ރޯދަ މަސް ތެރޭ ކެފޭ، ރެސްޓޯރެންޓް ހުޅުވާފައި ބެހެއްޓޭނެ ގަޑިތައް އިކޮނޮމިކް މިނިސްޓްރީން އިއުލާންކޮށްފި އެވެ.
އިކޮނޮމިކް މިނިސްޓްރީން ރޭ ކުރި އިއުލާނެއްގައި ބުނީ ރޯދަ މަހު ކެއިން ބުއިމުގެ ހިދުމަތްދޭ ތަންތަން ހުޅުވާފައި ބެހެއްޓޭނީ ހަވީރު 5:30 އިން ފެށިގެން ދަންވަރު 3:00 ޖަހަންދެން ކަމަށެވެ.
ރޯދަ މަހަށްފަހު ޝައްވާލު މަހުގެ ފުރަތަމަ ހަފްތާގައި ކެފޭ ރެސްޓޯރެންޓް ފަދަ ތަންތަން ހުޅުވާފައި ބެހެއްޓޭނީ ފަތިހު 4:30 އިން ފެށިގެން ދަންވަރު 3:00 އަށް ކަމަށް ވެސް އިކޮނޮމިކް މިނިސްޓްރީގެ އެ އިއުލާނުގައި ބުނެ އެވެ.
އޭގެ އިތުރުން، ރޯދަ މަހުގެ ތެރޭ ފިހާރަތައް ހުޅުވާފައި ބެހެއްޓޭނެ ގަޑިތައް ވެސް މިނިސްޓްރީން ވަނީ ކަނޑައަޅައިފަ އެވެ.
އެގޮތުން މާޗް 20، އިން ފެށިގެން ޝައްވާލުމަހުގެ ފުރަތަމަ ހަފްތާގެ ނިޔަލަށް މުދާ ވިއްކާ ފިހާރަތައް ހުޅުވާފައި ބެހެއްޓޭނެ ވަގުތަކީ ފަތިހު 5:30 އިން ފެށިގެން ދަންވަރު 1:00 އަށް ކަމަށް އިކޮނޮމިކް މިނިސްޓްރީން ވަނީ ކަނޑައަޅައިފަ އެވެ.
ރޯދަ މަސް ފެށެނީ އޭޕްރިލް 2, ގަ އެވެ. ރޯދަ މަސްތެރޭ ސަރުކާރުގެ މަސައްކަތުގެ ރަސްމީ ގަޑިތަކަށް ވެސް ވަނީ ބަދަލުތަކެއް ގެނެސްފަ އެވެ. އެގޮތުން ރޯދަ މަސް ތެރޭ ސަރުކާރުގެ އޮފީސްތަކުގެ މަސައްކަތުގެ ވަގުތަކީ ހެނދުނު 9:00 އިން ފެށިގެން މެންދުރު ޖަހަންދެކަށެވެ.
