މުހިންމު މަޝްރޫއުތަކެއްގެ ނިމުން ފާހަގަކުރުމުގެ ގޮތުން އައްޑޫ ސިޓީ އާއި ފުވައްމުލަކު ސިޓީ އަށް ރައީސް އިބްރާހިމް މުހައްމަދު ސޯލިހު ވަޑައިގަންނަވާ ގޮތަށް ހަމަޖެހިއްޖެ އެވެ.
ރައީސް އޮފީހުން މައުލޫމާތު ދީފައިވާ ގޮތުގައި އެމަނިކުފާ މި ދަތުރުފުޅު ކުރައްވާނީ މާދަމާ އިން ފެށިގެން މާޗް 28 ގެ ނިޔަލަށެވެ.
ފުވައްމުލަކުގެ އިތުރުން އައްޑޫ ސިޓީގެ ގަން، ހިތަދޫ، މަރަދޫ، މަރަދޫ ފޭދޫ އަދި ހުޅުމީދޫގެ އިތުރުން ފޭދޫ އަށް އެމަނިކުފާނު ވަޑައިގަންނަވާނެ އެވެ.
މި ދަތުރުފުޅުގެ ތެރެއިން ހިނގާ މުހިންމު ހަރަކާތްތައް؛
- ނޭޝަނަލް އެކަޑަމީ އޮފް ޕޮލިސިން އެންޑް ލޯ އެންފޯސްމަންޓް ހުޅުވުން
- އައްޑޫ ބިން އިތުރު ކުރުމުގެ މަޝްރޫއުގެ އެއްބަސްވުމުގައި ސޮއި ކުރެއްވުން
- އައްޑޫ ސިޓީގެ މަގުތައް ހެދުމުގެ އަމަލީ މަސައްކަތް ފައްޓަވައި ދެއްވުން
- މަރަދޫ ބަނދަރު ހުޅުވައި ދެއްވުން
- މީދޫ ބަނދަރު ހުޅުވައި ދެއްވުން
- ހިތަދޫ މަސްޖިދް އިބްރާހީމް ހުޅުވައި ދެއްވުން
- ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ސެންޓަރ ހުޅުވައި ދެއްވުން
މި މަޝްރޫއުތަކުގެ ތެރެއިން އެންމެ ބޮޑު ކަމެއްގެ ގޮތުގައި ފާހަގަކުރެވެނީ އައްޑޫގައި މުޅިން އަލަށް ހުޅުވާ ނޭޝަނަލް އެކަޑަމީ އޮފް ޕޮލިސިން އެންޑް ލޯ އެންފޯސްމަންޓް އިފްތިތާހު ކުރުމެވެ.
އައްޑޫގައި ޕޮލިސް އެކަޑަމީއެއް އިމާރާތްކުރުމުގެ މަޝްވަރާތައް 2009 ގައި ފަށައި އެތަން އިމާރާތްކުރަން އިންޑިއާގެ ސަރުކާރާ އެކު ސޮއިކުރީ 2012 ގަ އެވެ.
އިންޑިއާގެ ސަރުކާރުން 18 މިލިއަން ޑޮލަރު ހޭދަކޮށްގެން ގާއިމުކޮށްފައިވާ އެ ޕޮލިސް އެކަޑަމީ އަކީ އެ ގައުމުގެ މިލިޓަރީ ބޭސްއެއް ކަމަށާއި އެތަނުގައި އަސްކަރީ ހަރަކާތްތައް ހިންގާނެ ކަމުގެ އިދިކޮޅުގެ ފާޑުކިއުން ސަރުކާރަށް އެބައޮތެވެ.
އެކަމަކު ހޯމް މިނިސްޓަރާއި ޕޮލިސް ކޮމިޝަނަރު ވެސް ވަނީ އެކަން ދޮގުކުރައްވައި އެތަނުގައި އެއްވެސް އަސްކަރީ ހަރަކާތަކަށް ޖާގަ ނޯންނާނެ ކަމުގެ ޔަގީންކަން ދެެއްވައިފަ އެވެ.
