އުތުރުގެ ޓޫރިޒަމަށް ސަމާލުކަން ދިނުމަކީ އިންޑިޔާއަށް ކުރައްވާ ދަތުރުގެ އަމާޒެއް ކަމަށް ޓޫރިޒަމް މިނިސްޓަރު ޑރ. އަބްދުއްﷲ މައުސޫމް ވިދާޅުވެއްޖެ އެވެ.
އިންޑިޔާގެ މުންބާއީގަ މިއަދުން ފެށިގެން ބުދަ ދުވަހުގެ ނިޔަލަށް ކުރިއަށްދާ އައުޓްބައުންޑް ޓްރެވެލް މާޓް (އޯޓީއެމް) ގައި ބައިވެރިވެ، ޓޫރިޒަމް ދާއިރާގެ ވިޔަފާރިވެރިންނަށް އަމާޒުކޮށް ފޯރަމެއް ބޭއްވުމަށް، ރާއްޖޭގެ ޓޫރިޒަމް ދާއިރާގެ ވަފުދެއް އިއްޔެ މެންދުރު ވަނީ އިންޑިޔާއަށް ފުރައިފަ އެވެ. މި ވަފުދުގައި ޓޫރިޒަމް މިނިސްޓްރީގެ އިތުރުން އެމްއެންޕީއާރުސީ އާއި އެމްްޓީޑީސީ އާއި ރާއްޖޭގެ އެއާލައިންތަކާއި ހދ. އަތޮޅު ކައުންސިލާއި ޓޫރިޒަމް ދާއިރާގައި މަސައްކަތްކުރާ އަމިއްލަ ފަރާތްތައް ހިމެނެ އެވެ.
މިނިސްޓަރު މައުސޫމް ވިދާޅުވި ގޮތުގައި ހަނިމާދޫ އިންޓަނެޝަނަލް އެއާޕޯޓް ތަރައްގީވެގެން އަންނައިރު، އެ ސަރަހައްދުގައި ޓޫރިސްޓު އެނދުގެ އަދަދު އިތުރުކޮށް ޓޫރިޒަމް ފެށިގެން ދިއުމަކީ މި ދަތުރުގެ ވަރަށް ބޮޑު އަމާޒެކެވެ.
"ކޮންމެ އަތޮޅަކަށް ވެސް 8،000 ވަރު އެނދު ލިބިގެން ފަހިކޮށް ޓޫރިޒަމް ކުރިއަށް ގެންދެވޭނީ، އަޅުގަނޑުމެން މި ބަލަނީ 2025 އަންނައިރު (ހދ، އަތޮޅުގައި) ތިން ހާސް އެނދު ހުރި ނަމަވެސް އެކަށީގެންވާ ކުރިއެރުމެއް ލިބިގެންްދާނެ ކަމަށް،" ޑރ. މައުސޫމް ވިދާޅުވި އެވެ. "އިންޓަނެޝަނަލް ވެގެން ބޮޑެތި ބޯޓު ޖައްސަން ފަށަށް ދެން ނުތިބެ، ކުދި ބޯޓުގައި ވެސް (ހަނިމާދޫ އަށް) ދަތުރުތައް ފަށަން ބޭނުންވަނީ، އިންޑިޔާ (އުތުރާ) ވަރަށް ކައިރިވީމާ ފައިދާތަކެއް އެބަހުރި،"
މިނިސްޓަރު ވިދާޅުވި ގޮތުގައި އިންޑިޔާ އާއި ރާއްޖެއަށް ޓޫރިޒަމް ވިޔާފާރި ފުޅާ ކުރުވޭނެ ފުރުސަތު ހަނިމާދޫ އެއާޕޯޓާ ގުޅިފައި އެބަ އޮތެވެ. ހދ. އަތޮޅަކީ ރާއްޖޭގައި އެންމެ މަދުން ޓޫރިސްޓް އެނދު ހުރި އަތޮޅެވެ.
ހދ. އަތޮޅު ކައުންސިލުގެ ނައިބު ރައީސް އަމީން މުހައްމަދު ވިދާޅުވީ އެ އަތޮޅުގައި ޓޫރިޒަމް ފުޅާވެގެން ދިއުމަކީ ވަރަށް ބޮޑު އުންމީދެއް ކަމަށާއި، އަތޮޅުގައި ހުރި ޓޫރިޒަމްގެ ފުރުސަތުތައް އަންގައިދީ އިންވެސްޓަރުން ހޯދުމަށް މިދަތުގައި މަސައްކަތް ކުރައްވާނެ ކަމަށެެވެ.
ނެޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) ގެ ރައީސް އިސްމާއިލް ހަމީދު ވިދާޅުވީ ދެކުނުގެ އަތޮޅު ތަކުގައި މިހާރު ވެސް 30 ވަރަކަށް ސަފާރީ އުޅަނދު ހަރަކާތްތެރިވަމުން ދާއިރު، އުތުރުގައި ވެސް އެފަދަ ޑިމާންޑެއްް އުފެއްދިދާނެ ކަމަށެވެ.
"މަތިއުރުގައި ވެސް މަދުން އެބަ އުޅޭ ބޯޓުތައް، މައްސަލަ އަކީ ކަނެކްޓިވިޓީ، ގިނަ ޕްލައިޓް ތަކެއް އެތަނަށް (ހަނިމާދޫ އަށް) ގެންދެވިއްޖެ ކަމަށްވަންޔާ މަތި އުތުރުރަށް ގިނަ ބޯޓު ތަކެއް ޑައިވާޓް ކުރެވޭނެ،" އިސްމާއިލް ވިދާޅުވި އެވެ.
މޯލްޑިވިއަން ގެ މެނޭޖިން ޑިރެކްޓަރު މުހައްމަދު މިހާދު ވިދާޅުވީ އިންޑިޔާ ދަތުރުގައި ރާއްޖެ އާއި އިންޑިޔާގެ އިތުރު ސިޓީތަކާ ދެމެދު ދަތުރަށް ފެށުމަށް ހުރި ފުރުސަތުތަކާ ބެހޭ ގޮތުން މަޝްވަރާ ކުރައްވާނެ ކަމަށެވެ.
"އަޅުގަނޑުމެން މިހާރު މި ބަލަމުން ދަނީ އިންޑިޔާގެ އިތުރު ސިޓީތަކަށް ދަތުރު ކުރެވޭތޯ، ދެކުނު އަދި އުތުރު އިންޑިޔާގެ އިތުރު ސިޓީތަކުން ކަނެކްޓިވިޓީ ގެންނަން،" މިހާދު ވިދާޅުވި އެވެ.
އެމްއެންޕީއާރުސީގެ މެނޭޖިން ޑިރެކްޓަރު ތޮއްޔިބު މުހައްމަދު ވިދާޅުވި ގޮތުގައި އިންޑިޔާގެ ޓޫރިސްޓުން ގެނައުމަށް އިތުރަށް މަސައްކަތް ކުރުމަކީ މިވަގުތު ރާއްޖެ އަށް ވަރަށް މުހިންމު ކަމެކެވެ. އޯޓީއެމްގައި ބައިވެރިވުމުން ރާއްޖާގެ ޓޫރިޒަމް ދާއިރާގައި ހަރަކާތްތެރިވާ ފަރާތްތަކާއި އިންޑިޔާގެ ޓޫރިޒަމް ދާއިރާގައި ހަރަކާތްތެރިވާ ފަރާތްތަކާއެކު ގުޅުން ބަދަހިވެގެން ދާނެ ކަމަށް އޭނާ ވިދާޅުވި އެވެ.
