ބްރިޖިން ދަ ކޮމިއުނިޓީސް މޯލްޑިވްސް (ބީސީއެމް)ގެ ފަރާތުން އަންހެނުން ބާރުވެރިކުރުމަށް "ކޮންފަރެންސް އޮން ވިމެން އެމްޕަވާމަންޓް"ގެ ނަމުގައި ހަރަކާތެއް ބާއްވައިފި އެވެ.
ބައިނަލްއަގުވާމީ އަންހެނުންގެ ދުވަސް ފާހަގަކުރުމުގެ ގޮތުން ބޭއްވި އެ ބައްދަލުވުމުގައި ގިނަ އަދަދެއްގެ އަންހެނުން ބައިވެރިވި އެވެ. އެ ހަރަކާތަކީ މެންހެޓަން ބިޒްނަސް ހޮޓެލާއި މެންހެޓަން ފިޝް މާކެޓްގެ އެހީތެރިކަމާއެކު ހިންގި ހަރަކާތެކެވެ.
ބީސީއެމުން ބުނީ، އެ ހަރަކާތުގެ މަގްސަދަކީ އަންހެނުން ބާރުވެރިކުރުވާ، އަންހެނުންނަށް އެންމެ ބޮޑެތި ގޮންޖެހުންތައް ހުރި ދާއިރާތައް ދެނެގަނެ، އެ ދާއިރާތަކުގެ ފަންނީ ފަރާތްތަކުގެ ތަޖުރިބާއާއި އިރުޝާދު ބައިވެރިންނަށް ފޯރުކޮށްދިނުން ކަމަށެވެ.
"މަޝްވަރާކުރި މައުލޫތަކުގެ ތެރޭގައި ވިމެން އިން މީޑިއާ، ވިމެން އެންޑް ދަ އިކޮނޮމީ، ވިމެންސް ހެލްތު އަދި ވިމެން އެންޑް އެންވަޔަރަމަންޓް ހިމެނޭ،" ބީސީއެމް އިން ބުންޏެވެ.
ޕެނަލިސްޓުންގެ ގޮތުގައި އެ މައުލޫތަކަށް ވާހަކަ ދެއްކީ އެޑިއުކޭޓާ އެންޑް ޓީވީ ޕްރެޒެންޓާ އައިމިނަތު ނަމްޒާ، މެޑިފްލެކްސްގެ ޑައިރެކްޓަރު އޮޕަރޭޝަންސް އެންޑް މާކެޓިން އައިމިނަތު ޝާޔަން ޝާހިދު، މިޕްސްޓާގެ ކޮންސަލްޓަންޓް ކްލިނިކަލް ސައިކޮލޮޖިސްޓް ޑރ. އައިޝަތު އަލީ ނާޒް އަދި ޕެޑީ ކޯސް ޑިރެކްޓަރު ޒޫނާ ނަސީމެވެ.
އަންހެނުންގެ ހައްގުތައް ހޯދައިދިނުމަށާއި އަންހެނުން ބާރުވެރިކުރުވުމުގެ މަގްސަދުގައި މި އަހަރުގެ ޖެނުއަރީ 14ގައި އިފުތިތާހުކުރި ބީސީއެމްގެ ފަރާތުން އަންނަނީ ފުޅާ ދާއިރާއެއްގައި ހަރަކާތްތައް ހިންގާ، އަންހެނުންނަށް ގިނަ ފުރުސަތުތައް ފަހިކޮށްދެމުންނެވެ.
