މާލެ ސަރަހައްދަށް ޒަމާނުއްސުރެ ދިމާވެފައިވާ ބޯހިޔާވަހިކަމުގެ ދަތިކަން ހައްލުކުރުމަށް މި ސަރުކާރުން އިއުލާނުކޮށް ފަށާފައިވާ އެއްވެސް ފްލެޓު މަޝްރޫއެއް މި ދައުރުގެ ތެރޭގައި ނުނިމޭނެކަން ހައުސިން މިނިސްޓްރީން ރައްޔިތުންގެ މަޖިލީހާ ހިއްސާކޮށްފައިވާ މައުލޫމާތުތަކުން ހާމަވީ އިއްޔެ އެވެ.

މާލެ ސަރަހައްދަށް އަމާޒުކޮށް ސަރުކާރުން ކުރިއަށް ގެންދާ އަދި ރާވާފައިވާ ބޯހިޔާވަހިކަމުގެ މަޝްރޫއުތަކަށް ބޭނުންވާ ފަންޑިންގެ މައުލޫމާތާއި މިހާރު މަސައްކަތް ގޮސްފައިވާ ހިސާބު ސާފުކުރުމަށް މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ކުރެއްވި ސުވާލަށް ލިޔުމުން އިއްޔެ ފޮނުއްވި ޖަވާބުގައި ހައުސިން މިނިސްޓަރު މުހައްމަދު އަސްލަމް ވަނީ އެ މައުލޫމާތުތައް ހިއްސާކުރައްވާފަ އެވެ.

އަސްލަމް އިއްޔެ ހިއްސާކުރެއްވި މައުލޫމާތުތަކަށް ބަލާއިރު، މި ސަރުކާރުން ކުރިޔަށް ގެންދާ 5000 ހައުސިން ޔުނިޓް މަޝްރޫއުގެ ތެރެއިން 2000 ފްލެޓް ހަވާލު ކޮށްފައި ވަނީ ޖޭއެމްސީ އިންޑިއާ ލިމިޓެޑްއާ އެވެ.

އޭގެ ތެރޭގައި ކައުންސިލް ހައުސިންގެ 600 ޔުނިޓާއި އެފޯޑަބަލް 1،400 ހިމެނޭއިރު، މަސައްކަތް ފެށުމަށް މިދިޔަ އަހަރު ނޮވެމްބަރު މަހު ސައިޓް ހަވާލު ކޮށްފައިވީ ނަމަވެސް، މަޝްރޫއު ނިމޭނެ ކަމަށް ލަފާކުރެވެނީ 2025 ވަނަ އަހަރެވެ.

އިތުރު 2،000 ހައުސިން ޔުނިޓް އެޅުމަށް އެންބީސީސީ އިންޑިއާ ލިމިޓެޑް ނަމަކަށް ކިޔާ ކުންފުންޏަކާ ހަވާލު ކޮށްފައިވާ ކަމަށާއި އޭގައި ވެސް ހިމެނެނީ 600 ކައުންސިލް ހައުސިން ޔުނިޓާއި 1،400 އެފޯޑަބަލް ރޭންޖުގެ ޔުނިޓުތައް ކަމަށް މިނިސްޓަރު އިއްޔެ ވިދާޅުވި އެވެ.

އެ ބިންތައް މިދިޔަ އަހަރު ޑިސެމްބަރުގައި ހަވާލު ކޮށްފައިވާއިރު، އެ މަޝްރޫއު ނިމޭނީ 2024 ވަނަ އަހަރު ކަމަށް ގައި ކަމަށް އަސްލަމް އިއްޔެ ވިދާޅުވެފައި ވެއެވެ.

މީގެ އިތުރުން 120 ކައުންސިލް ޔުނިޓާއި އެފޯޑަބަލް ރޭންޖުގެ 240 ޔުނިޓް އަދި މިޑްރޭންޖުގެ 682 ޔުނިޓް ހިމެނޭ ގޮތަށް ޖުމްލަ 1،042 ފްލްޓުގެ މަޝްރޫއު އެޕޯލޯ ހޯލްޑިންގްސް އާ ވަނީ ހަވާލުކުރެވިފަ އެވެ.

އެ މަޝްރޫއު ނިމޭނެ ސީދާ ތާރީހެއް އަސްލަމް އިއްޔެ ފޮނުއްވި ޖަވާބުގައި ހިމަނާފައިނުވި ނަމަވެސް، އެ މަސައްކަތް ވެސް ނިމޭނީ 2024 ގައި ކަމަށް ސަރުކާރުން މީގެ ކުރިން ވަނީ ބުނެފަ އެވެ.

މި ސަރުކާރުން ހާއްސަކޮށް މާލޭ ސަރަހައްދުގައި ކުރިއަށް ގެންދާ ބޯހިޔާވަހިކަމުގެ މަޝްރޫއުތައް ލަސްވަމުންދާތީ މީގެ ކުރިން ވެސް ސަރުކާރަށް ވަނީ ބޮޑެތި ފާޑުކިޔުންތައް އަމާޒުވެފަ އެވެ.

މި ސަރުކާރުގެ ބާކީ އޮތް ދޮޅު އަހަރެއްހާ ދުވަހުގެ ތެރޭގައި، އޭގެ ތެރެއިން އެއްވެސް ފްލެޓް މަޝްރޫއުއެއް ނުނިމޭނެކަން ހާމަވެފައިވީ ނަމަވެސް، މާލޭ ސަރަހައްދުން ދޫކުރަން ނިންމާފައިވާ ގޯތިތަކުގެ ތެރެއިން ހުޅުމާލޭން ދޫކުރަން ނިންމާފައިވާ 1،000 ގޯތި ދޫކުރާނެ ސަރަހައްދު ކަނޑައެޅި، ގޯތިތަކަށް ކުރިމަތިލުމުގެ ފުރުސަތު އަންނަ ޖޫން މަހުގެ ނިޔަލަށް ހުޅުވާލާނޭ ކަމަށް އަސްލަމް އިއްޔެ މަޖިލީހަށް ފޮނުއްވި ލިޔުމުގައި ވަނީ ވިދާޅުވެފަ އެވެ.

