ތާނައިން ލިޔެފައި ހުންނަ ލިޔުންތައް ލޯފަން ކުދިންނަށް އަޑު އެހޭނެ ކޮމްޕިއުޓާ އެޕްލިކޭޝަނެއް ސަރުކާރުން އިއްޔެ ތައާރަފްކޮށްފި އެވެ.
"ޝާމިލު އަޑު" ގެ ސަބަބުން ހުރިހާ ކުދިންނަށް ވެސް އެއް ހަމައެއްގައި ތައުލީމް ފޯރުކޮށްދިނުމަށް ފަހިވާނެ ކަމަށް އެ ސޮފްޓްވެއާ ތައާރަފްކުރުމަށް ބޭއްވި ހަފްލާގައި ވާހަކަ ދައްކަވަމުން ނައިބު ރައީސް ފައިސަލް ނަސީމް ވިދާޅުވި އެވެ.
"ޝާމިލް މިވަނީ އެހެން ހުރިހާ ކުދިންނާއި އެކު، ބައިވެރިކުރުވައިގެން ތައުލީމް ފޯރުކޮށްދިނުމަށް އަދި މި ދެންނެވި ގޮތަށް އެކިއެކި ހަރަކާތްތަކާއި އެހެނިހެން ހަރަކާތްތަކުގައި ބައިވެރިކުރުވުން. އުންމީދަކީ މިއަދު ތައާރްފްކުރެވިގެން ދިޔަ ސްކްރީން ރީޑިންގް ސޮޕްޓްވެއާއާއި އެކު ގިނަ ގުނަ ފުރުސަތުތައް ފަހިވެގެން ދިއުން،" އެމަނިކުފާނު އެވެ.
"ޝާމިލް އަޑު" ގިނަ ޕްލެޓްފޯމްތަކަށް ސަޕޯޓް ކުރާނެ ކަމަށް އެޑިއުކޭޝަން މިނިސްޓްރީން ބުނެ އެވެ. އެގޮތުން ޑެސްކްޓޮޕާއި އެންޑްރޮއިޑާއި އައިއޯސްއަށް ވެސް އެ އެޕްލިކޭޝަން ސަޕޯޓް ކުރާނެ ކަމަށް ޑިވެލޮޕަރުން ބުންޏެވެ. އަދި ސޮފްޓްވެއާ ފަރުމާކޮށްފައި ހުންނާނީ ލޯފަން ކުދިންނަށް ފަސޭހައިން ބޭނުން ކުރެވޭނެ ގޮތަށް ކަމަށް ވެސް އެ މިނިސްޓްރީން ބުނެ އެވެ.
އެ ސޮފްޓްވެއާ ތައާރަފް ކުރުމަށް ބޭއްވި ހަފްލާފައި އިތުރަށް ވާހަކަ ދައްކަވަމުން ނައިބު ރައީސް ވިދާޅުވީ، "ޝާމިލް އަޑު" ވެގެންދާނީ، ނުކުޅެދުންތެރިކަން ހުންނަ ކުދިންގެ މެދުގައި އޮތް ފަރަގު ނައްތާލުމަށް އެޅޭ ފިޔަވަޅަކަށް ކަމަށެވެ.
ޝާމިލުއަޑަކީ އިންޓަނެޓް ކަނެކްޝަންއެއް ނެތި ވެސް ބޭނުން ކުރެވޭނެ އެޕްލިކޭޝަނެކެވެ. އަދި ކޮޕީ ޕޭސްޓްކޮށް ދިވެހި ލިޔުންތައް ކިޔުމަށް މިސޮފްޓްވެއާ ބޭނުންކުރެވުމުގެ އިތުރުން އެންޑްރޮއިޑް ޓޯކްބެކް ސާވިސްއާއެކު ސިސްޓަމް ޓީޓީއެސް ސާވިސްއެއްގެ ގޮތުގައި ވެސް އެ ސޮފްޓްވެއާ ބޭނުން ކުރެވޭނެ ކަމަށް އެޑިއުކޭޝަން މިނިސްޓްރީން ބުންޏެވެ.
