ރާއްޖޭގައި ފަޅު ރަށެއް ވަރުވާއަށް ދޭ އެންމެ ދިގު މުއްދަތު ފަސް އަހަރު ދުވަހުން 10 އަހަރު ދުވަހަށް އިތުރުކޮށް, ރަށް ނަގަން ޖެހިއްޖެ ހާލަތެއްގައި ސަރުކާރުން ބަދަލުދޭން ނުޖެހޭނެ ކަމަށް ކަނޑައަޅައި ރާއްޖޭގެ ފަޅުރަށްރަށާއި ބެހޭ ގަވާއިދަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗާއިން އިސްލާހެއް ގެނެސްފި އެވެ.
މިދިޔަ ބުރާސްފަތި ދުވަހު ގެޒެޓްކުރި އެ އިސްލާހުގައި ވަނީ ދިވެހިރާއްޖޭގެ ފަޅުރަށްރަށާއި ބެހޭ ގަވާއިދުގެ 20 ވަނަ މާއްދާގެ ދަށުން ފަޅުރަށްރަށް ވަރުވާއަށް ދޫކުރެވޭނެ އެންމެ ދިގު މުއްދަތު ފަސް އަހަރު ދުވަހުން 10 އަހަރު ދުވަހަށް އިތުރުކޮށްފަ އެވެ. ވަރުވާއަށް ފަޅުރަށެއް ދޫކުރުމުގެ މާނައަކީ ސަރުކާރުން އާންމު ފަރުދަކަށް ފަޅު ރަށެއް ބެލެހެއްޓުމަށްޓަކައި ކޮންމެ އަހަރަކު ވަކި އަދަދެއް ކުލީގެ ގޮތުގައި ދައްކާ ގޮތަށް ކުއްޔަށް ދޫކުރާ ދޫކުރުމެވެ.
ވަރުވާއަށް ރަށް ދޫކުރުމުގެ ގަވާއިދުގެ 20 ވަނަ މާއްދާއަށް ގެނައި އިސްލާހުގެ އިތުރުން ވެސް ވަރުވާއަށް ރަށް ނަގާ މީހާގެ އަތުން ސަރުކާރުން އެރަށް ނަގަން އިހްތިޔާރުކުރާ ހާލަތެއްގައި ބަދަލުދޭން ނުޖެހޭނެ ކަމަށް ބުނާ އިސްލާހެއް ގަވާއިދަށް ވަނީ އިތުރުކޮށްފަ އެވެ.
"ފަޅު ރަށެއް ވަރުވާއަށް ހިފައިފައިވާ ފަރާތުން އެ ރަށެއް ވަކިކުރާ ހާލަތުގައި، ވަރުވާއަށް ހިފައިފައިވާ ފަރާތަށް އެ ރަށާ ގުޅިގެން އެއްވެސް ބަދަލެއް ދޭކަށް ނުޖެހޭނެ އެވެ،" ގަވާއިދުގެ 26 ވަނަ މައްދާގެ (ނ) އަށް ގެނައި އިސްލާހުގައި ވެ އެވެ.
ކުރީގެ މާއްދާތަކެކޭ އެއްގޮތަށް އަދިވެސް ވަރުވާއަށް ދޫކޮށްފައިވާ އެގްރިމެންޓާ ހިލާފްނުވި ނަމަވެސް އެއްބަސްވުމުގެ މުއްދަތު ހަމަވުމުގެ ކުރިން ވަރުވާއަށް ދިން ރަށް ވަކިކުރުމުގެ އިހްތިޔާރު މިނިސްޓްރީއަށް އަދިވެސް ލިބިގެންވެ އެވެ. ނަމަވެސް ކުރީގެ މާއްދާތަކާ ހިލާފަށް ރަށަށް ބަދަލުދިނުމުގެ ބަދަލުގައި ވަރުވާގެ ގޮތުގައި ސަރުކާރަށް އެ އަހަރު ދެއްކި ފައިސާއިން އަހަރުގެ ބާކީ އޮންނަ މުއްދަތަށް ވާ ފައިސާ ވަރުވާއަށް ނެގި މީހާއަށް އަބުރާ ދޭން ވާނެ ކަމަށް ގަވާއިދުގައި ބުނެ އެވެ.
