މޮސްކޯ، ރަޝިއާ (މާޗް 15) - އެމެރިކާގެ ރައީސް ޖޯ ބައިޑެން އާއި އެހެން ގިނަ އޮފިޝަލުންތަކަށް ދަތިކުރުމުގެ ފިޔަވަޅު އަޅާފައިވާ ކަމަށް ރަޝިއާގެ ފޮރިން މިނިސްޓްރީން ބުނެފި އެވެ.
ފިޔަވަޅުތަކުގެ ދަށުން އެ މީހުންނަށް ރަޝިއާއަށް އެތެރެވުން މަނާ ވާނެ އެވެ. ބައިޑެންގެ އިތުރުން ސެކެޓްރީ އޮފް ސްޓޭޓް އެންޓޮނީ ބްލިންކެން އާއި ޑިފެންސް ސެކެޓްރީ ލޮއިޑް އޯސްޓިންއަށް ވެސް ފިޔަވަޅު އެޅި އެވެ.
ރަޝިއާ ފޮރިން މިނިސްޓްރީން ނެރުނު ބަޔާނުގައި ބުނީ އެއީ މިހާރު އޮތް އެމެރިކާ ސަރުކާރުން ގެންގުޅޭ ރަޝިއާއާ ދެކޮޅު ހަރުކަށި ސިޔާސަތަށް ރައްދު ދިނުމުގެ ގޮތުން އެޅު ފިޔަވަޅުތަކެއް ކަމަށެވެ.
މިދިޔަ މަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފަށާފައި ވާތީ، އެމެރިކާއިން ވަނީ އެ ގައުމުގެ ރައީސް ލެޑިމިއަ ޕުޓިން އާއި ފޮރިން މިނިސްޓަރު ސާގެއި ލެވްރޯވް އަށް ދަތިކޮށްފަ އެވެ.
އޭގެ އިތުރުން ދުނިޔޭގެ މާލީ ނިޒާމުން ރަޝިއާ އެކަހެރިކޮށް، ބައިނަލްއަގްވާމީ ވިޔަފާރިން ވެސް ރަޝިއާ އެކަހެރި ކުރުމަށް ގިނަ ފިޔަވަޅުތަކެއް އަޅާފައިވެ އެވެ.
ރަޝިއާއިން ދަތިކުރި މީހުންގެ ލިސްޓުގައި ދެން ހިމެނެނީ ޖޮއިންޓް ޗީފް އޮފް ސްޓާފްސްގެ ޗެއާމަން މާކް މިލީ އާއި ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން އާއި ސީއައިއޭގެ ޑިރެކްޓަރު ވިލިއަމް ބާންސް އަދި ވައިޓް ހައުސްގެ ޕްރެސް ސެކެޓްރީ ޖެން ސާކީ އެވެ.
އޭގެ އިތުރުން ވެސް ގިނަ އަދަދެއްގެ އޮފިޝަލުންނަށް ފިޔަވަޅު އަޅާފައިވާ އިރު، ބައިޑެންގެ ދަރިކަލުން ހަންޓާ އަދި ކުރީގެ ސެކެޓްރީ އޮފް ސްޓޭޓް ހިލަރީ ކްލިންޓަން ވެސް ހިމެނެ އެވެ.
ރަޝިއާގެ ފޮރިން މިނިސްޓްރީން ބުނީ ވަރަށް އަވަހަށް އިތުރު ފިޔަވަޅުތައް ވެސް އަޅާނެ ކަމަށާއި އެމެރިކާ ސަރުކާރުގެ އޮފިޝަލުންނާއި އަސްކަރީ އޮފިސަރުންނާޢި ޕާލިމެންޓް މެމްބަރުންނާއި ވިޔަފާރިވެރިންނާއި މީޑިއާ ޝަހުސިއްޔަތުންނަށް ވެސް ދަތި ކުރާނެ ކަމަށެވެ.
