މުސްތަގްބަލުގައި ރަޝިއާ އާއި ޔޫކްރެއިނުން އެއްބަސްވުމަކަށް ދާ ނަމަ ތުރުކީން "ގެރެންޓާ" އެއްގެ ދައުރު އަދާ ކުރުމަށް ޔޫކްރެއިނުން އެދެފި އެވެ.
ތުރުކީގެ އިތުރުން އދ. ގެ ސަލާމަތީ މަޖިލީހުގެ ދާއިމީ މެމްބަރުންނާއި ޖަރުމަނުވިލާތް ވެސް "ގެރެންޓާ" އަކަށް ވުމަށް ޔޫކްރެއިނުން އެދެ އެވެ.
"ޔޫކްރެއިނުގެ އެދުމަށް ރަޝިއާއިން ދެކޮޅު ހަދާ ކަމަކަށް ނުފެނޭ. އެހެންވީމާ، ތުރުކީއިން އެ އެދުމާ އެއް ގޮތަށް އަމަލު ކުރުން އެކަށީގެންވޭ،" ތުރުކީގެ ފޮރިން މިނިސްޓަރު މެވްލުތް ކަވުސޮގްލޫ ޔޫކްރެއިންގެ ލްވިވް ސިޓީއަށް ވަޑައިގެން ވިދާޅުވި އެވެ.
ކަވުސޮގްލޫ އާއި ރަޝިއާގެ ފޮރިން މިނިސްޓަރު ސާގެއި ލެވްރޯވް މިދިޔަ ބުދަ ދުވަހު ބައްދަލުކުރެއްވި އެވެ.
އދ. ގެ ސަލާމަތީ މަޖިލީހުގެ ދާއިމީ މެމްބަރުންނަކީ ޗައިނާ، ފްރާންސް، ރަޝިއާ، އިނގިރޭސިވިލާތް އަދި އެމެރިކާ އެވެ.
ކަވުސޮގްލޫ ވިދާޅުވީ ރަޝިއާ އާއި ޔޫކްރެއިންގައި ކުރިއަށް ގެންދިޔަ މަޝްވަރާތަކަށް ފަހު ހަމަލާތައް ހުއްޓުމަކަށް އައުމުގެ ފުރުސަތު ބޮޑުވަމުންދާ ކަމަށެވެ.
ތުރުކީގެ ރައީސް ތައްޔިބް އުރުދުގާން ވެސް ބުރާސްފަތި ދުވަހު ވަނީ ރަޝިއާގެ ރައީސް ލެޑިމިއަ ޕުޓިންއާ ފޯނުން ގުޅުއްވައި މަޝްވަރާ ކުރައްވާފަ އެވެ.
އުރުދުގާން ވިދާޅުވީ ޕުޓިން އާއި ޔޫކްރެއިންގެ ރައީސް ވޮލޮޑިމިރް ޒެލެންސްކީއާ ދެމެދު ސީދާ ބައްދަލުވުމެއް ތުރުކީގެ އަންކާރާ ނުވަތަ އިސްތަންބޫލްގައި ބޭއްވިދާނެ ކަމަށެވެ.
އެފަދަ ބައްދަލުވުމަށް މީގެ ކުރިން ވެސް އުރުދުގާން ވަނީ ޕުޓިންއަށް ދައުވަތު އަރުވާފަ އެވެ. އޭގެ އިތުރުން ހަނގުރާމައިން ސަލާމަތް ވާން މަސައްކަތް ކުރާ އާއްމުން ސިޓީތަކުން ދެވޭނެ މަގުފަހިކޮށްދިނުމުގެ މުހިއްމުކަން ވެސް އުރުދުގާން ފާހަގަކުރެއްވި އެވެ.
ޔޫކްރެއިނާއި ރަޝިއާއާ އެކު ވެސް ގާތް ގުޅުމެއް އޮންނަނީ ތުރުކީން މަސައްކަތް ކުރަނީ ޔޫކްރެއިން ހަނގުރާމައިގެ މައްސަލައިގައި ސުލްހަ ގެންނާނެ މެދުވެރިއެއްގެ ދައުރު އަދާ ކުރުމަށެވެ.
މިދިޔަ ހަފްތާގައި ދެ ގައުމުގެ ފޮރިން މިނިސްޓަރުންގެ މެދުގައި ސީދާ ބައްދަލުވުމެއް ވެސް ބޭއްވީ ތުރުކީގެ އަންތާލްޔާ ސިޓީގަ އެވެ.
