ރަޝިއާގެ ކޮސްމޮނޯޓުން ޔޫކްރެއިންގެ ގައުމީ ކުލަތަކުގައިވާ ސޫޓު ލައިގެން ބައިނަލްއަގްވާމީ ޖައްވީ ސްޓޭޝަން (އައިއެސްއެސް) އަށް ހިނގައްޖެ އެވެ.
ހޮނިހިރު ދުވަހު އައިއެސްއެސްއަށް ދިޔަ ތިން ފިރިހެނުންނަކީ މިދިޔަ މަހު ރަޝިއާއިން ޔޫކްރެއިންގައި ހަނގުރާމަ ފެށި ފަހުން ޖައްވީ ސްޓޭޝަނަށް ދަތުރު ކުރި ފުރަތަމަ މީހުންނެވެ.
އައިއެސްއެސްގައި ތިބި އެހެން ފަރާތްތަކުން ވަނީ އެ ތިން މީހުންނަށް ވަރަށް ހޫނު މަރުހަބާއެއް ކިޔައިފަ އެވެ. ޖައްވީ ސްޓޭޝަނަށް ދަތުރު ކުރި ތިން މީހުންނަކީ ޑެނިސް މެޓްވެޔޭވް، އޯލެގް އާރްޓެމްޔޭވް އަދު ސާގެއި ކޮރްސަކޯވް އެވެ.
ރަޝިއާގެ ތިން ކޮސްމޮނޯޓުން ޖައްވަށް ތިން ގަޑިއިރުގެ ދަތުރު ފެށީ ކަޒަކިސްތާނުގައި ރަޝިއާއިން ހިންގާ ފެސިލިޓީއަކުންނެވެ.
އެ މީހުން ދަތުރު ކުރި އުޅަނދު ކާމިޔާބުކަމާ އެކު އައިއެސްއެސްގައި ޖެއްސުމާ އެކު، ރަޝިއާގެ މިޝަން ކޮންޓްރޯލުން އެކަމަށް މަރުހަބާ ކިޔެވެ.
އޭގެ ގަޑިއިރުތަކެއް ފަހުން، ތިން ކޮސްމޮނޯޓުން އައިއެސްއެސްގެ ތެރެއަށް ފްލޯޓްވި އިރު، އެންމެން ވެސް ތިބީ ރީނދުލާއި ނޫ ކުލައިގެ ސޫޓު ލައިގެންނެވެ.
ރަޝިއާގެ ކޮސްމޮނޯޓުންގެ ޔުނިފޯމްގެ ކުލަޔަކީ ހަމައެކަނި ނޫ ކުލަ އެވެ. ކޮސްމޮނޯޓުން ދުނިޔެއިން ދަތުރު ފެށުމުގެ ކުރިން ތިބީ ނޫ ސޫޓުގައި ކަމަށް ބައެއް ރިޕޯޓުތައް ބުނެ އެވެ.
އެ މީހުން އައިއެސްއެސްގެ ތެރެއަށް ފްލޯޓްވި ވަގުތު، އެމެރިކާގެ ޖައްވީ އެޖެންސީ ނާސާ އަދި ރަޝިއާގެ ޖައްވީ އެޖެންސީ ރޮސްކޮސްމޯސް އިން ދިޔައީ ވަގުތުން ދައްކަމުންނެވެ.
އައިއެސްއެސްގައި ތިބެ ލައިވްކޮށް ބޭއްވި ޕްރެސް ކޮންފެރެންސެއްގައި ކޮސްމޮނޯޓުން ބުނީ އެ މީހުން ރީނދޫ ކުލައިގެ ސޫޓު ބޭނުން ކުރީ "ގިނައިން އެ ކުލަ ލިބެން ހުރުމުން" ކަމަށެވެ.
ޔޫކްރެއިންގައި ކުރާ ހަނގުރާމައާ ދެކޮޅުކަން ހާމަކުރުމަށް ޔޫކްރެއިންގެ ގައުމީ ކުލަތައް ބޭނުން ކުރަމުންދާ ދަނޑިވަޅެއްގައި ރީނދޫ ކުލަ ބޭނުން ކުރަން "މަޖުބޫރުވީ" ކަމަށް ބުންޏެވެ.
"ބައެއް ފަހަރު ރީނދޫ ކުލައަކީ ހަމަ ރީނދޫ ކުލަ،" ރޮސްކޮސްމޯސްގެ ޓެލެގްރާމް ޗެނަލްގައި ބުންޏެވެ.
އޭގެ އިތުރުން ސޫޓު ހަދާފައި ވަނީ ތިން ކޮސްމޮނޯޓުން ތައުލީމް ހާސިލް ކުރި ބޯމެން މޮސްކޯ ސްޓޭޓް ޓެކްނިކަލް ޔުނިވާސިޓީގެ ރަސްމީ ކުލައިން ކަމަށާއި "ހުރިހާ ތަނަކާއި އެއްޗަކުން ޔޫކްރެއިންގެ ދިދަ ފެނުމަކީ މޮޔަ ކަމެއް" ކަމަށް ރޮސްކޮސްމޯސްއިން ބުންޏެވެ.
ރަޝިއާގެ ތިން ކޮސްމޮނޯޓުން ޖައްވަށް ދިޔައީ ހަ މަހުގެ މިޝަނެއްގަ އެވެ. އެ މީހުންގެ ބަދަލުގައި، މި ވަގުތު އައިއެސްއެސްގައި ތިބި ތިން އެސްޓްރޮނޯޓަކު މާޗް 30 ގައި އެނބުރި ދުނިޔެއަށް އަންނާނެ އެވެ.
ޖައްވަށް ދަތުރު ކުރާ ފަރާތްތަކަށް ބޭނުން ކުރާ ލަފްޒަކީ "އެސްޓްރޮނޯޓް" ނަމަވެސް، އެމެރިކާ އާއި ނޭޓޯ ގައުމުތަކުގެ މީހުންނާއި ރަޝިއާގެ މީހުން ވަކި ކުރުމަށް، ރަޝިއާއިން ޖައްވަށް ދާ މީހުންނަށް ކިޔަނީ "ކޮސްމޮނޯޓް އެވެ. ރަޝިއާ ބަހުން "ކޮސްމޯސް" ގެ މާނައަކީ ޖައްވެވެ.
