އައްޑޫ ސިޓީގައި ހިންގަން ހަމަޖެހިފައިވާ އައްޑޫ ޑިވެލޮޕްމެންޓް ޕްރޮޖެކްޓް (އޭޑީޕީ) މަޝްރޫއުގެ އަމަލީ މަސައްކަތް ފެށުމަށް މިއަދު ސޮއިކޮށްފި އެވެ.
އިންޑިއާގެ ލޯނެއްގެ ދަށުން މި މަޝްރޫއު ހިންގާއިރު ބިން ހިއްކުމުގެ އަމަލީ މަސައްކަތް ހަވާލުކޮށްފައި ވަނީ ނެދަލޭންޑްސްގެ ކުންފުންޏެއް ކަމަށްވާ ވެން އޫޑް އާ އެވެ. މިއަދު އައްޑޫ ސިޓީގައި ބޭއްވި ރަސްމިއްޔާތެއްގައި މިކަމުގެ އެއްބަސްވުމުގައި ވަނީ ސޮއިކޮށްފަ އެވެ.
ޕްލޭނިން މިނިސްޓްރީގެ ފަރާތުން ޕާމަނަންޓް ސެކްރެޓަރީ ޒީނިޔާ އަހުމަދު ހަމީދު ސޮއި ކުރެއްވި އިރު ވެން އޫޑް ގެ ފަރާތުން ސޮއި ކުރެއްވީ އެ ކުންފުނީގެ ޑިރެކްޓަރ ޑްރެޖިން، ކޯނީލިއަސް އެޑްރިއާން ޑި ބްރުއިން އެވެ.
އޭޑީޕީއަކީ އައްޑޫގެ އިގްތިސޯދު ކުރިއަރުވާ، ފަތުރުވެރިކަމާއި، މަސްވެރިކަމާއި ރީޓެއިލް އަދި ހޯލްސޭލް ވިޔަފާރީގެ ދާއިރާއިން ޕްރައިވެޓް އިންވެސްޓްމެންޓްތައް އައްޑޫ އަށް ގެނައުމަށްޓަކައި ސަރުކާރުން ފަށާފައިވާ މަޝްރޫއުއެކެވެ.
އެ މަޝްރޫއުގެ ދަށުން އައްޑޫގެ ހަތަރު ސަރަހައްދެއްގެ ބިން ހިއްކުމުގެ މަޝްރޫއު އިންޑިއަން އެގްޒިމް ބޭންކުގެ 800 މިލިއަން އެމެރިކާ ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ކުރިޔަށް ގެންދާނެ އެވެ.
މަޝްރޫއުގައި ޖުމްލަ 194.3 ހެކްޓަރުގެ ބިން ހިއްކަން ވަނީ ހަމަޖެހިފަ އެވެ. އެގޮތުން, ހިތަދޫއަށް 90 ހެކްޓަރު ބިމާއި މަރަދޫ/މަރަދޫފޭދޫ އަށް 76 ހެކްޓަރުގެ ބިން އިތުރުކުރާނެ އެވެ. އޭގެއިތުރުން, ފަތުރުވެރިކަމަށް ހާއްސަ ކުރެވިގެން އައްޑޫ ސިޓީ ފަޅު ތެރޭން 8.3 ހެކްޓަރުގެ ތިން ރަށަކާއި ހަތަރު ލޭން ޑިޓުއާ ލިންކް ރޯޑުގެ ބްރިޖުގެ އެމްބޭންކުމަންޓަށް 3.3 ހެކްޓަރު ބިން ހިއްކަން ވަނީ ހަމަޖެހިފަ އެވެ.
އަށާރަ މަސް ދުވަހުން ހިއްކަން ހަވާލުކުރި މި މަޝްރޫއުއަކީ 1.3 ބިލިއަން ރުފިޔާގެ މަޝްރޫއުއެކެވެ.
އައްޑޫގައި ހިންގާ މި ބިޔަ މަޝްރޫއުއާ ގުޅިގެން ތިމާވެއްޓަށް ގެއްލުންވާނެ ކަމުގެ ކަންބޮޑުވުން ޖަމިއްޔާތަކުން ވަނީ ފާޅުކޮށް, މަޝްރޫއު ހުއްޓާލަން ގޮވާލާފަ އެވެ. ނަމަވެސް, އެންވަރަޔަމަންޓް މިނިސްޓްރީން ވެސް ވަނީ އައްޑޫއަށް ކޮންމެހެން ބޭނުންވާ މަޝްރޫއުއަކަށް ވާތީ އެކަން ނުހުއްޓުވަން ނިންމާފަ އެވެ.
ޕްލޭނިން މިނިސްޓްރީން ބުނީ މަޝްރޫއު ކުރިއަށް ގެންދާނީ ތިމާވެއްޓަށް ލިބޭ ގެއްލުން އެންމެ ކުޑަވާނެ ގޮތަކަށް, އީއައިއޭ ރިޕޯޓްގައި ފާހަގަކޮށްފައިވާ ރައްކާތެރިކަމުގެ ހުރިހާ ފިޔަވަޅުތަކެއް އަޅައިގެން ކަމަށެވެ. އެކަމަށް ތަޖުރިބާކާރެއްގެ ލަފާ ވެސް ސަރުކާރުން އަންނަނީ ހޯދަމުންނެވެ.
ރައީސް އިބްރާހިމް މުހައްމަދު ސޯލިހު ވިދާޅުވެފައިވާ ގޮތުގައި, އައްޑޫ ސިޓީ ތަރައްގީވެގެން ނޫނީ ރާއްޖެ ތަރައްގީ ނުކުރެވޭނެ އެވެ. އެހެންވެ, މި ސިޓީ ތަރައްގީ ކުރުމަކީ ސަރުކާރުން ވަރަށް ބޮޑު އިސްކަމެއް ދެއްވާ ކަމެއް ކަމާއި ގިނަ މަޝްރޫއުތަކެއް ކުރިއަށް ގެންދާނެ ކަމަށް ރައީސް ވިދާޅުވެފައިވެ އެވެ.
ބިން ހިއްކުމަށްފަހު, އެ ބިމުގައި އިގުތިސޯދީ ގިނަ ހަރަކާތްތައް ހިންގޭނެ ތަންތަނާއި ހައުސިންގެ ބިޔަ މަޝްރޫއުތައް ހިންގުމަށް ސަރުކާރުން ރާވަމުންދާ ކަމަށް ޕްލޭނިން މިނިސްޓްރީން މިއަދު ހާމަކުރި އެވެ.
އައްޑޫގައި ކުރިއަށްދާ މަޝްރޫއުތައް:
- ހަތަރު ރަށުގެ މަގު ހެދުން
- އައްޑޫ ސިޓީ ރީޖަނަލް ވޭސްޓް މެނޭޖްމަންޓް ފެސިލިޓީ
- ކަސްޓަމްސް ސައުތް ރީޖަން ހެޑް އޮފީސް އިމާރާތް
- އައްޑޫ ސިޓީ ފެނުގެ ނިޒާމް އަޕްގްރޭޑްކުރުން
- އައްޑޫސިޓީ ޑިސްޓްރިކްޓް ކޯޓު އިމާރާތްކުރުން
- އައްޑޫސިޓީ ޑިސްޓްރިކްޓް ކޯޓު އިމާރާތްކުރުން
- އައްޑޫ ހައި ސްކޫލް 12 ކްލާސްރޫމް އިމާރާތް
