އިޒްރޭލާއި ފަލަސްތީނުގެ މަންމައިން ވަޔާއި ވާރެއަށް ބެލުމެއް ނެތި، ޑެޑް ސީ ކަނޑުގެ އައްސޭރިފަށަށް އެއްވެ، ސުލްހައަށް ގޮވާލައިފި އެވެ.
ފަލަސްތީނުގެ "ވިމެން އޮފް ދަ ސަން" ގްރޫޕާއި އިޒްރޭލުގެ "ވިމެން ވޭޖް ޕީސް" ގްރޫޕުން ބޭއްވި އެއްވުމުގައި އެތައް ސަތޭކަ އަންހެނުން ބައިވެރިވި އެވެ.
ޑެޑް ސީ ކަނޑުގެ އައްސޭރިފަށަށް ޖަމާވެ، ގަސް އިންދައި، ޅެން ކިޔުމަށް ފަހު، ސުލްހައިގެ މަޝްވަރާތަކަށް ފިއްތުން ކުރުމަށް އެއްވުމުގެ ބައިވެރިން ވައުދުވި އެވެ.
"އަންހެނުންގެ ގޮތުގައި އެއްވެ ވާހަކަ ދައްކައި، ދިރިއުޅުމާއި ދަރިންގެ ވާހަކަތައް ހިއްސާ ކުރަން ފެށުމުން ކުރެވެނީ ގާތްކަމުގެ އިހުސާސެއް،" ހުޅަނގު އައްސޭރީގައި ދިރިއުޅޭ ލެއިލާ ޝެއިހް އޭއެފްޕީއަށް ބުންޏެވެ.
"އަޅުގަނޑުމެންގެ އުއްމީދަކީ އަންހެނުން އެއްވެ ކުރާ މަސައްކަތުން، ފުރާނަ ސަލާމަތް ކުރެވުން،" ތެލް އަވީވްގައި ދިރިއުޅޭ ޕެސްކޭލް ޗެން ބުންޏެވެ.
"އަޅުގަނޑުގެ ދަރިފުޅު ސިފައިންގެ ހިދުމަތަށް ނުކުންނަން ދެން އޮތީ 10 ދުވަސް. އޭނާގެ ޒިންމާ އަދަކުރަން ޖެހޭނެ. އެކަމަކު އަޅުގަނޑުމެން އެންމެން މިއީ މަންމައިން. އަޅުގަނޑުމެންނަށް ވިސްނެނީ ސުލްހަ ގެނައުމަށް މަންމައިން އަދާކުރަން ޖެހޭ ދައުރެއެއް އެބަ އޮތް ކަމަށް،" އޭނާ ބުންޏެވެ.
އިޒްރޭލާއި ފަލަސްތީނުގެ ސުލްހައިގެ މަޝްވަރާ މިހާރު އޮތީ ގާތްގަނޑަކަށް އެއްކޮށް ހުއްޓިފަ އެވެ. އިޒްރޭލުގެ ބޮޑު ވަޒީރު ނަފްތާލީ ބެނެޓް ވިދާޅުވީ އެމަނިކުފާނުގެ ވެރިކަމުގައި ރަސްމީކޮށް ސުލްހައިގެ މަޝްވަރާޢެއް ނޯންނާނެ ކަމަށެވެ.
ބެނެޓް ދެކިވަޑައިގަންނަވާ ގޮތުގައި ފަލަސްތީން ދައުލަތެއްގެ ގޮތުގައި އޮވެގެން ނުވާނެ އެވެ. އެހެން ނަމަވެސް، އިޒްރޭލް ސަރުކާރާއި ފަލަސްތީނުގެ ރައީސް މަހްމޫދް އައްބާސްގެ ސަރުކާރާ ދެމެދު އޮތް ގުޅުން ފަހަކަށް އައިސް ރަނގަޅު ވާން ފަށާފައިވާ ކަމަށް ބެލެވެ އެވެ.
މަހްމޫދް އައްބާސް ވަނީ މަޝްވަރާއަށް އިޒްރޭލުގެ ޑިފެންސް މިނިސްޓަރު ބެނީ ގާންޓްޒްގެ ގެކޮޅަށް ވެސް ވަޑައިގެންފަ އެވެ.
އިޒްރޭލާއި ފަލަސްތީނާ އެކު މަޝްވަރާ ބޭއްވުމަށް އަންނަ ހަފްތާގައި އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން އިޒްރޭލާއި ހުޅަނގު އައްސޭރިއަށް ވަޑައިގަންނަވާނެ އެވެ.