"ވަރުވާގެ ގޮތުގައި ދައްކައިފައިވާ ފައިސާއިން، ހިނގާ އަހަރުގެ ބާކީ އޮންނަ ދުވަހަށްވާ ފައިސާ، ވަރުވާއަށް ހިފައިފައިވާ ފަރާތަށް ލިބިދެވޭނެ އެވެ،" ގަވާއިދުގެ 27 ވަނަ މާއްދާއަށް ގެނައި އިސްލާހުގައި ބުނެ އެވެ.
ގަވާއިދުގައި ވަނީ ފަޅުރަށް ވަރުވާއަށް ދިން މީހާގެ ކިބައިން ވަކިކުރާ ހާލަތުގައި ރަށުގައި ހުރި އެމީހެއްގެ އުފުލޭ އަމިއްލަ މުދާ އެރަށުން ގެންދިޔުމަށް މިނިސްޓްރީން މުއްދަތެއް ކަނޑައަޅައިދޭންވާނެ ކަމަށް ބަޔާންކޮށްފަ އެވެ.
ކުރީގަ ވެސް ގަވާއިދުގައި އޮންނަ ގޮތަށް ރަށުގެ ވެއްޓަށް ގެއްލުން ނުލިބޭނެހެން ކުދިގަހުގެ ނާސަރީ އަދި ކުރު މުއްދަތެއްގެ ތެރޭގައި ހެދި ބޮޑުވާ ޒާތުގެ ތަރުކާރީ އަދި މޭވާ ހެއްދުމަށް ގަވާއިދަށް ގެނައި އިސްލާހުތަކުން އަދިވެސް ހުއްދަ އެވެ.
ތަފާތަކީ އިބާރާތްކުރުމުގައި ހުރި ބަދަލުތަކަކާއި ވަރުވާއަށް ދިން ރަށުގެ "ބޮޑު ސަރަހައްދެއް ސާފުނުކޮށް ބާއްވައި" އެފަދަ މަސައްކަތެއް ކުރުމަށް ކުރީގެ ގަވާއިދުގައި ޖާގަދޭ ބައި އިސްލާހުތަކުން އުނިކޮށްފައިވާވުމެވެ.
ގަވާއިދަށް ދެން ގެނައި އިސްލާހަކީ އެ ގަވާއިދުގެ 24 ވަނަ މާއްދާއަށް އަކުރެއް އިތުރުކުރާ އިސްލާހެކެވެ. އެގޮތުން އެ މާއްދާގެ (ދ) ގައި ވަނީ ގަވާއިދުގައި "ބޮޑު ގަހެއް" ލަފްޒު މާނަކޮށްފައިވާ ނުވަތަ އެ ގިންތިއަށް ފެތެނީ ކޮން ކަހަލަ ގަސްތަކެއް ކަމަށް ކަނޑައަޅާ މިންގަނޑާ ގުޅޭ އަކުރެކެވެ.
އެ މިންގަނޑު ކަނޑައަޅާފައިވަނީ އެއް ރަށުން އަނެއް ރަށަށް ގަސް ގެންދިޔުމާ ގުޅޭގޮތުން އެކުލަވާލައިފައިވާ ވަކި ގަވާއިދެއްގަ އެވެ. ވަރުވާއަށް ރަށް ދޫކުރުމާ ގުޅޭ ގަވާއިދަށް ގެނައި އިސްލާހުތަކަށް ބުރާސްފަތި ދުވަހުން ފެށިގެން ވަނީ އަމަލުކުރަން ފަށައިފަ އެވެ.
