އުރީދޫ ދިވެހި ޕްރިމިއާ ލީގުގައި މިއަދު ހަވީރު ކްލަބް ގްރީން ސްޓްރީޓްސް 4-2 އިން ބަލިކޮށް ކްލަބް އީގަލްސް އިން ފުރަތަމަ ބުރުގައި ދެ ވަނަ މަގާމު ދަމަހައްޓައިފި އެވެ.
މިއަދުގެ ނަތީޖާއާ އެކު އީގަލްސް އިން ވަނީ ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާ ދެ ޕޮއިންޓަށް ގާތަށް ޖެހިލައިފަ އެވެ. މާޒިޔާ އަށް ހަ މެޗުން 18 ޕޮއިންޓް ލިބިފައިވާއިރު، ދެ ވަނައިގައި އީގަލްސް އޮތީ ހަތް މެޗުން 16 ޕޮއިންޓާ އެކު އެވެ. މިރޭ ލީގުގެ ފުރަތަމަ ބުރުގެ ފަހު މެޗުގައި ވެލެންސިއާ އާއި މާޒިޔާ ބައްދަލުކުރާނެ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި އީގަލްސް އިން ވަނީ ފުރަތަމަ ހަތް މިނިޓް ތެރޭ ދެ ގޯލު ޖަހައިފަ އެވެ. މެޗުގެ ފަސް ވަަނަ މިނިޓްގައި އީގަލްސް އިން ލީޑުނެގީ އަހުމަދު ހަސަން (އައްމަޑޭ) ޖެހި ގޯލުންނެވެ. އީގަލްސްގެ ހަސަން ރާއިފް އަހުމަދު (ހަންނަ) ފުރަތަަމަ ދޭން އުޅުނީ އެ ޓީމުގެ އަހުމަދު ރިޒްވާން (ރިޒޭ) އަށެވެ. އެކަމަކު، ގްރީން ސްޓްރީޓްސްގެ ޑިފެންޑަރަކު ފައިގައި ޖެހިފައި ދެ ވަނަ ފަހަރަށް ލިބުމުން ހަންނަ ހުރަސްކުރީ ހުސްކޮށް ހުރި އައްމަޑޭ އެވެ. އައްމަޑޭ ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
ގްރީން ސްޓްރީޓްސްގެ ފަރުއްކޮ (ކ) ކައިރިން އީގަލްސްގެ ހަންނަ ބޯޅަ ހިފައިގެންދަނީ.-- ފޮޓޯ: އެފްއޭއެމް
އޭގެ ދެ މިނިޓް ފަހުން އައްމަޑޭ ޖެހި ބޯޅައެއް ހުރަސްދަނޑީގައި ޖެހިފައި އީގަލްސްގެ އަބްދުﷲ ސަމީހު މޫސާ (ސަމިއްޓެ) އަށް ލިބުމުން އޭނާ ވަނީ ބޮލުން ގޯލަށް ފޮނުވާލައިފަ އެވެ.
މި ހާފުގެ ބޮޑުބައި އީގަލްސްގެ ކުޅުން ފެނުނުއިރު، ރިޒޭ ވަނީ ރަނގަޅު ދެ ހަމަލާ ފޮނުވާލައިފަ އެވެ. ރިޒޭގެ ދެ ޝޮޓް ގްރީން ސްޓްރީޓްސްގެ ކީޕަރު ހަނީފް ސާގިބް ވަނީ މަތަކޮށްފަ އެވެ.
ދެ ކާޑު ހަަމަވުމުގެ ސަބަބުން އައި ސަސްޕެންޝަނާ ހެދި ގްރީން ސްޓްރީޓްސްގެ ކެޕްޓަން ރިލްވާން ވަހީދު (ރިލޭ) ނުކުޅެ އެވެ. ދެ ވަނަ ހާފު ފަށައިގެން ގްރީން ސްޓްރީޓްސް އިން ރަނގަޅަށް ކުޅެ ގޯލެއް ޖެހި އެވެ. މެޗުގެ 54 ވަނަ މިނިޓްގައި ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) ވަނީ ހަމަޖެހިފައި ގޯލަށް ބޯޅަ ފޮނުވާލައިފަ އެވެ.
ގްރީން ސްޓްރީޓްސް އިން މެޗުގެ ތެރެއަށް ވަދެ ހަމަޖެހިނުލެވެނިސް އީގަލްސް އިން ގާތްގާތުގައި ދެ ގޯލު ޖެހި އެވެ. މި ދެ ގޯލު ވެސް ޖެހީ ރިޒޭ އެވެ. ތިން މިނިޓް ތެރޭ ރިޒޭ ދެ ގޯލު ޖެހިއިރު، ފުރުސަތު ތަނަވަސްކޮށްދިނީ ހަންނަ އާއި އައްމަޑޭ އެވެ.
މެޗުގެ 76 ވަނަ މިނިޓްގައި ގްރީން ސްޓްރީޓްސް އިން ވަނީ ދެ ވަނަ ގޯލެއް ޖަހައިފަ އެވެ. މިއީ ޗޯޓު އަށް އީގަލްސްގެ ކީޕަރު ލެބަނަންގެ މުހައްމަދު ތާހާ ކުރި ފައުލަކަށް ދިން ޕެނަލްޓީ އަކުން ގްރީން ސްޓްރީޓްސްގެ ސްޕެއިން މިޑްފީލްޑަރު އެންހެލް ކަރަސްކޯސާ މުނޯޒް ޖެހި ގޯލުންނެވެ. އޭގެ މިނިޓެއް ފަހުން ޗޯޓު އަށް ވަނީ ގޯލެއް ޖަހަން ރަނގަޅު ފުރުސަތެއް ލިބި ބޭނުންނުކުރެވިފަ އެވެ.
އިތުރު ގޯލެއް ޖަހައި މެޗުގެ ތެރެއަށް ވަަދެވޭތޯ ގްރީން ސްޓްރީޓްސް އިން ކުރި މަސައްކަތުގައި 86 ވަނަ މިނިޓްގައި އެ ޓީމުގެ ބެލްޖިއަމް މިޑްފީލްޑަރު ޖޯޑީ ބާޓީ ޖެހި ހިލޭ ޖެހުން ދިޔައީ އަރިމަތިން ބޭރުންނެވެ. އޭގެ ފަހުން އީގަލްސްގެ ރިޒޭ ހެޓްރިކެއް ހަދަން ލިބުނު ފުރުސަތުގެ ބޭނުން ނުހިފުނެވެ.
