ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމަށް އދ.މާމިގިލި، ރަންގިރިޓީގެ، އިބްރާހިމް ރަޝީދު އަބޫބަކުރު (މާމިގިލި އިބޫ) އައްޔަނުކޮށްފި އެވެ.
މިހާރު އުވާލާފައިވާ ގްރޭޓާ މާލެ އިންޑަސްޓްރިއަލް ޒޯން (ޖީއެމްއައިޒެޑްއެލް) ކުންފުނީގެ މެނޭޖިން ޑިރެކްޓަރުކަން ވެސް ކުރައްވާފައިވާ އިބޫ އެ މަގާމަށް އައްޔަން ކުރެއްވީ މިއަދު އެވެ.
އޭނާ ވަނީ އިނގިރޭސި ވިލާތުގެ ބޯލްޓަން ޔުނިވާސިޓީން ބިޒްނަސް އެޑްމިނިސްޓްރޭޝަންގެ ދާއިރާ އިން މާސްޓާސް ޑިގްރީ ފުރިހަމަކުރައްވާފަ އެވެ.
އޭގެ އިތުރުން ހޯމް މިނިސްޓްރީގެ ނައިބުގެ މަގާމާއި މެދު އުތުރު ޕްރޮވިންސްގެ ގައުމީ އިދާރާގެ ސްޓޭޓް ސެކްރެޓަރީގެ މަގާމާ ޕްރައިވެޓް ސެކްޓަރުގެ އެކިއެކި މަގާމުތައް ވެސް އޭނާ ފުރުއްވި އެވެ.
އޭނާ އަކީ ވެރިކަން ކުރާ މައި ޕާޓީ ކަމަށްވާ އެމްޑީޕީގެ ގައުމީ މަޖިލީހުގެ މާމިގިލީ ދާއިރާގެ ރައީސް އެވެ.
ޖީއެމްއައިޒެޑްއެލްގެ އެމްޑީީގެ މަގާމުގައި ހުންނެވިއިރު ތިލަފުށީ ފަޅުގައި އޮތް ބޯޓެއް ނެގުމަށް ކޮރަޕްޝަނަށް މަގުފަހިވާ ގޮތަށް ވަކި ކުންފުންޏާކާއި ހަވާލުކުރި ކަމަށް ތުހުމަތުކުރެވޭ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން ބެލި އެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީން ވެސް އެ މައްސަލަ ބެލި އެވެ. އަދި، ބޯޓު ނައްތާލުމުގެ މަސައްކަތް ކުރުމަށް ފިނޭންސް މިނިސްޓްރީން ހުއްދަ ނުދެނީސް ގަވާއިދާ ހިލާފަށް އިބޫ އެ މަސައްކަތް ކުރެއްވި ކަމަށް ނިންމި އެވެ. ނަމަވެސް، އެ މައްސަލާގައި އޭނާ އާ ދެކޮޅަށް ފިޔަވަޅު އަޅާފައެއް ނުވެ އެވެ.
މާމިގިލީ އިބޫ އެމްޑީ ކަމުގައި ހުންނަވަނިކޮށް، އިގްތިސާދީ ގޮތުންނާއި މާލީ ގޮތުން ފައިދާ އިތުރުކޮށް އޮޕަރޭޝަނަލް އެފިޝިއެންސީ އިތުރުކުރުމުގެ ގޮތުން ޖީއެމްއައިޒެޑްއެލް އާއި އެޗްޑީސީ އެއް ކުޑައެއްގެ ދަށަށް ގެނެސް އެ ކުންފުނި އުވާލީ ސެޕްޓެމްބަރު 2020، ގަ އެވެ.
