ބޭންކް އޮފް މޯލްޑިވްސް (ބީއެމްއެލް) އިން ތ. ހިރިލަންދޫގައި ސެލްފް ސާވިސް އޭޓީއެމް ސެންޓަރެއް ހުޅުވައިފި އެވެ.
ބީއެމްއެލްއިން ބުނީ ހިރިލަންދޫގައި އެ ކުންފުނިން މިއަދު ހުޅުވި ސެންޓަރަކީ ރާއްޖެއަށް ބޭންކިން ހިދުމަތް ފުޅާކުރުމަށް އެ ކުންފުނިން ކުރަމުންދާ މަސައްކަތުގެ ދަށުން ހުޅުވި އޭޓީއެމް ސެންޓަރެއް ކަމަށެވެ.
ބީއެމްއެލްއިން ބުނީ އެ ސެންޓަރުން ފޯރުކޮށްދޭ ހިދުމަތް މެދުވެރިކޮށް އަމިއްލަ ފަރުދުންނާއި ވިޔަފާރިތަކަށް ފައިސާ ނެގުމުގެ އިތުރުން ފައިސާ ޖަމާކުރުމާއި، ޓްރާންސްފާ ކުރުމުގެ ހިދުމަތް ލިބިގެންދާނެ އެވެ.
ހިރިލަންދޫގައި ހުޅުވި އާ ސެންޓަރާ ގުޅިގެން ބީއެމްއެލް ސީއީއޯ އަދި މެނޭޖިން ޑައިރެކްޓަރު ޓިމް ސޯޔާ ވިދާޅުވީ ހިރިލަންދުއަށް ބީއެމްއެލްގެ ސެލްފް ސާވިސް އޭޓީއެމްގެ ހިދުމަތް ފޯރުކޮށްދެވުމުން އުފާކުރައްވާ ކަމަށެވެ.
"ސެލްފް ސަވިސް ހިދުމަތް ފުޅާކޮށް ހިރިލަންދޫގައި އޭޓީއެމް ހިދުމަތް ފޯރުކޮށްދެވޭކަމީ އަލުގަނޑުމެންނަށް ލިބޭ ވަރަށް ބޮޑު އުފަލެއް. އާންމު ފަރުދުންނާއި ވިޔަފާރިތަކަށް މިއޭޓީއެމްގެ ސަބަބުން ބޭންކިން ހިދުމަތް ހޯދުމަށް ލުއިފަސޭހަވެގެންދާނެ،" ސޯޔާ ވިދާޅުވި އެވެ.
ހިރިލަންދޫގައި ހުޅުވި އޭޓީއެމްއާއެކު މިވަގުތު ބީއެމްއެލްއިން ދަނީ ތ. އަތޮޅު ހަތަރު ރަށެއްގައި ދަނީ ސެލްފް ސާވިސް ބެންކިންގެ ހިދުމަތް ދެމުންނެވެ. އެއީ ގުރައިދޫ، ވޭމަންޑޫ އަދި ތިމަރަފުށީގެ އިތުރުން މިއަދު އެ ހިދުމަތް ތައާރަފްކުރި ހިރިލަންދޫ އެވެ.
ބީއެމްއެލްއިން މިހާރު ދަނީ މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 35 ބްރާންޗް، 80 ސެލްފް ސާވިސް ބޭންކިން ސެންޓަރު، 138 އޭޓީއެމް، 200 އަށް ވުރެ ގިނަ ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިން ހިދުމަތް ފޯރުކޮށްދެމުންނެވެ.
ބީއެމްއެލްއިން ބުނީ އެ ކުންފުނީގެ ހިދުމަތުގެ މައިގަނޑު އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.
