ވޮޝިންޓަން، އެމެރިކާ (މާޗް 8) - ގުއަންޓަނާމޯ ބޭ ޖަލުގައި ބަންދުކޮށްފައި ހުރި ސިކުނޑީގެ ބަލި މީހަކު ސައުދީ އަރަބިއްޔާއަށް ގެންގޮސްފި އެވެ.
މުހައްމަދު އަލް ގަހްތާނީ ސެޕްޓެމްބަރު 11، 2001 ވަނަ އަހަރު އަލް ގައިދާއިން އެމެރިކާގައި ދިން ހަމަލާތަކުގައި ބައިވެރިވި މީހެއް ކަމަށް އެމެރިކާއިން ތުހުމަތު ކުރެ އެވެ.
ކިޔުބާގައި ހުންނަ އެމެރިކާގެ ސިފައިންގެ މަރުކަޒުގައި އޭނާ ބަންދުކޮށްގެން އުޅޭތާ 20 އަހަރަށް ވުރެ ގިނަ ދުވަސްވެފައިވާ އިރު، އެ ތަނުގައި އޭނާއަށް އެތައް އަނިޔާއެއް ކުރި އެވެ.
ޖަލުގައި ތަޖުރިބާ ކުރަން ޖެހުނު ލާއިންސާނީ އަނިޔާތަކާ ހެދި އެމެރިކާ ސަރުކާރުން އޭނާއާ ދެކޮޅަށް ތަހުގީގު ކުރަމުން ދިޔަ މައްސަލަ ހުއްޓާލީ 2008 ވަނަ އަހަރު އެވެ.
މިދިޔަ ފެބްރުއަރީ މަހު، އެމެރިކާގެ ކަމާ ބެހޭ އިދާރާތަކުން ލަފާ ދިނީ އޭނާ މިނިވަން ކުރުމަށް ފަހު، ސައުދީ އަރަބިއްޔާއަށް ފޮނުވާލުމަށެވެ.
"ސައުދީގެ ބައިވެރިންނާ އެކު ކުރި މަސައްކަތަށް ފަހު، މުހައްމަދު އަލް ގަހްތާނީ ފޮނުވާލުމަށް ބޭނުންވާ ހުރިހާ ކަމެއް ފުރިހަމަކޮށް ނިމިއްޖެ،" ޑިފެންސް ޑިޕާޓްމަންޓުގެ ބަޔާނެއްގައި ބުންޏެވެ.
"ސައުދީ އަރަބިއްޔާ އާއި އެހެން ބައިވެރިން، ގުއަންޓަނާމޯ ބޭ ޖަލުގައި ތިބި ގައިދީން މަދުކޮށް، އެ ފެސިލިޓީ ބަންދުކުރަން އެހީވެދޭތީ އެކަން ފާހަގަކުރަން."
ޖެނުއަރީ 2002 ވަނަ އަހަރު ގުއަންޓަނާމޯ ބޭ ޖަލުގައި އެންމެ ފުރަތަމަ ބަންދުކުރި ގައިދީންގެ ތެރޭގައި މުހައްމަދް އަލް ގަހްތާނީ ހިމެނެ އެވެ.
އެމެރިކާއަށް ދިން ހަމަލާތަކުގެ ކުރިން، އޯގަސްޓް 4، 2001 ވަނަ އަހަރު އޭނާ އެމެރިކާއަށް އެތެރެވާން މަސައްކަތް ކުރި އެވެ. ނަމަވެސް އޯލާންޑޯ އެއާޕޯޓުން އޭނާ އަނބުރާ ފޮނުވާލީ ޑުބާއީ އަށެވެ.
އެމެރިކާ ސިފައިންގެ އޮޕަރޭޝަނެއްގައި އޭނާ ހައްޔަރު ކުރީ އަފްގާނިސްތާނުން ޑިސެމްބަރު 2001 ވަނަ އަހަރު އެވެ.
ޖަލުގައި އޭނާއަށް ކުރި އަނިޔާ ތަފްސީލްކޮށް ޑޮކިޔުމެންޓުކޮށްފައިވާ އިރު، އިންސާނީ ހައްގުތަކަށް މަސައްކަތް ކުރާ ގްރޫޕްތަކުން އެ ޖަލު ބަންދުކުރަން ބާރު އަޅަން ފެށި އެވެ.
ގިނަ ދުވަސްތައް ވަންދެން އެކަހެރިކޮށްގެން ބެހެއްޓުމާއި، ނިދިން މަހްރޫމް ކުރުމާއި، ޖިންސީ ފުރައްސާރަ އާއި އެހެނިހެން ގޯނާތައް ވެސް މުހައްމަދު އަލް ގަހްތާނީއަށް ކުރި އެވެ.
މުހައްމަދު އަލް ގަހްތާނީ.
ގުއަންޓަނާމޯ ބޭ ޖަލުގައި ތިބި 39 ގައިދީންގެ ތެރެއިން ފަސް މީހަކު ދޫކޮށްލަން އެމެރިކާއިން މިދިޔަ ޖެނުއަރީ މަހު ނިންމި އެވެ.
އެމެރިކާގެ ނޭވީ ނުވަތަ ކަނޑުގެ ސިފައިން އޮޕަރޭޓް ކުރާ ގުއަންޓަނާމޯ ބޭ ޖަލު އުފެއްދީ ސެޕްޓެމްބަރު 11 ހަމަލާތަކަށް ފަހު 2001 ވަނަ އަހަރު އެވެ.
އެ ތަނުގެ މަގްސަދަކީ އެމެރިކާއިން "ޓެރަރިޒަމާ ދެކޮޅަށް ކުރާ ހަނގުރާމައިގައި" ގައިދީން ބަންދު ކުރުމެވެ. އެއީ ލާއިންސާނީ އެތައް އަމަލެއް ހިންގާ ތަނެއްގެ ގޮތުގައި އދ. ގެ އިންސާނީ ހައްގުތަކާ ބެހޭ ތަޖުރިބާކާރުން ސިފަކުރެ އެވެ.
