އެމްޑީޕީގެ ޗެއާޕާސަންގެ އިންތިހާބުގައި ވާދަކުރާ ދެ ކެންޑިޑޭޓުން ކަމަށްވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އާއި އިކޮނޮމިކް މިނިސްޓަރު ފައްޔާޒު އިސްމާއީލުގެ ކެމްޕޭން ހަރަކާތްތައް މި ހަފްތާ ބަންދުގައި ފޯރިއާއެކު އައްޑޫގައި ކުރިއަށް އެބަދެ އެވެ.
މި ދެ ކެންޑިޑޭޓުންގެ ޓީމުތައް މިވަގުތު އައްޑޫ ސިޓީގައި ކެމްޕެއިން ކުރަމުްދާއިރު، އެމްޑީޕީ ގައުމީ މަޖިލީހުގެ މެމްބަރުންނާއި ރައްޔިތުންގެ މަޖިލީހުގެ މެމްބަރުން އަންނަނީ ބައިވެރިވަމުންނެވެ. އެހެންވެ ވާދަވެރިކަން އިންތިހާއަށް އެބައޮތެވެ.
ރޭގެ ވަގުތެއްގައި ފައްޔާޒް އައްޑޫއަށް ވަޑައިގެންނެވި އިރު އޭނާގެ އިސްތިގްބާލުގައި އޭނާއަށް ތާއީދުކުރާ ގިނަ އަދަދެއްގެ އެމްޑީޕީ މެމްބަރުން ތިއްބެވެ. އޭގެ ތެރޭގައި އައްޑޫ ސިޓީގެ މޭޔަރު ވެސް ހިމެނިވަޑައިގެންނެވި އެވެ.
"ދެބައި މީހުންގެ މެދުގައި ވަރަށް ފޯރި ގަދަކޮށް ދަނީ، އެކަމަކު އަނެއްހެން ދިމާއެއް ނުވޭ، ރޭ ހިތަދޫ އުތުރު އަވަށުގައި ކެމްޕެއިން ޖަލްސާއެއް ބޭއްވިން، މިއަދު ހުޅުދޫ މީދޫގައި މި އުޅެނީ، އެމީހުން (އިންތިގެ ކެމްޕެއިން ޓީމް) އުޅެނީ ފޭދޫގައި،" ފައްޔާޒުގެ ކެމްޕެއިން މެނޭޖަރު އަދި ފެނަކަ ކޯޕަރޭޝަންގެ ޑީއެމްޑީ އިބްރާހިމް ވަހީދު ވިދާޅުވި އެވެ.
އޭނާގެ ޓީމުގައި އައްޑޫ މީދޫ ދާއިރާގެ މެމްބަރު ރޮޒައިނާ އާދަމާއި މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ބައިވެރިވެވަޑައިގަނެ އެވެ.
"ވަރަށް ބޮޑު ތަރުހީބެއް އެބައޮތް، އަޅުގަނޑުމެންނަށް މި އިންތިހާބު ބޮޑުތަނުން ކާމިޔާބު ކުރެވޭނެ ކަމަށް ފެންނަނީ،" އޭނާ ގަބޫލުކުރާ ގޮތުގައި އައްޑޫގެ ވޯޓުން އެކަނިވެސް ބޮޑު ފަރަގެއް ނެރެވޭނެ އެވެ.
ފައްޔާޒާ ވާދަކުރައްވާ އިމްތިޔާޒް ފަހުމީ ވެސް އަައްޑޫއަށް ވަޑައިގެންނެވީ ވަރުގަދަ ޓީމަކާއެކު އެވެ. އޭގެ ތެރޭގައި ހުޅުދޫ ދާއިރާގެ މެމްބަރު އިލްޔާސް ލަބީބު އާއި ރައްޔިތުންގެ މަޖިލީހުގެ ނައިބް ރައީސް އީވާ އަބްދުﷲ ގެ އިތުރުން އެމްޑީޕީގެ ކުރީގެ ޗެއާޕާސަން ހަސަން ލަތީފު އާއި އިނގުރައިދޫ ދާއިރާގެ މެމްބަރު ހަސަން މުހައްމަދު (ހަސަަންޓޭ) ހިމެނެ އެވެ.
"ހަމަ ހުރިހާ މެމްބަރުންގެ ވެސް ދުލުކުރީގައި އޮންނަނީ އިންތިގެ ނަން. އަޅުގަނޑުމެން އެބޭފުޅުންނާ ވާހަކަ ދެއްކުމުގެ ކުރިން ވެސް. އެހެންވީމަ ތާއިދު އެބަ އޮތް ވަރަށް ބޮޑަށް އިންތިއަށް. ވަރަށް ރަނގަޅަށް ކެމްޕޭން މިދަނީ އިރާދަކުރެއްވީތީ،" އިންތިގެ ކެމްޕެއިން މެނޭޖަރަކަށް އުޅުއްވާ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވި އެވެ.
އޭނާ ވިދާޅުވީ ޕާޓީގެ މެމްބަރުންގެ ފަރާތުން ސަރުކާރާ ދޭތެރޭ ކަންބޮޑުވުންތަކެއް ހުރިކަން ވެސް ފާހަގަކުރެވިފައިވާ ކަމަށާއި އިމްތިޔާޒްގެ ޓީމުން މެމްބަރުންނާއި ބައްދަލުކޮށް ކުރާ މަސައްކަތަކީ އެ ކަންބޮޑުވުންތައް އަޑުއަހައި އެކަންކަމަށް ހައްލެއް ގެނެވޭނެ ގޮތްތަކެއް ހޯދުން ކަމަށެވެ.
ޗެއާޕާސަން އިންތިހާބުގެ ފޯރި ގަދަވެފައިވާ އިރު ނިމިގެން ދިޔަ ދައުރުގައިވެސް ޗެއާޕާސަން އިންތިހާބުގައި އެންމެ ގިނަ ބަޔަކު ވޯޓުލާފައިވަނީ އައްޑޫ އިން ކަން ފާހަގަކޮށްލެވެ އެވެ. އެމްޑީޕީގެ ޗެއާޕާސަންގެ އިންތިހާބު އޮންނާނީ އެޕްރީލް 16، ގަ އެވެ. އެ ދުވަހު އަންހެނުންގެ ރޫހުގެ އިންތިހާބާއި ޒުވާނުންގެ ހިތްވަރުގެ އިންތިހާބު ވެސް އޮންނާނެ އެވެ.
