ޓޮރޮންޓޯ (މާޗް 28) - އުތުރު އެެމެރިކާގެ ކޮލިފައިންގައި ރޭ ޖެމެއިކާ އަތުން 4-0 އިން މޮޅުވެ، ކެނަޑާ އިން 36 އަހަރަށް ފަހު ފުރަތަމަ ފަހަރަށް ވޯލްޑް ކަޕަށް ކޮލިފައިވެއްޖެ އެވެ.
ގަތަރުގައި މި އަހަރު ނޮވެމްބަރު/ޑިސެމްބަރު މަހު ބާއްވާ ފީފާ ވޯލްޑް ކަޕަށް ކެނަޑާ ކޮލިފައިވީ ބާކީ އެއް މެޗު އޮއްވަ އެވެ. އުތުރު އެމެރިކާގެ ކޮލިފައިންގައި އަށް ޓީމު ވާދަކުރާއިރު، ވޯލްޑް ކަޕްގެ ސީދާ ޖާގަ ލިބޭނީ އެންމެ މަތިން ނިންމާ ތިން ޓީމަކަށެވެ. ހަތަރު ވަނަ ޖެހޭނީ އިންޓަ ކޮންޓިނެންޝިއަލް ޕްލޭއޮފްގައި ވާދަކުރާށެވެ.
ކެނަޑާ އެއް ވަނައިގައި އޮތީ 13 މެޗުން 28 ޕޮއިންޓާ އެކު އެވެ. ބާކީ ދެ ޖާގަ އަށް ވާދަކުރަނީ ތިން ޓީމެކެވެ. އެއީ ދެ ވަނައިގައި އޮތް އެމެރިކާ، ތިން ވަނައިގައި އޮތް މެކްސިކޯ އަދި ހަތަރެއްގައި އޮތް ކޮސްޓަ ރީކާ އެވެ. އެމެރިކާ އާއި މެކްސިކޯ އަށް 25 ޕޮއިންޓް ލިބިފައިވާއިރު، ޖެމެއިކާގެ އޮތީ 22 ޕޮއިންޓެވެ.
ރޭ ޖެމެއިކާ ކޮޅަށް ކެނަޑާގެ ގޯލުތައް ޖެހީ ސީލް ލަރީން، ޓޭޖަން ބުޝާނަން، ޖޫނިއާ ހޮއިލެޓް އަދި އޭޑްރިއަން މަރިއާޕާ އެވެ. ރޭގެ މޮޅާ އެކު ކެނަޑާ އަށް ވޯލްޑް ކަޕް ޖާގަ ކަށަވަރުވިކަން ޔަގީންވުމުން މެޗު ބަލަން ޓޮރޮންޓޯގެ ބީއެމްއޯ ފީލްޑަށް ވަދެތިބި 30،000 ސަޕޯޓަރުންގެ ތެރެއިން ކެނަޑާގެ ސަޕޯޓަރުން ވަރަށް ބޮޑަށް އުފާފާޅުކުރި އެވެ.
ކެނަޑާއާ ހަވާލުވެހުރި އިނގިރޭސި ކޯޗު ޖޯން ހާޑްމަން އަކީ އެ ގައުމުގެ ކުރީގެ އަންހެން ޓީމުގެ ކޯޗެވެ. އޭނާ ކެނަަޑާގެ ފިރިހެން ޓީމާ ހަވާލުވީ 2018 ވަނަ އަހަރު އެވެ. ރޭގެ މެޗަށް ފަހު ހާޑްމަން ބުނީ ވޯލްޑް ކަޕަށް ކޮލިފައިވުމަކީ ކެނަޑާ އަކީ ފުޓްބޯޅަ ގައުމެއްކަން ސާބިތުވާނެ ކަމުގެ ހެއްކެއް ކަމަށެވެ.
