ގައުމީ ބާސްކެޓްބޯޅަ ލީގުގެ ނަތީޖާ ކަނޑައަޅާ މެޗުގައި ކިންގްސް ބީސީ އާއި ޓީރެކްސް ބީސީ މިރޭ ވާދަކުރާނެ އެވެ.
މި މެޗަށް ނުކުންނައިރު ކުޅުނު އެއްވެސް މެޗަކުން ބަލިނުވެ 18 ޕޮއިންޓާ އެކު އެއް ވަނައިގައި އޮތީ ކިންގްސް އެވެ. ދެ ވަނައިގައި ޓީރެކްސް އޮތީ 17 ޕޮއިންޓާ އެކު ގައެވެ. ލީގުގައި ޓީރެކްސް ބަލިވި ހަމައެކަނި މެޗަކީ ފުރަތަމަ ބުރުގައި ކިންގްސް އަތުން ބަލިވި މެޗެވެ.
މުބާރާތުގެ ޗެމްޕިއަންކަން ހޯދަން ޓީރެކްސް އަށް ކުރަން ޖެހިފައި އޮތް ކަމަކީ ހަތަރު ޕޮއިންޓަށް ވުރެ ބޮޑު ފަރަގަކުން ކިންގްސް ބަލިކުރުމެވެ. ލީގުގެ ފުރަތަމަ ބުރުގައި ކިންގްސް އާއި ޓީރެކްސް ވާދަކުރި މެޗަށް ބަލާލާއިރު ފުރަތަމަ ދެ ކުއާާޓާ ނިމުނުއިރު، ކުރީގައި އޮޓީ ޓީރެކްސް އެވެ. ކިންގްސް އިން ނަތީޖާ އަނބުރާލީ ފަހު ދެ ކުއާޓާގަ އެވެ.
ކިންގްސް ބީސީ އިން ނުކުންނަނީ ގައުމީ ލީގުގެ ތަށި މިލްކުކުރުމަށެވެ. ކިންގްސް، 2016 ވަނަ އަހަރު ވުޖޫދުވި ފަހުން އެ ކުލަބުން މިދިޔަ ދެ އަހަރު ލީގު ކާމިޔާބުކުރި އެވެ. އެ ކާމިޔާބީތަކުގެ ދަތުރުގައި އެންމެ ބޮޑު ވާދަވެރިންނަކީ ޓީރެކްސް އެވެ. މިދިޔަ އަހަރު ލީގުގެ ޗެމްޕިއަންކަން ކަނޑައަޅަން ކުޅުނު މެޗުގައި މި ދެ ޓީމް ވާދަކޮށް ޓީރެކްސް ކުރި ހޯދި އެވެ. ނަމަވެސް އެ މެޗުން އެ ޓީމަށް ބޭނުންވާ ސްކޯގެ ފަރަގު ހަމަނުކުރެވުމުން ހެޑްޓުހެޑް ރެކޯޑު އެއްވަރުވެ، ސްކޯގެ ފަރަގަށް ބަލައި ތަށި ލިބުނީ ކިންގްސް އަށެވެ.
މި ފަހަރު ލީގުގައި ރަނގަޅު ފޯމެއްގައި އޮތް ކިންގްސް އަށް ލިބޭނެ އެންމެ ބޮޑު ހިތްހަމަޖެހުމަކީ ޓީމްގެ މުހިންމު ކުޅުންތެރިން ފޯމުގައި ތިބުމެވެ. އެ ގޮތުން އެޓީމަށް މި ފަހަރު އަލަށް ގެނައި އެމެރިކާގެ އާލަންޑޯ ކުކް (ބެންޑޯ) އާއި ޑެކޯރޭ ޖޭމްސް އަންނަނީ މޮޅު ކުޅުމެއް ދައްކަމުންނެވެ. ދިވެހި ކުޅުންތެރިންގެ ތެރެއިން އެ ޓީމާ އަލަށް ގުޅުނު އިބްރާހިމް ރަޝްވާން (ޗިކު) މެޗަކަށް ފަހު މެޗެއް ރަނގަޅު ކުރަމުން އަންނައިރު، އަހުމަދު ހުޝާމް (ތުއްބެ) އަންނަނީ މޮޅު ކުޅުމެއް ދައްކަމުންނެވެ. މީގެ އިތުރުން އަބްދުﷲ އަމްޒަރުގެ ކުޅުންވެސް ފާހަގަކޮށްލެވެ އެވެ.
