ރަޝިއާ ނުވަތަ އެހެން އެއްވެސް ގައުމެއްގެ ސަރުކާރު ބަދަލު ކުރަން އެމެރިކާއިން ނުރާވާ ކަމަށް އެ ގައުމުގެ ސެކެޓްރީ އޮފް ސްޓޭޓް އެންޓޮނީ ބްލިންކެން ވިދާޅުވެއްޖެ އެވެ.
ބްލިންކެން އެހެން ވިދާޅުވި އިރު، ހޮނިހިރު ދުވަހު އެމެރިކާގެ ރައީސް ޖޯ ބައިޑެން ވިދާޅުވީ ރަޝިއާގެ ރައީސް ލެޑިމިއަ ޕުޓިން ވެރިކަމުގައި ހުންނެވުމުގެ ފުރުސަތު ދީގެން ނުވާނެ ކަމަށެވެ.
ބައިޑެން އެގޮތަށް ވިދާޅުވީ ޕޮލޭންޑަށް ކުރެއްވި ދަތުރު ނިންމާލުމުގެ ކުރިންނެވެ. އެ ވާހަކައާ ގުޅިގެން ބްލިންކެން ވަނީ ބައެއް ފަރާތްތަކަށް އޮޅުން އަރާފައިވާ ކަމަށް ވިދާޅުވެފަ އެވެ.
އެގޮތުން ބައިޑެން ވިދާޅުވީ ޔޫކްރެއިންގައި ހަނގުރާމަ ކުރުމުގެ ފުރުސަތު ޕުޓިންއަށް ދީގެން ނުވާނެ ކަމުގެ ވާހަކަ ކަމަށް ބްލިންކެން ފާހަގަކުރެއްވި އެވެ.
ބައިޑެންގެ ވާހަކަތަކާ ގުޅިގެން ރަޝިއާ ސަރުކާރުން ބުނީ ރަޝިއާގެ ލީޑަރު ހޮވާނީ ރަޝިއާ ރައްޔިތުން ކަމަށެވެ.
"ރަޝިއާ ނުވަތަ އެހެން އެއްވެސް ތަނެއްގައި ވެސް ސަރުކާރު ބަދަލު ކުރުމުގެ ސްޓްރެޓެޖީއެއް އަޅުގަނޑުމެން ނުގެންގުޅެން،" އިޒްރޭލުގައި ނޫސްވެރިންނަށް މައުލޫމާތު ދެއްވަމުން ބްލިންކެން ވިދާޅުވި އެވެ.
ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައަށް މަހަކަށް ވުރެ ގިނަ ދުވަސްވެފައިވާ އިރު، ހޮނިހިރު ދުވަހު ހަމަލާތައް އަމާޒުވީ ހުޅަނގުގައި އޮންނަ ލްވިވް ސިޓީއަށެވެ.
ޔޫކްރެއިންގެ ރައީށް ވޮލޮޑިމިރް ޒެލެންސްކީ ތަކުރާރުކޮށް އެދެމުން ދަނީ ހުޅަނގުގެ ގައުމުތަކުން ވައިގެ އުޅަނދުތަކާއި، ޓޭންކުތަކާއި، މިސައިލް ޑިފެންސް ސިސްޓަމްތައް ފޯރުކޮށްދިނުމަށެވެ.
