ރާމަﷲ، ފަލަސްތީން (މާޗް 27) - ފަލަސްތީނުގެ ލޯކަލް އިންތިހާބުގައި 64 ޕަސެންޓު ގޮނޑި މިނިވަން ކެންޑިޑޭޓުން ކާމިޔާބުކޮށްފި އެވެ.
އާދީއްތަ ދުވަހު ރަސްމީ ނަތީޖާ އިއުލާނު ކުރިއިރު، މީގެ ފަސް އަހަރު ކުރިން ބޭއްވި ލޯކަލް އިންތިހާބުގައި މިނިވަން ކެންޑިޑޭޓުންނަށް ލިބުނީ 37 ޕަސެންޓު ގޮނޑި އެވެ.
ނަމަވެސް މިނިވަން ކެންޑިޑޭޓުންގެ ގޮތުގައި ޕާޓީތަކަށް ނިސްބަތްވާ ގިނަ ބަޔަކު ކުރިމަތިލާފައި ވާތީ، ނަތީޖާއިން މިނިވަން ކެންޑިޑޭޓުންނާއި ޕާޓީތަކަށް ނިސްބަތްވާ މީހުން އަދި ސާފު ނުވާ ކަމަށް އެނެލިސްޓުން ބުނެ އެވެ.
އިޒްރޭލުން ވެރިވެގަނެގެން އުޅޭ އިރުމަތީ ގުދުސްގައި ވޯޓުލުން މަނާ ވާނެ ކަމަށް އިޒްރޭލުން ބުނުމާ އެކު މިދިޔަ އަހަރު ބާއްވަން ހަމަޖެހިފައި އޮތް ރިޔާސީ އިންތިހާބާއި މަޖިލިސް އިންތިހާބު ރައީސް މަހްމޫދް އައްބާސް އެއްވެސް މުއްދަތެއް ނެތް ގޮތުގައި ފަސްކުރެއްވި އެވެ.
ނަމަވެސް އެންމެ ފަހު ވަގުތު އިންތިހާބު ފަސްކުރި ހަގީގީ ސަބަބަކީ މަހްމޫދް އައްބާސްގެ ފަތަހް އާއި ވާދަވެރި އަދި ގާޒާގައި ވެރިކަން ކުރާ ހަމާސްއިން މަޖިލިހުގެ މެޖޯރިޓީ ހޯދުމުގެ ފުރުސަތު ބޮޑުވުމުގެ ސަބބަުން ކަމަށް އެނެލިސްޓުން ބުނެ އެވެ.
ރިޔާސީ އިންތިހާބާއި މަޖިލިސް އިންތިހާބު ފަސްކޮށްފައި ވާތީ، ހޮނިހިރު ދުވަހު ބޭއްވި ލޯކަލް އިންތިހާބުގައި ހަމާސްއިން ބައިވެރިއެއް ނުވެ އެވެ. ނަމަވެސް މިނިވަން ކެންޑިޑޭޓުންގެ ގޮތުގައި ހަމާސްގެ ގިނަ މެމްބަރުން ވާދަކުރި އެވެ.
ގިނަ ގޮނޑި ހޯދުމުގެ ބޭނުމުގައި ފަތަހްއިން ވެސް މިނިވަން ކެންޑޭޓުން ނެރުނެވެ. އެނެލިސްޓުން ބުނާ ގޮތުގައި ހުޅަނގު އައްސޭރީގައި ވެރިކަން ކުރާ ފަތަހްއާ މެދު ފަލަސްތީން ރައްޔިތުންގެ މެދުގައި އޮތް ހިތްހަމަނުޖެހުން ވަނީ ވަރަށް ބޮޑަށް އިތުރުވެފަ އެވެ.
ނަމަވެސް މަހްމޫދު އައްބާސް އާދީއްތަ ދުވަހު ވިދާޅުވީ އިންތިހާބުން ކުރި ލިބުނީ ފަތަހްއަށް ކަމަށާއި އެ ގްރޫޕުގެ އުއްމީދުތައް އާ ވެއްޖެ ކަމަށެވެ.
އިންތިހާބުގައި ވޯޓުލީ 53.7 ޕަސެންޓު މީހުންނެވެ. ވޯޓުލުން 50 އަށް ވުރެ ގިނަ އަވަށާއި ސިޓީގައި ކުރިއަށް ދިޔަ އިރު، އިންތިހާބުގެ ފުރަތަމަ މަރުހަލާ އޮތީ މިދިޔަ ޑިސެމްބަރު މަހު ހުޅަނގު އައްސޭރީގެ 154 އަވަށުގަ އެވެ. ގާޒާގައި ވޯޓުލުމެއް ނުބާއްވަ އެވެ.
ފާއިތުވި 15 އަހަރު ފަލަސްތީނުގައި ރިޔާސީ އަދި މަޖިލިސް އިންތިހާބެއް ވެސް ބާއްވާފައެއް ނުވެ އެވެ.
