ޝަރީއަތް ދިގުލައިގެން ދިއުމުން ބަންދުގެ މުއްދަތަށް ކެނޑުމަށް ފަހު އިތުރަށް ޖަލުގައި ހުންނަން ނުޖެހޭތީ އައްޑޫގެ ވިޔަފާރިވެރިއެއް ކަމަށްވާ އަލީ އަބްދުﷲ މަރާލުމުގައި ބައިވެރިވި ކަމުގެ ދައުވާ ސާބިތުވި ސ. ހިތަދޫ، ނަޝީދީގެ، މުހައްމަދު ޝިފާޒު މިނިވަންކުރުމަށް ކްރިމިނަލް ކޯޓުން ނިންމައިފި އެވެ.
ކަރުގައި ވާފަށެއް އައްސާ ވާންކޮށްގެން އަލީ މަރާލިކަމުގެ ދައުވާ ސާބިތުވެ، އޭނާ އަށް ބޮޑުބޭބެ ކިޔާ ސ. ހިތަދޫ، ހެޕީ ފިއުޗާ، އަހުމަދު އިބްރާހިމް ދީދީ އަށް 12 އަހަރުގެ ހުކުމެއް އޮކްޓޯބަރު 12، 2020 ގައި ކްރިމިނަލް ކޯޓުން އިއްވި އެވެ.
އެ ގަތުލުގައި އެހީތެރިވި ކަމުގެ ދައުވާ މައޫޒު މުހައްމަދާއި، މުބާރިކް މުހައްމަދުގެ މައްޗަށް ސާބިތު ނުވީ ހެކި ނުލިބެގެންނެވެ. އެހެންވެ ދައުލަތުން އެ ނިންމުން އިސްތިއުނާފް ވެސް ކޮށްފައި ނުވެއެވެ.
އެކަމަކު އެ ދެމީހުންނާއި އެކު އެ ގަތުލުގައި ބައިވެރިވި ކަމުގެ ދައުވާ ޝިފާޒުގެ މައްޗަށް ސާބިތުވާ ކަމަށް އިއްޔެ ކޯޓުން ނިންމީ، ގާތިލު ބުނެގެން، އެ ޖަރީމާ ހިންގަން އުޅޭކަން އެނގިހުރެ، އެ ތަނަށް އޭނާ ގެންގޮސްދީފައި ވާތީ އެވެ.
އެ ކުށް ސާބިތުވުމާއި ގުޅިގެން ހަ އަހަރުގެ ހުކުމެއް އޭނާގެ މައްޗަށް އިއްވި ނަމަވެސް، އެ މައްސަލައިގެ ޝަރީއަތް ދިގުލައިގެން ދިއުމާއި ގުޅިގެން، ބަންދުގެ މުއްދަތު ކެނޑުމަށްފަހު، އިތުރު ދުވަހެއް ޖަލުގައި ހުންނަން ނުޖެހޭނެ ކަމަށް ކަނޑައަޅާ ގާޒީ ސައްފަތު ހަބީބު އިއްޔެ އޭނާ މިނިވަންކުރި އެވެ.
"...އަހްމަދު އިބްރާހީމްދީދީ (ގާތިލު) އާ ދިމާވެގެން ދެމީހުން އެއްކޮށް ކޮފީއެއް ބޯން ތިބި ވަގުތު، އަޙްމަދު އިބްރާހީމްދީދީ މުޙައްމަދު ޝިފާޒްގެ ގާތުގައި އެރޭގެ ދަންވަރު 1:00 އަށް އަލީ އަބްދުﷲ ހިތަދޫ ސްކޫލްގެ އިރު އުތުރު ކަންމައްޗާ ހަމައަށް ގެންގޮސްދޭން އެދުނު ކަމަށާއި، މިކަން ކޮށްދިނުމަށް އަހްމަދު އިބްރާހީމްދީދީ 30,000ރ. ހުށައެޅުމުން އެކަން 50،000ރ. އަށް ކޮށްދެވޭނެ ކަމަށް ބުނި ކަމަށާއި، އަދި އެއަށްވުރެ ގިނައިން ފައިސާ ނުދެވޭނެ ކަމަށް އަހުމަދު އިބްރާހީމްދީދީ ބުނި ކަމަށާއި" ފުލުހުންގެ ތަހުގީގަށް ދިން ބަޔާނުގައި ޝިފާޒު ބުނެފައި ވެއެވެ.
ތަހުގީގު މަރުހަލާގައި ކުށަށް އިއުތިރާފުވި ނަމަވެސް، ދައުވާ ކުރުމާއި އެކު ޝަރީއަތުގެ މަރުހަލާގައި ޝިފާޒް ވަނީ ކުށަށް އިންކާރުކޮށްފަ އެވެ. ނަމަވެސް، އެ މަސައްކަތް ފުރިހަމަކުރުމާއި ގުޅިގެން، ދިން ފައިސާ ކޮތަޅު އޭނާގެ ދިރިއުޅުނު ގޭގައި ވަޅުލާފައި ހުއްޓާ ފުލުހުން ހޯދި އެވެ. އެ ކޮތަޅުގައި 40،095 ރުފިޔާއާއި، 70 އެމެރިކާ ޑޮލަރު އޮތް ކަމަށް ދައުލަތުން ބުނެ އެވެ.
އަލީ އަބްދުﷲ މަރާލާފައިވާ އޮއްވާ ފެނިފައިވަނީ އޭނާ ގެއްލިގެން ހޯދަމުން ދަނިކޮށް މާޗް 2، 2016 ގަ އެވެ. އެ މައްސަލާގައި ފުލުހުން ބުނެފައި ވަނީ އޭނާ މަރާލާފައިވަނީ ފައިސާ އާއި މުދަލުގެ ދަހިވެތި ކަމުގައި ކަމަށެވެ.
