އަވަށްޓެރި އިންޑިއާއިން މެދުކެނޑުމެއްނެތި ރާއްޖެއަށް އެހީތައް ދެމުން ދަނީ ވެރިކަމުގައި އޮތް ޕާޓީއަކަށް ބެލުމެއްނެތި، ސީދާ ދިވެހި ރައްޔިތުންގެ ކުރިއެރުމާއި ތަރައްގީއަށް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
އިންޑިއާގެ އެހީގައި އައްޑޫގައި ގާއިމްކުރި ނެޝަނަލް ކޮލެޖު އޮފް ޕޮލީސިން އެންޑް ލޯ އެންފޯސްމަންޓު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ އިންޑިއާ އިން ޒަމާނުއްސުރެ ރާއްޖެއަށް ދެމުންދާ އެހީތެރިކަމުގެ ސާފު ހެކިތައް ބަލައިލި ކޮންމެ ދިމާއަކުން ފެންނާން ހުރި ކަމަށެވެ.
އެގޮތުން، އިންޑިއާގެ ދީލަތި އެހީގެ ދަށުން ގާއިމުކޮށްފައިވާ އައިޖީއެމްއެޗު، އެމްއެންޔޫގެ ޓޫރިޒަމް ފެކަލްޓީ، ގިނަ ރަށްތަކެއްގެ ފެނާއި ނަރުދަމާގެ ނިޒާމާއި މިހާރު ފަށާފައިވާ މާލެ-ތިލަފުށި ފަދަ މަޝްރޫއުތަކަށް އެމަނިކުފާނު އަލިއަޅުވައިލެއްވި އެވެ.
ރައީސް ވިދާޅުވި ގޮތުގައި އެފަދަ މަޝްރޫއުތަކަކީ އިންޑިއާގެ ހިލޭ އަދި ލޯނު އެހީގެ ދަށުން ރާއްޖޭގެ ތަރައްގީ އާއި ކުރިއެރުމަށް ހިންގާ ބޮޑެތި މަޝްރޫއުތަކެވެ.
"އިންޑިއާއިން ރާއްޖެއަށް އެހީ ވަނީ ވެރިކަމުގައި ތިބީ ކޮން ބައެއްތޯ، ކޮން ޕާޓީއެއްތޯ ބެލުމެއް ނެތި ސީދާ ދިވެހި ރައްޔިތުންގެ ތަރައްގީ އާއި ކުރިއެރުމަށް،" ރައީސް ވިދާޅުވި އެވެ.
އެމަނިކުފާނު ވިދާޅުވީ މިއަދު ހުޅުވުނު ޕޮލިސް އެކެޑެމީއަކީ އެ ހަގީގަތުގެ ފުރިހަމަ އެއް މިސާލު ކަމަށެވެ.
ދިވެހި ފުލުހުން ތަމްރީނު ކުރުމުގެ މަރުކަޒެއް އެޅުމުގެ މަޝްވަރާތައް ފެށުނީ 2009 ވަނަ އަހަރުގެ ތެރޭގަ އެވެ.
އެ އެކެޑެމީ ޅ. ދިއްފުށިމާދޫ އާއި މާބިންހުރާގެ އިތުރުން ދ. ވާނީގައި އެޅުމަށް މަޝްވަރާ ކުރުމަށްފަހު އައްޑޫގައި އެ އެކެޑެމީ ގާއިމުކުރުމަށް ނިންމާފައިވަނީ 2014 ވަނަ އަހަރު އޭރުގެ ސަރުކާރުންނެވެ.
އިންޑިއާގެ 300 މިލިއަން ޑޮލަރުގެ ހިލޭ އެހީގެ ދަށުން މި މަޝްރޫއުގެ އަމަލީ މަސައްކަތް ފެށިފައި ވަނީ 2017 ވަނަ އަހަރެވެ.
ރައީސް ސޯލިހު މިއަދު ދެއްކެވި ވާހަކަފުޅުގައި ރާއްޖޭގައި މިފަދަ ފުރިހަމަ އެކެޑެމީއެއް ގާއިމުކުރުމަށްޓަކައި ކުރީގެ ސަރުކާރުތަކުން ކުރި މަސައްކަތް ހާއްސަ ގޮތެއްގައި ފާހަގަކުރެއްވި އެވެ.
އެގޮތުން، އެމަނިކުފާނު ވަނީ ކުރީގެ ރައީސުން ކަމަށްވާ އަބްދުﷲ ޔާމީން އަބްދުލްގައްޔޫމާއި ޑރ. މުހައްމަދު ވަހީދު ހަސަން މަނިކުގެ އިތުރުން މުހައްމަދު ނަޝީދަށް ވެސް ޝުކުރު އަދާކުރައްވައިފަ އެވެ.
ރައީސް ވިދާޅުވި ގޮތުގައި ފުލުހުންގެ ހިދުމަތެއް އޮތުމުގެ ބޭނުމަކީ، ރައްޔިތުންނާ ގާތުން މަސައްކަތްކޮށްގެން މުޖުތަމައުގައި ހުންނަ މައްސަލަތައް ހައްލުކުރުމެވެ.
އެމަނިކުފާނު އިތުރަށް ވިދާޅުވީ މަސައްކަތަށް ގާބިލު ފުލުހުންގެ ހިދުމަތެއް ގާއިމުކުރުމަކީ މުޅި ދައުލަތުގެ މަސްލަހަތާ ގުޅިފައިވާ ކަމެއް ކަމަށެވެ.
"ފުލުހުންނަށް ހާއްސަ ތަމްރީނުތަކެއް ދޭންޖެހެނީ އެހެންވެގެން،" މި ކޮލެޖާއެކު ޑިމޮކްރެޓިކް ޒަމާނީ ބެސްޓް ޕްރެކްޓިސްގެ ދަށުން ފުލުހުން ތަމްރީން ކުރެވި އަހުލުވެރިވެގެންދާނެކަމުގެ އުއްމީދާއެކު ރައީސް ވިދާޅުވި އެވެ.