ބައެއް މުހިންމު ހަބަރުތައް

• ކޮވިޑުގެ ސަބަބުން 2020 ވަނަ އަހަރުގެ ރޯދަ މަހު އިސްލާމިކް ސްޓޫޑިއޯ އިން ގެނެސްދިން ޕްރޮގްރާމްތައް ތައްޔާރު ކުރުމަށް އިސްލާމިކް މިނިސްޓްރީ ގައި ލޮކްޑައުންވި މުވައްޒަފުން ކޮށްފައިވާ މަސައްކަތާއި މަސައްކަތުގެ ހާޒިރީ ނުބަލަހައްޓައި އިތުރުގަޑީގެ ފައިސާ ދީފައިވާ ކަމަށް އެ މިނިސްޓްރީގެ މާލީ އޮޑިޓް ރިޕޯޓުން ހާމަވިކަން ރިޕޯޓުކުރީ އިއްޔެ އެވެ.

• މާލެ ސަރަހައްދަށް ޒަމާނުއްސުރެ ދިމާވެފައިވާ ބޯހިޔާވަހިކަމުގެ ދަތިކަން ހައްލުކުރުމަށް މި ސަރުކާރުން އިއުލާނުކޮށްފައިވާ މަޝްރޫއުތަކުގެ ތެރެއިން، ހުޅުމާލޭން ދޫކުރަން ނިންމާފައިވާ 1،000 ގޯއްޗަށް ކުރިމަތިލުމަށް އަންނަ ޖޫން މަހުގެ ނިޔަލަށް ހުޅުވާލާނެ ކަމަށް ހައުސިން މިނިސްޓަރު މުހައްމަދު އަސްލަމް ހާމަކުރެއްވީ އިއްޔެ އެވެ.

• ގިނަ ދަރިވަރުން އެއްތަންވާ ދަނޑިވަޅެއް ބަލައި، ތ. ތިމަރަފުށީ މަދުރުސާގެ ލެބޯޓަރީ ގޮއްވާލާ، އެ ކުދިން މަރާލަން މަސައްކަތް ކުރި ކަމަށް ތުހުމަތު ކުރެވޭ މައްސަލައިގައި ހިމެނޭ ގިނަ ހެކިތައް ދައުލަތުން އެދުނު ގޮތަށް ސިއްރު ނުކުރުމަށް ކްރިމިނަލް ކޯޓުން ނިންމީ އިއްޔެ އެވެ.

ދުވަހުގެ ކޯޓޭޝަން

މިނިސްޓްރީ އޮފް އާޓްސް އެންޑް ކަލްޗާގެ ޑިރެކްޓަރު ޝަމްއޫން "ލޫކަސް" ޖަލީލާ ދިމާލަށް ހަޑިހުތުރު ބަހުން މުއާމަލާތްކޮށް ސޯޝަލް މީޑިއާ ޕްލެޓްފޯމް ޓުވިޓާގައި އޭނާގެ އެކައުންޓުން ލިޔުނީ އެހެން މީހަކު ކަމަށް ހާމަކުރަމުން ރައީސް އޮފީހުގެ ޗީފް އޮފް ސްޓާފް އަލީ ޒާހިރު އިއްޔެ ވިދާޅުވީ:

"މިއީ ކުރިއަށް އޮތް އެމްޑީޕީގެ އެތެރޭގެ އިންތިހާބުގައި އަޅުގަނޑު ރޯލެއް އޮތްކަން ދެއްކުމުގެ ބޭނުމުގައި ކޮށްފައި އޮތް އަމަލެއް ކަމަށް ބެލެވޭ"

ދުވަހުގެ ފޮޓޯ

އެއްލައިދޫ ރިސޯޓުގެ ކައްކާ މަރާލި ކަމަށް ތުހުމަތު ކުރެވޭ ޖަޔަލަތު ކްރިމިނަލް ކޯޓުގެ އަޑުއެހުމަށްފަހު ޖަލަށް ގެންދަނިކޮށް: އޭނާއަށް ކުރާ ދައުވާތަކަށް އިންކާރުކުރަމުން ބުނީ މަރާލީ ގަސްތުގައި ނޫން ކަމަށް -- ފޮޓޯ: ހުސައިން އަރުބާން ފައްވާޒް / އަދަދު

ދިރާސާތަކުން ކިޔާލުމަށް

"އަ ކޮމްޕްރިހެންސިވް ހައުސިން މާކެޓް ސްޓަޑީ ފޯ ގްރޭޓާ މާލެ ރީޖަން"

މިއީ ގްރޭޓާ މާލެ ސަރަހައްދުގައި ދިިރިއުޅޭ މީހުން ބޯހިޔާވަހިކަމަށް ބޭނުން ޖެހިފައިވާ މިންވަރާއި އެ މީހުންނަށް ބޯހިޔާވަހިކަން ފޯރުކޮށްދެވޭނެ ގޮތްތަައް ހޯދުމުގެ ގޮތުން ގައުމީ ޔުނިވާސިޓީ އާއި އިސްލާމިކް ޔުނިވާސިޓީ އަދި ހައުސިން ޑިވެލޮޕްމަންޓް ކޯޕަރޭޝަން ގުޅިގެން ކޮށްފައިވާ ދިރާސާއެކެވެ.