ރައީސް އޮފީހުގެ ލީގަލް އެފެއާޒް މިނިސްޓަރު ކަމުގައި ހުރެ އައިޝަތު އާޒިމާ ޝުކޫރު، އޭރު ވެރިކަމުގައި ހުންނެވި ރައީސް އަބްދުﷲ ޔާމީންއަށް މަނީ ލޯންޑާކުރުމަށް މަގުފަހިކޮށްދިން ކަމަށް ތުހުމަތުވާ މައްސަލައިގައި، އެމަނިކުފާނުގެ އިރުޝާދާއި ކުރީގެ ޕްރޮސެކިއުޓާ ޖެނެރަލް އައިޝަތު ބިޝާމްގެ ބައިވެރިވުން އޮތް ކަމަށް ބުނެ، އާޒިމާ ހެކި ހުށަހަޅުއްވައިފި އެވެ.
އެ މައްސަލަ މަދަނީ މިންގަނޑުން ކުރިއަށް ގެންދެވޭނެ ކަމަށް ކްރިމިނަލް ކޯޓުން އިއްޔެ ނިންމުމާ ގުޅިގެން، މިހާރު އާޒިމާގެ ވަކީލުން އަންނަނީ އެކޯޓުގެ ގާޒީ އަލީ އާދަމްގެ ނިންމެވުން އިސްތިއުނާފަށް ހުށަހެޅުމުގެ މަސައްކަތް ކުރަމުންނެވެ.
އިއްޔެގެ އަޑުއެހުމުގައި ދައުލަތުންނާއި ދިފާއުގެ ހެކިތައް ޝަރީއަތަށް ހުށަހަޅާފައިވާއިރު، އާޒިމާގެ މައްޗަށް ތުހުމަތުވާ ކުށް ސާބިތުކުތުމަށް ދައުލަތުން ހެއްކެއްގެ ގޮތުގައި ހުށަހެޅީ ބޮޑު ހިޔާނާތާއި ގުޅޭ ދެ މައްސަލާގައި ހަތަރު ދައުވާއެއް އުފުލާފައިވާ ކުރީގެ ރައީސް ޔާމީންނެވެ. އެމަނިކުފާނު ޝަފައީ ހެކިވެރިއެއްގެ ގޮތުގައި ހުށަހަޅާފައި ވަނީ އެސްކްރޯ އެކައުންޓުގައި ބެހެއްޓުމަށް ވެފައިވާ އެއްބަސްވުމާ އެއްގޮތަށް ބޭންކް އޮފް މޯލްޑިވްސްގައި ހުޅުވާފައިވާ އެކައުންޓަށް ފައިސާ ޖަމާކުރިކަމަށް ބުނެ ރައީސް އޮފީހުގެ ނަމުގައި ސިޓީއެއް ފޮނުވަން އާޒިމާއަށް ނާންގާކަން ސާބިތުކުރުމަށެވެ.
ނަމަވެސް އެކަން ނަފީކުރުމަށް ދިފާއުން އިއްޔެ އަޑުއެހުމުގައި ސްރީންޝޮޓްތަކެއް ހުށަހެޅި އެވެ. އެއީ ޔާމީންއާއި އާޒިމާއާ ދެމެދު ދެކެވުނު ވާހަަކަތަކެކެވެ. އޭގައި ވަނީ ސިޓީގައި ސޮއިކުރުމަށް ޔާމީންގެ އަރިހުގައި އާޒިމާ އެދިފައިވާ ކަމާއި، ރައްދުގައި އާޒިމާ ސޮއިކުރުމަށްފަހު، އެ ސިޓީ ފޮނުވުމަށް ޔާމީން އިރުޝާދު ދެއްވާފައިވާކަން ކަމަށް ދިފާއުން ފާހަގަކުރި އެވެ.
ރަސްމީ އިދާރާއަކަށް ދޮގު މައުލުމާތު ދީގެން ޔާމީންއަށް މަނީ ލޯންޑާކުރުމަށް މަގުފަހިކޮށްދިނުމުގެ ދައުވާއިން ބަރީއަވުމަށްޓަކައި އާޒިމާ ވިދާޅުވީ އޭރު އޭނާއަކީ ދައުލަތުގެ ވަޒީރެއްކަމުން ނޯޓެއް ފޮނުވަން އޭނާއަށް އެންގުމުން އެކަން ކުރުމަށް ބުނާނީ އެހެން މުވައްޒަފުން ގާތުގަ އެވެ.
ދިފާއީ ހެއްކެއްގެ ގޮތުގައި ބިޝާމް ހުށަހަޅާފައި ވަނީ، އެ ހިޔާނާތުގައި ބިޝާމްގެ ބައިވެރިވުން ކަމާއި، އެ ދައުވާ އާޒިމާގެ މައްޗަށް ނުކުރެވޭނެކަން ޝަރީއަތަށް ސާބިތުކޮށްދިނުމަށެވެ.
ހެކިވެރިންގެ ގޮތުގައި ހުށަހަޅާ ފަރާތްތައް ކޯޓަށް ހާޒިރުވެ، ހެކިބަސް ދިނުމާއި ނުދިނުމަކީ އެމީހުންގެ އިހްތިޔާރުގައި އޮންނަ ކަމެކެވެ.
