މުޖްތަމައުގައި އަންހެނުންނަށް ހަމަހަމަ ފުރުސަތު ހޯދުމަށް، ގޭ ތެރޭގައި އުފުލަންޖެހޭ ޒިންމާތަކުގައި ފިރިހެނުން ހިއްސާވާ ނަމަ ހަމަހަމަ ކަމަށް ހުރި ހުރަސްތައް ނައްތާލެވޭނެ ކަމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދު އިއްޔެ ވިދާޅުވެއްޖެ އެވެ.
މި އަހަރުގެ ބައިނަލްއަގުވާމީ އަންހެނުންގެ ދުވަސް ފާހަގަކުރުމުގެ ގޮތުން ރޭ ބޭއްވި ޖަލްސާ ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހެވެ. އެމަނިކުފާނުގެ އަރިހުގައި އަނބިކަނބަލުން ފަޒްނާ އާއި ނައިބު ރައީސް ފައިސަލް ނަސީމު ބައިވެރިވެވަޑައިގެންނެވި އެވެ.
އެ ޖަލްސާގައި ވާހަކަ ދައްކަވަމުން ފަޒްނާ ވިދާޅުވީ 2019 ވަނަ އަހަރުން ފެށިގެން ކޮންމެ އަހަރެއްގެ އަންހެނުންގެ ދުވަހުގެ ޝިއާރުގެ މައިގަނޑު އަމާޒަކީ އެއް ކަންތައްތަކެއް ކަމަށެވެ. އެއީ ދެމެހެއްޓެނެވި ތަރައްގީއަށްޓަކާ އަންހެނުން ކުރަމުންގެންދާ އަގުހުރި، ބުރަ މަސައްކަތްތަކުގެ އަގު ވަޒަންކުރުންކަމަށް ފަޒްނާ ބާރު އެޅުއްވި އެވެ.
މުޖްތަމައުގައި އަންހެނުންނަށް ހަމަހަމަ ފުރުސަތުތަކެއް ލިބުމަށް ހުރި ހުރަސްތަކާއި އެފަދަ ބައެއް މިސާލުތައް ފާހަގަކުރައްވަމުން ފަޒްނާ ވިދާޅުވީ ފިރިހެނުން ގޭގެ ޒިންމާތަކުގައި ހިއްސާވާނަމަ ހަމަހަމަކަމަށް ހުރި ހުރަސްތައް ނައްތާލެވޭނެ ކަމަށެވެ. އަދި އަންހެނުން އުފުލަން ޖެހޭ ބުރަ ޒިންމާތައް އިންސާފުވެރިކަމާއެކު ކުޑަކުރެވޭނެ ކަމަށް ވެސް ވިދާޅުވި އެވެ.
"ނިންމުންތައް ނިންމުމުގައި އަންހެނުންގެ ފުރިހަމަ ބައިވެރިވުން އޮންނަންޖެހޭ. ސަބަބަކީ އޭގެ އެންމެ މުހިންމު ބޭނުމަކީ ފިރިހެނެއްގެ ނަޒަރުން ވިސްނިފައިނުވާ ތަޖުރިބާ ކޮށްފައިނުވާ އެތައް ކަމެއް އަންހެނެއްގެ ނަޒަރުން ވިސްނައި، ކަންކަން ނިންމުމުގައި އެކަންކަން ހިއްސާވެގެން ދިއުން،" ފަޒްނާ ވިދާޅުވި އެވެ.
މީގެ އިތުރުން އެކަމަނާ ވިދާޅުވީ އަންހެނުން ވަކާލާތު ކުރަނީ އަންހެންވަންތަކަން މަތީ ތިބެ މުޖުތަމައުގެ ތަރައްގީގައި ބަސްބުނުމަށް ޖާގަދިނުމަށާއި އަގު ވަޒަން ކުރުމާއި އަދި ވަޒީފާ އަދާކުރަމުން ގޭގައި ޒިންމާއަދާކުރާއިރު އެ ޒިންމާތައް ނެގުމުގައި ފިރިހެނުންގެ ހިއްސާވުމަށް ކަމަށެވެ.
ރޭގެ ޖަލްސާގައި މި އަހަރުގެ ރެހެންދި އެވޯޑް ހާސިލުކުރި ނުވަ މީހަކަށް ވަނީ އެވޯޑް ހަވާލުކޮށްފަ އެވެ. އެވޯޑް ހަވާލުކޮށްދެއްވާފައި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ. އަދި އެ އެވޯޑް ހާސިލުކުރެއްވި އަންހެނުންނަށް ބްރޫޗް ހަވާލުކޮށްދެއްވީ މެޑަމް ފަޒްނާ އެވެ.
