ޔޫކްރެއިންގެ ރައީސް ވޮލޮޑިމިރް ޒެލެންސްކީ ބުދަ ދުވަހުގެ ރޭ އެމެރިކާގެ ކޮންގްރެސްގައި ދެއްވި ތަގުރީރުގައި 2001 ވަނަ އަހަރު އެމެރިކާއަށް އަމާޒުވި ޓެރަރިސްޓް ހަމަލާތަކުގެ ހަނދާން އާ ކުރުމަށް ގޮވާލައްވައި، އިތުރު އަސްކަރީ އެހީއަށް އެދިވަޑައިގެންފި އެވެ.
ވީޑިއޯ މެދުވެރިކޮށް ދެއްވި ތަގުރީރުގައި ޒެލެންސްކީ ވިދާޅުވީ ރަޝިއާގެ ސިފައިންނާ ދެކޮޅަށް ކުރާ ހަނގުރާމައިގެ ކޮންމެ ދުވަހަކު ވެސް ސެޕްޓެމްބަރު 11، 2001 ގައި އެމެރިކާއަށް ދިމާވި ޓެރަރިސްޓް ހަމަލާތައް ފަދަ ދުވަހެއް ކަމަށެވެ.
ސެޕްޓެމްބަރު 11، 2001 ގެ އިތުރުން 1941 ވަނަ އަހަރުގެ ޕާލް ހާބާ ހަމަލާ ހަނދާން ކުރުމަށް ޒެލެންސްކީގެ ތަގުރީރުގައި ގޮވާލެއްވި އެވެ.
ޔޫކްރެއިންގެ މަތިން އުދުހުން މަނާ "ނޯ ފްލައި" ޒޯނެއް ކަނޑައެޅުމަށް ގޮވާލާ ގޮވާލެއްވުން ތަކުރާރުކޮށް، ޒެލެންސްކީ ވިދާޅުވީ "ވައިގެ ސަރަހައްދު ހިމާޔަތް ކުރަން ޖެހޭ" ކަމަށެވެ.
މީގެ ކުރިން ވެސް އުދުހުން މަނާ ޒޯނެއް ކަނޑައަޅަން ނޭޓޯއަށް ގޮވާލެއްވި ނަމަވެސް، ނޭޓޯއިން ވަނީ އެފަދަ ފިޔަވަޅެއް ނޭޅޭނެ ކަމަށް ބުނެފަ އެވެ.
ޔޫކްރެއިން މަތިން "ނޯ ފްލައި" ޒޯނެއް ކަނޑައަޅައިފި ނަމަ، އެ ސަރަހައްދަށް ވަންނަ ރަޝިއާގެ އުޅަނދުތަކަށް އިންޒާރު ދީ، ހަމަލާ ދިނުމުގެ ބާރު ނޭޓޯއަށް އޮންނާނެ އެވެ.
"ނޯ ފްލައި" ޒޯނެއް ކަނޑަނޭޅޭ ނަމަ، އޭގެ ބަދަލުގައި ވައިގެ ސަރަހައްދު ދިފާއު ކުރަން ބޭނުންވާ ނިޒާމްތަކާއި ވައިގެ އުޅަނދުތައް ފޯރުކޮށްދިނުމަށް ޒެލެންސްކީ އެދިވަޑައިގެންނެވި އެވެ.
މީގެ ކުރިން އެމެރިކާ އާއި އީޔޫގައި ޒެލެންސްކީ އެދިވަޑައިގެންނެވީ ޕޮލޭންޑްގައި ހުރި މިގް-29 ހަނގުރާމަ މަތީ ޖެޓުތައް ދިނުމަށެވެ. ނަމަވެސް އެއީ ހަނގުރާމައިގެ ތެރެއަށް ނޭޓޯ ގައުމުތަކަށް ވަންނަން ދިމާވެދާނެ ހާލަތަކަށް ވާތީ، އެމެރިކާގެ ރައީސް ޖޯ ބައިޑެން އެކަމާ ދެކޮޅެވެ.
ތަގުރީރުގެ ތެރެއިން ޒެލެންސްކީ ވަނީ ރަޝިއާއިން ޔޫކްރެއިންގެ ސިޓީތަކަށް ދޭ މިސައިލް ހަމަލާތަކާއި އޭގެ ސަބަބުން އަނިޔާވާ އަދި މަރުވާ މީހުންގެ މަންޒަރުތައް ފެންނަ ވީޑިއޯއެއް ދައްކާލައްވާފަ އެވެ.
"އަޅުގަނޑުގެ އުއްމީދަކީ މަނިކުފާނު ދުނިޔޭގެ ލީޑަރަށް ވެވަޑައިގެންނެވުން. ދުނިޔޭގެ ލީޑަރަށް ވުމުގެ މާނައަކީ ސުލްހައިގެ ލީޑަރަށް ވުން،" ސީދާ ބައިޑެންއަށް މުހާތަބު ކުރައްވައި ޒެލެންސްކީ ވިދާޅުވި އެވެ.
ޔޫކްރެއިނަށް އަސްކަރީ އެހީގެ ގޮތުގައި އިތުރު 800 މިލިއަން ޑޮލަރު ފޯރުކޮށްދިނުމުގެ ލިޔުމުގައި ބައިޑެން ވަރަށް އަވަހަށް ސޮއިކުރައްވާނެ އެވެ.
