ރިއޯ ޑި ޖަނެއިރޯ، ބްރެޒިލް (މާޗު 14) - މި މަހު ކުޅުމަށް ހަމަޖެހިފައިވާ ވޯލްޑް ކަޕްގެ ކޮލިފައިންގެ މެޗުތަކަށް ނެގި ބްރެޒިލްގެ ސްކޮޑުގައި ހިމެނުނު މެންޗެސްޓާ ސިޓީގެ ގޯލްކީޕަރު އެޑަސަން މޮރާއެސް އެ ޓީމުގެ ސްކޮޑުން ވަކިވެއްޖެ އެވެ.
ދެކުނު އެމެރިކާގެ ވޯލްޑް ކަޕް ކޮލިފައިންގައި ރާއްޖެ ގަނޑިން ހުކުރު ދުވަހުގެ ފަތިހު ޗިލީއާ ދެކޮޅަށް ކުޅޭ މެޗާއި އަންނަ ބުދަ ދުވަހުގެ ފަތިހު ބޮލީވިއާއާ ދެކޮޅަށް ކުޅެން ނެގި ބްރެޒިލްގެ ސްކޮޑުގައި އެޑަސަން ވަނީ ހިމަނައިފަ އެވެ. މި އަހަރު ގަތަރުގައި ބާއްވާ ވޯލްޑް ކަޕަށް ބްރެޒިލް ކޮލިފައިވި ނަމަވެސް، ބާކީ އޮތް ދެ މެޗުން މޮޅުވެގެން ކޮލިފައިންގެ އެއް ވަނަ ކަށަވަރުކުރުމުގެ ފުރުސަތު އެބައޮތެވެ.
އެކަމަކު، އެޑަސަން ސްކޮޑުން ވަކިވެ، އޭނާގެ ބަދަލުގައި ގޯލްކީޕަރު އެވަސަން ސްކޮޑަށް ނަގާފައިވާ ކަމަށް ބްރެޒިލްގެ ޓީމުން ވަނީ ބުނެފަ އެެވެ. އެޑަސަން ސްކޮޑުން ވަކިވި ސަބަބެއް ރަސްމީކޮށް ހާމަނުކުރި ނަމަވެސް، އޭނާ ސްކޮޑުން ވަކިވީ ބަލި ހާލަތުހުރި ގޮތުން ކަމަށް މީޑިއާ ރިޕޯޓްތަކުން ބުނެ އެވެ.
ރިޕޯޓްތަކުން ބުނާގޮތުގައި ބްރެޒިލްގެ ސްކޮޑާ އެޑަސަން ގުޅުނުއިރު ވެސް ހުރީ ބަލިކޮށެވެ. އެހެންވެ، ބްރެޒިލްގެ ފެޑަރޭޝަނުން ވަނީ އޭނާ ސްކޮޑުން ބާކީކުރަން ނިންމައިފަ އެވެ.
އެޑަސަންގެ އިތުރުން މެންޗެސްޓާ ސިޓީގެ ކެވިން ޑި ބްރޭނާ އާއި ކައިލް ވޯކާ ވެސް ވަނީ އަމިއްލަ ސަބަބުތަކާ ހުރެ މި ފަހަރުގެ އިންޓަނޭޝަނަލް ބްރޭކުގައި ގައުމީ ޓީމުގެ މެޗުތަކުގައި ނުކުޅެން ނިންމައިފަ އެވެ.