ކިންގްސް އަށް އޮތް ހަމައެކަނި ނުތަނަވަސްކަމަކީ މިދިޔަ ތިން ސީޒަނުގައި ވެސް އެ ޓީމުގައި މުހިންމު ދައުރެއް އަދާކުރި ދެ ކުޅުންތެރިންކަމަށްވާ އަހުމަދު ފިރާޝް އަދި ރިފްޝާން ރަޝީދު (ކޮކީ) އަނިޔާގައި ތިބުމެވެ. މީގެ އިތުރުން އިބްރާހިމް އަންފާލް (އަންޓެ) ވެސް މި ވަގުތު އުމްރާގެ އަޅުކަން ފުރިހަމަކުރަން ގޮސް ހުރުމާ އެކު އޭނާ މިމެޗުގައި ނުފެންނާނެ އެވެ. އަންޓެ ޓީމާ ގުޅޭނެ ކަމަށް ބެލެވެނީ ގައުމީ މުބާރާތުގެ ތެރެއިންނެވެ.
ޓީރެކްސް އަށް ބަލާއިރު އެ ޓީމަށް ލީގުގެ ދެވަނަ ބުރާ ކުރިމަތިލިއިރު ޓީމްގެ ކެޕްޓަން ހުސައިން ހަލީމް (ޗިކަނޭ) އަށް އަނިޔާވުމެވެ. ޗިކަނޭ އަށް އަނިޔާވީ ލީގުގެ ފުރަތަމަ ބުރުގައި ކިންސްއާއި ވާދަކުރި މެޗުގަ އެވެ. ޗިކަނޭގެ ކަރުގެ ކަށިގަނޑެއްގައި ރެނދުލައި އޭނާއަށް މި ސީޒަންގައި ދެން ނުކުޅެވެނޭ އެވެ. އޭނާ ނެތްތަން ފޫބެއްދުމަކީ ޓީރެކްސް އަށް އުނދަގޫކަމަކަށް ވާނެ އެވެ.
މީގެ އިތުރުން ލީގު ފެށިއިރު ޓީމުގެ އެންމެ ސީނިއާ އެއް ކުޅުންތެރިޔާ ޒަކަރިއްޔާ އަބްދުއްލަތީފް (ޒަކިއްޓެ) އަނިޔާގައި ހުރުމަކީ ވެސް ޓީރެކްސް އަށް ގެއްލުމެކެވެ. ލީގުގައި އެންމެ ފަހުން ޓީރެކްސް ކުޅުނު ދެ މެޗުގައި ޒަކިއްޓެ ކުޅުނު ކަމުގައި ވިޔަސް އޭނާ އަދި ވެސް އެއްކޮށް ފިޓެއް ނޫނެވެ.
ތަޖުރިބާ އަށް ބަލާއިރު ޓީރެކްސްގައި ނިސްބަތުން ގިނަ ކުޅުންތެރިން އެބަތިއްބެވެ. ނަމަވެސް އަފްޝަން ރަޝާދު އާއި މުހައްމަދު މުހުސިންގެ ފިޓްނަސް އަކީވެސް ކޯޗު އަލީ ފަޒްލީ (އޮލިމްޕިކް) އަށް އޮތް ނުތަނަވަސްކަމެކެވެ.
ޒުވާނުންގެ މަރުކަޒު އެތެެރެ ހޯލުގައި މިރޭ ކިންގްސް އާއި ޓީރެކްސް ކުޅޭ މެޗު ފަށާނީ 9 ޖަހާއިރު އެވެ.
