ގައުމީ ބާސްކެޓްބޯޅަ ލީގުގެ ފުރަތަމަ ޑިވިޝަންގެ ފަހު މެޗުތައް ބާކީ އޮތްއިރު ގައުމީ މުބާރާތަށް ކޮލިފައިވުމުގެ ފޯރި ގަދަވެއްޖެ އެވެ.
ގައުމީ ލީގުގެ ފުރަތަމަ ޑިވިޝަންގެ ފިރިހެން ކޮންމެ ޓީމަކަށް ބާކީ އޮތީ އެންމެ ދެ މެޗެވެ. ގައުމީ މުބާރާތަށް ކޮލިފައިވާ ޓީމުތައް އިނގޭނީ މި ދެ މެޗުގެ ނަތީޖާތައް ނުކުންނަ ގޮތަކުންނެވެ. މިވަގުތު ލީގު ތާވަލަށް ބަލާއިރު ގައުމީ މުބާރާތުގެ ޖާގަ ޔަގީންކޮށްފައިވަނީ ޗެމްޕިއަން ކިންގްސް ބާސްކެޓްބޯލް ކްލަބާއި، ޓީރެކްސް ބާސްކެޓްބޯލް ކްލަބް އަދި ދަ ބައުސް އެވެ. ބާކީ އޮތް ޖާގަ ލިބޭނެ ޓީމެއް އެނގޭނީ އަންނަ ބުރާސްފަތި ދުވަހު ކުޅޭ ލީގު ބުރުގެ ފަހު މެޗުތަކަށް ފަހު އެެވެ.
ލީގުގައި ފުރަތަމަ ޑިވިޝަންގެ ޓީމުތައް އެންމެ ފަހުން ކުޅުނު މެޗުތަކަށް ބަލާއިރު، އެންމެ ވާދަވެރިކޮށް ދިޔައީ ރެޑްވިންގްސް އާއި ޓީރެކްސް ވާދަކުރި މެޗާއި، ރެޕްޓާސް އާއި ދަ ބައުސް ވާދަކުރި މެޗެވެ. ކިންގްސް އާއި ސްޓިންގާސް ވާދަކުރި މެޗު ކިންގްސް މޮޅުވީ 16 ޕޮއިންޓުގެ ފަރަގަކާ އެކު އެވެ.
ރެޑްވިންގްސް އަތުން ޓީރެކްސް މޮޅުވީ 86-82 ޕޮއިންޓުންނެވެ. މެެޗުގެ ފުރަތަމަ ދެ ކުއާާޓާ ނިމުނުއިރު ރެޑްވިންގްސް އޮތީ ތިން ޕޮއިންޓްގެ ލީޑެއް ނަގައިފަ އެވެ. މި ކުއާޓާގައި އެންމެ ބޮޑަށް ފާހަގަކޮށްލެވުނީ ރެޑްވިންގްސްގެ މުހައްމަދު ޒީދާން އާއި އާނޯލްޑް ބްރެންޓްގެ ކުޅުމެވެ. ޓީރެކްސްގެ މުހިންމު ކުޅުންތެރިންނަށް މި ދެ ކުއާޓާގައި މާ ބޮޑު ތަފާތެއް ނުދެއްކުނެވެ.
ޓީރެކްސް އިން މެޗު އަނބުރާލީ ފަހު ދެ ކުއާޓާގައި ފިލިޕް ވުކޮސަލްޔެވިކް ދެއްކި ތަފާތާ އެކުގަ އެވެ. މުޅި މެޗުގައި ފިލިޕް ވަނީ 49 ޕޮއިންޓް ޓީރެކްސް އަށް އެއްކޮށްދީފަ އެވެ. ތިން ވަނަ ކުއާޓާ ނިމުނުއިރު ޓީރެކްސް އިން އެއް ޕޮއިންޓްގެ ލީޑެއް ނެގިއިރު، ފޯރިގަދަ ފަހު ކުއާޓާގައި އެ ޓީމުން ފަރަގު ބޮޑު ކުރި އެވެ.
ރެޕްޓާސް އަތުން ބައުސް މޮޅުވީ 77 ޕޮއިންޓް 73 ޕޮއިންޓުންނެވެ. ވާދަވެރި އަދި ފޯރިގަދަ މި މެޗުގެ ފުރަތަމަ ތިން ކުއާޓާގައި ފެނުނީ ވަރަށް ހަމަހަމަ ކުޅުމެކެވެ. ނަމަވެސް ބިދޭސީ ކުޅުންތެރިޔާ ޖެފްރީ ކޯބީ އައި ޝާމިކް ޝަމްއާން މޮޅު ކުޅުމާ އެކު އެ ޓީމުން ތިން ޕޮއިންޓްގެ ލީޑެއް ނެގި އެވެ. ފަހު ކުއާޓާާގައި ނިކުމެ ޖޭމްސް ސްޓެންބެކް އާއި މުއަހްމަދު ސަމޫހުގެ މޮޅު ކުޅުމާ އެކު ބައުސް އިން ފަހު ވަގުތު ތަފާތު ދައްކައި މޮޅުވިއެވެ.
ކިންގްސް އާއި ސްޓިންގާސް ވާދަކުރި މެޗު ކިންގްސް ކާމިޔާބުކުރީ 115-99 ޕޮއިންޓުންނެވެ. މި މެޗުގެ ފުރަތަމަ ކުއާާޓާގައި ސްޓިންގާސް މޮޅު ކުޅުމެއް ދެއްކި އެވެ. ނަމަވެސް ކިންގްސް އިން ވަނީ ފަހަތުން އަރައި ބޮޑު ލީޑެއް ނަގައި ފެންވަރު ދައްކައިލައިފަ އެވެ. ފަހު ކުއާޓާގައި ސްޓިންގާސް އިން ރަނގަޅު ވާދަ އެއް ކުރި ކަމުގައި ވިޔަސް ޗެމްޕިއަނުން ފަހަތައް ޖައްސާލެވޭ ގޮތެއް ނުވިއެވެ.
ލީގުގައި ކުރިއަށް ހުރި މެޗުތަކަށް ބަލާއިރު، ޓީރެކްސް އަށް އޮތީ ރެޕްޓާސް އާއި ވާދަކުރާ މެޗެވެ. ރެޑްވިންގްސް ސްޓިންގާސްއާ ދެކޮޅަށް ނުކުންނައިރު، ކިންގްސް ނުކުންނާނީ ބައުސް އާއި ދެކޮޅަށެވެ.
