ރ. އަތޮޅުގެ އާބާދީގެ ބޮޑުބައެއް ދިރިއުޅޭ އެ އަތޮޅުގެ ދެކުނު ސަަރަހަައްދުގައި އަޅަން ސަރުކާރުން ނިންމާފައިވާ އެއާޕޯޓްގެ މަސައްކަތް މިސަރުކާރުގެ ދައުރުގެ ތެރޭގައި ކުރިއަށްދާނެކަމުގެ ޔަގީންކަމެއް ނެތް ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެެ.
ރައްޔިތުންގެ މަޖިލީހުގައި ވަޒީރުންނާ ސުވާލުުކުރުމުގެ ވަގުތުގައި މަޑުއްވަރީ ދާއިރާގެ މެމްބަރު އާދަމް ޝަރީފް ކުރެއްވި ސުވާލަކަށް ޖަވާބުދެއްވަމުން އަަސްލަމް ވިދާޅުވީ ސަރުކާރުން ޕްލޭންކުރި އެއާޕޯޓްތަކުގެ ތެރޭގައި ރ. އަތޮޅުގައި އަޅާ އެއާޕޯޓެއް ވެސް ހިމެނޭ ކަމަށާއި އެހެން ނަމަވެސް އެ އެއާޕޯޓް އަޅާނެ ތަނެއް އަދިވެސް ނުނިންމާ ކަމަށެވެ.
"ދައުރުގައި ބާކީ، ދޮޅުއަހަރެއްހާ ދުވަސް ވެސް ނޭނގޭ އޮތްކަމެއް. ދެން މަސައްކަތް ކުރާނަން އެނގޭތޯ. އަޅުގަނޑަކަށް މާ ޔަގީންކަމާއެކީ ދަންނަވާކަށް ނޭނގޭ. މަސައްކަތް ފެށްޓުމަކީ އެކަށީގެންވާ ކަމެއް،" އަސްލަމް ވިދާޅުވި އެވެ.
ނަމަވެސް އެއާޕޯޓްތަކާ ބެހޭ ގޮތުން ވިލުފުށީ ދާއިރާގެ މެމްބަރު ހަސަަން އަފީފް ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ އިއުލާނުކޮށްފައިވާ ހަ އެއާޕޯޓްގެ މަސައްކަތް ވެސް ކުރިއަށް ގެންދާނެ ކަމަށެވެ.
ރ.އަތޮޅު ހިމެނޭ ގޮތުން ހަ އަތޮޅެއްގައި އެއާޕޯޓް އަޅާނެ ބަޔަކު ހޯދަން ސަރުކާރުން އިއުލާނު ކުރީ މިދިޔަ ޑިސެމްބަރު މަހު އެވެ. ކޮންޓްރެކްޓާ ފައިނޭންސް ކުރާ ގޮތަށް އެ އެއާޕޯޓްތައް އަޅަން ހުށަހެޅޭނެ އެންމެ ދަށް އަގު މިދިޔަ މަހު ބަދަލުކޮށް ކޮންޓްރެކްޓަރުން ހޯދަން އަލުން ހުޅުވައިލި އެވެ.
އަފީފްގެ ސުވާލަށް ޖަވާބު ދެއްވަމުން އަސްލަމް އިތުރަށް ވިދާޅުވީ ކޮންޓްރެކްޓާ ފައިނޭންސިން މޮޑެލަށް އެެއާޕޯޓްތައް އެޅޭގޮތް ނުވާ ނަމަ، ދައުލަތުގެ ބަޖެޓުން ވެސް އެ މަސައްކަތް ކުރާނެ ކަމަށެވެ.
"އިއުލާނުކޮށްފައި އޮތް ހަ އެއާޕޯޓް، އަޅުގަނޑުމެން މަސައްކަތް ކުރިއަށް ގެންދާނަން، އެއް މޮޑެލް ފޭލްވެއްޖެއްޔާ އަނެއް މޮޑެލަށް ގެންގޮސްގެން ނަމަވެސް،" މިނިސްޓަަރު ވިދާޅުވި އެވެ.
އާބާދީގައި ގާތްގަނޑަކަށް 25،000 މީހުން ތިބި ރ. އަތޮޅުގެ ގިނަ ރަށްތަކާ ދުރުގައިވާ އަލިފުށީގައި އެއާޕޯޓެއް އަަޅަން ސަރުކާރުން ވަނީ އެމްޓީސީސީއާ ހަވާލުކޮށްފަ އެވެ.
ބަޖެޓްގައި ވެސް ޖަހާފައި ނެތް އެ މަސައްކަތް ހަވާލުކުރުމުން ރ. އަތޮޅުގެ ދެކުނު ސަރަހައްދުގެ ބައެއް ރައްޔިތުން އެކަމަށް ވަރަށް ބޮޑަށް ފާޑުކިއެެވެ.
