ވޮޝިންޓަން، އެމެރިކާ (މާޗް 9) - އެމެރިކާއިން ރަޝިއާގެ ތެލާއި ގޭސް އަދި ހަކަތަ އިމްޕޯޓް ކުރުން ހުއްޓާލައިފި އެވެ.
ރައީސް ޖޯ ބައިޑެން އަންގާރަ ދުވަހުގެ ރޭ ވިދާޅުވީ މިއީ ރަޝިއާއާ ދެކޮޅަށް އެމެރިކާއިން މިހާތަނަށް އެޅި އެންމެ ހަރުކަށި އެއް ފިޔަވަޅު ކަމަށެވެ.
"ރަޝިއާގެ ތެލާއި ގޭސް އަދި ހަކަތައިގެ ހުރިހާ އިމްޕޯޓެއް އަޅުގަނޑުމެން މި މަނާ ކުރަނީ. އޭގެ މާނައަކީ އެމެރިކާގެ ބަނދަރުތަކުން ރަޝިއާގެ ތެޔޮ ދެން ބަލައިނުގަންނާނެއޭ. އަދި [ރައީސް ލެޑިމިއަ] ޕުޓިންއަށް އިތުރު ގޮންޖެހުމެއް ކުރިމަތިވާނެ."
ވައިޓް ހައުސްގައި ހުންނަވައި އެމެރިކާގެ ނިންމުން އިއުލާން ކުރައްވަމުން ބައިޑެން ވިދާޅުވީ އެކުވެރި ގައުމުތަކާ އެކު "ވަރަށް ގާތުން މަޝްވަރާ" ކުރި ކަމަށެވެ.
އިނގިރޭސިވިލާތުން އަންގާރަ ދުވަހުގެ ރޭ ބުނީ ރަޝިއާއިން އިމްޕޯޓް ކުރާ ތެޔޮ މަދު ކުރަމުން ގޮސް، 2022 ވަނަ އަހަރު ނިމޭ އިރު ރަޝިއާގެ ތެޔޮ އިމްޕޯޓް ކުރުން އެއްކޮށް ހުއްޓާލާނެ ކަމަށެވެ.
އިނގިރޭސިވިލާތުގައި ގާއިމްކޮށްފައިވާ ބޮޑު ދެ ތެޔޮ ކުންފުނި، ޝެލް އަދި ބީޕީއިން ބުނީ ރަޝިއާގެ ތެލާއި ގޭސް ގަތުން ވަގުތުން ހުއްޓާލަން ނިންމާފައިވާ ކަމަށެވެ.
"ކަސްޓަމަރުންނާއި އިގްތިސާދުތަކަށް ބޭނުންވާ ހަކަތަ، ރަޝިއާގެ ތެލާއި ގޭސް ބޭނުން ނުކޮށް، ފޯރުކޮށްދެވޭތޯ އަޅުގަނޑުމެން މި ދަނީ ވަރަށް ބުރަކޮށް މަސައްކަތް ކުރަމުން،" ބީޕީއިން ބުންޏެވެ.
އެމެރިކާ އާއި އިނގިރޭސިވިލާތާ އެއް ފަދަ ފިޔަވަޅެއް އަޅަން ޔޫރަޕިއަން ޔޫނިއަން (އީޔޫ) އިން ފަސްޖެހެ އެވެ. އީޔޫއަށް ބޭނުންވާ ހަކަތަ ހޯދަން ރަޝިއާއަށް ވަރަށް ބޮޑަށް ބަރޯސާވެ އެވެ.
އެމެރިކާއަށް އިމްޕޯޓް ކުރާ ތެލުގެ އިމްޕޯޓުގެ އަށް ޕަސެންޓަކީ ރަޝިއާގެ ތެލެވެ. އެހެންކަމުން، ރަޝިއާގެ އިމްޕޯޓްތައް މެދުކަނޑާލުމުން ކުރާ އަސަރު އެހާ ބޮޑެއް ނުވާނެ އެވެ.
