މާލެ ސިޓީގެ އެކި ސަރަހައްދުތަކުގެ މަގުމަތީގައި ބަހައްޓާފައި ހުންނަ ޕެލެޓްތައް ނެގުމުގެ މަސައްކަތް އަމަލީ ގޮތުން މާލެ ސިޓި ކައުންސިލުން ފަށައިފި އެވެ.
ސިޓީ ކައުންސިލުން މީގެކުރިން ވަނީ ޕެލެޓްތައް މިއަދުން ފެށިގެން ނަގަން ފަށާނެކަން އިއުލާންކޮށްފަ އެވެ. އަދި އެފަދަ ސަރަހައްދުތަކުގައި އެކި ބޭނުންތަކަށް ސިޓީ ކައުންސިލުން އިތުރު ގޮތްތަކެއް ހަދައިދޭނެ ކަމަށް އެ ކައުންސިލުން އޭރު ބުންޏެވެ.
ސިޓި ކައުންސިލްގެ މީޑިއާ އޮފިޝަލް އިބްރާހިމް އަބާން މިއަދު "އަދަދު"އަށް ވިދާޅުވީ ޕެލެޓްތައް ނެގުމުގެ މަސައްކަތް ފަށާފައިވާ ކަމަށެވެ. އެގޮތުން, މިހާރު ހަދީބީމަގުގައި ގޯލްޑަން ގޭޓް ފިހާރަ ކުރިމައްޗަށްވާ ގޮތަށް ހުރި ޕެލެޓްތަކެއް ނަގާފައިވާ ކަމަށް އޭނާ ވިދާޅުވި އެވެ.
"އަދި ޕްރޮޖެކްޓެއްގެ ގޮތުގައި މިކަން ފައްޓާފައެއް ނުވޭ، ރައްޔިތުންގެ ޝަކުވާތައް އަންނަ ސަރަހައްދުތަކުގައި ހުންނަ ޕެލެޓްތައް ނެގުމުގެ މަސައްކަތް މިހާރު ކުރިއަށް ދަނީ،" އަބާން ވިދާޅުވި އެވެ.
އޭނާ ވިދާޅުވީ ރައްޔިތުންގެ ހުރި ކަންބޮޑުވުންތަކާއި ޝަކުވާތައް މާލެ ސިޓީ މޭޔަރު ޑރ. މުހައްމަދު މުއިއްޒު އެކަމަށްޓަކައި ތައްޔާރުކޮށްފައިވާ ވައިބާ ގުރޫޕެއްގައި ހިއްސާކުރެވޭނެ ކަމަށެވެ. އަދި އެ ގުރޫޕުގައި ޕެލެޓްތައް ހުރުމުގެ ސަބަބުން އާންމުންނަށް ދަތިވާ ސަރަހައްދުތަކުގެ މައުލޫމާތު ވެސް ހިއްސާ ކުރެވޭނެ ކަމަށް އަބާން ވިދާޅުވި އެވެ.
ސިޓީ ކައުންސިލުން ޕެލެޓްތައް ނަގަން ފެށި ނަމަވެސް، ވިޔަފާރިތަކަށް ހާއްސަ އިންތިޒާމުތަކެއް ހަމަޖައްސައިދޭނެ ކަމަށް އެ ކައުންސިލުން ވަނީ ބުނެފަ އެވެ.
އެގޮތުން ސިޓީ ކައުންސިލުން ޕެލެޓްތައް ނަގާނެކަން އިއުލާންކޮށް މިދިޔަ މަހުގެ 28 ގައި ކުރި އިއުލާނެއްގައި ބުނީ މާލޭގައި ގަރާޖު، ގުދަން، ވޯކްޝޮޕް އަދި ފިހާރަ ފަދަ ތަންތަނުގެ ކުރިމަތީގައި ޕެލެޓް ބަހައްޓާފައިވާ ފަރާތްތަކަށް "ވަކި ކަމަކަށް އިމާރާތް ބޭނުންކުރުމުގެ ހުއްދަ"އަކަށް އެދެވިދާނެ ކަމަށެވެ.
އަދި އެގޮތަށް ސިޓީ ކައުންސިލަށް ހުށަހެޅުމުން އެފަދަ ތަންތަނުގެ ކުރިމަތީގައި ޕާކު ކުރުން މަނާކަން އަންގައިދޭ ގޮތަށް ދެ ރޮނގު ސިޓީ ކައުންސިލުން ކުރަހައިދޭނެ ކަމަށެވެ.
މާލެ ސިޓިގައި މުދާ ލޯޑުކުރުމާއި އަންލޯޑު ކުރުމަށް ވެސް ޕެލެޓް ބަހައްޓައިގެން މަސައްކަތްކުރާ ފަރާތްތަކުން އެފަދަ ސަރަހައްދެއް ހާއްސަކޮށްދިނުމަށް ސިޓީ ކައުންސިލަށް ހުށަހެޅުމުން ކުލި ނަގާ އުސޫލުގެ ދަށުން އެފަދަ ސްލޮޓްތައް ހަމަޖައްސައިދޭނެ ކަމަށް ސިޓީ ކައުންސިލްގެ އެ އިއުލާނުގައި ބުނެ އެވެ.
