ރާއްޖެއަށް އަންނަ މީހުންގެ ތެރެއިން ކޮވިޑުގެ ވެކްސިން ފުރިހަމަކޮށްފައިވާ މީހުންނަށް ޕީސީއާރު ޓެސްޓަކާ ނުލާ ދެން ރާއްޖެ އާދެވޭނީ ވެކްސިން ފުރިހަމަކުރިތާ 14 ދުވަސް ފަހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
އެޗްޕީއޭއިން މިއަދު ނެރުނު އިއުލާނެއްގައި ބުނީ ވެކްސިން ފުރިހަމަ ކުރިޔަސް ދެން ޕީސީއާރު ޓެސްޓެއްގެ ނެގެޓިވް ނަތީޖާއަކާ ނުލާ ރާއްޖެ އާދެވޭނީ ވެކްސިންގެ ދެ ޑޯޒް ފުރިހަމަކޮށް 14 ދުވަސް ވެފައިވާ ނަމަ ކަމަށެވެ.
އެޗްޕީއޭއިން އެގޮތަށް ބުނީ މީގެ ތިން ދުވަސް ކުރިން އެ އެޖެންސީން ނެރުނު އިއުލާނެއްގައި ވެކްސިން ފުރިހަމަކޮށްފައިވާނަމަ ޕީސީއާރު ޓެސްޓަކާ ނުލާ ރާއްޖެ އާދެވޭނެކަމަށް ބުނުމަށްފަހު އެ އިއުލާން އިސްލާހުކުރުމުގެ ގޮތުންނެވެ.
ކޮވިޑްގެ ހާލަތު ގޯސްވުމާ ގުޅިގެން ރާއްޖެއަށް އަންނަ މީހުން ޕީސީއާރު ޓެސްޓު ހަދާގޮތަށް މީގެ ކުރިން ކަނޑައަޅާއިފައި ވީނަމަވެސް އެ އެންގުމަށް ބަދަލު ގެނައީ ކޮވިޑުގެ ހާލަތު ބަދަލުވުމާއި ގުޅިގެން އިތުރު ލުއިތަކެއް ދިނުމުގެ ގޮތުންނެވެ.
މިއަދު ކުރި އިއުލާނުގައި ވެސް އެޗްޕީއޭއިން ބުނީ ގެސްޓް ހައުސް ހިންގާ ރަށްތަކުގައި ތިބޭ ފަތުރުވެރިން، ރާއްޖެއިން ފުރުމުގެ ކުރިން ހަދަންޖެހޭ ޕީސީއާރު ޓެސްޓް އަދިވެސް ހަދަން ނުޖެހޭނެ ކަމަށެވެ.
އެ ބަދަލުތަކާއެކު ރާއްޖެއަށް ފަތުރުވެރިން ދަތުރުކުރުމުގައި ލުއިފަސޭހަތަކެއް ލިބިގެންދާނެ އެވެ. މިއަހަރުގެ މިހާތަނަށް 300،000 އާއި ގާތްކުރާ އަދަދަކަށް ރާއްޖެއަށް ވަނީ ފަތުރުވެރިން ޒިޔާރަތްކޮށްފަ އެވެ.
