮފް ކޮންޑަކްޓް ގައި، އެ އެކަޑެމީގެ އަސާސްތަކުގެ ގޮތުގައި ހިމަނާފައިވާ ކަންކަމަށް އިހުތިރާމްކުރުމަށް ބާރުއަޅާފައިވެ އެވެ. މީގެ ތެރޭގައި އެކަކު އަނެކަށް އިހުތިރާމް ކުރުމާއި، މާހައުލުގެ ހަމަޖެހުން ނަގައިލާ ކަމެއް ނުކުރުމަށާއި، އިންސާނީ ކަރާމާތަށް އުނިކަން ލިބޭ އެއްވެސް އަމަލެއް ނުކުރުން ފަދަ ކަންކަން ހިމަނާފައިވެ އެވެ.
މީގެ އިތުރުން، އެ އެކަޑެމީ އިން ޝަރަފުވެރިކަންދޭ ފަރާތްތަކުން މި އަހުލާގީ މިންގަނޑުތަކަށް އިހުތިރާމް ނުކުރާނަމަ، އެފަދަ ފަރާތަކަށް އެކަޑެމީން ޖާގައެއް ނެތް ކަމަށް ވެސް ކޯޑް އޮފް ކޮންޑަކްޓްގައި ބުނެ އެވެ.
ހޮލީވުޑްގެ އިތުބާރު ހިފޭ މަސްދަރަކާ ހަވާލާދީ ނިއުޔޯކް ޕޯސްޓްގައި ބުނެފައިވަނީ، ވިލް ސްމިތުގެ އެ އަމަލަކީ "ހަމަލާ" އެއްގެ ގޮތުގައި ބެލެވޭ ކަމެއް ކަމަށެވެ. އަދި އެ އަމަލުގެ ސަބަބުން މުޅި ހަފްލާއަށް ހައިރާންކަން ލިބި މާހައުލުގެ ހަމަޖެހުން ގެއްލުނު ކަމަށެވެ.
އެހެންކަމުން ވިލް އެވޯޑު ދޫކޮށްލަން ބޭނުން ނުވިޔަސް އެކަން ވާނެ ގޮތެއް ބުނަން ނޭގޭ ކަމަށް ވެސް އެ ނޫހުގައި ބުނެފައިވެ އެވެ.
ލޮސްއެންޖެލިސް ޕޮލިސް ޑިޕާޓްމަންޓް (އެލްއޭޕީޑީ) އިން މިހާރު ވަނީ މި މައްސަލަ ބަލަން ފަށާފަ އެވެ.
ރޭއްސުރެ މި ހާދިސާގެ ވާހަކަ އަޑުގަދަވެ، ސޯޝަލް ޕްލެޓްފޯމް ތަކުގައި މި ހާދިސާއާ ގުޅުވައިގެން މަޖާ ޖޯކުތަކާއި ތަސްވީރު "މީމް" ތައްވެސް ދަނީ ދައުރުކުރަމުންނެވެ.
