އުރީދޫ ދިވެހި ޕްރިމިއާ ލީގުގައި މިއަދު ހަވީރު ޓީސީ ސްޕޯޓްސް ކްލަބް 1-0 އިން ބަލިކޮށް ކްލަބް ވެލެންސިއާ ލީގުގެ ދެ ވަނަ އަށް ޖެހިލައިފި އެވެ.
މި ހަފްތާގައި ޔުނައިޓެޑް ވިކްޓްރީ (ޔޫވީ) އާއި ކްލަބް އީގަލްސް ކުޅުނު މެޗު އެއްވަރުވުމުން މިއަދު ޓީސީ ބަލިކޮށްގެން ދެ ވަނައިގައި ލީޑެއް ނެގުމުގެ ފުރުސަތު ވެލެންސިއާ އަށް ވަނީ ހުޅުވިފަ އެވެ. ވެލެންސިއާ މިއަދު މޮޅުވުމުން މާޒިޔާގެ ލީޑު ވަނީ ތިން ޕޮއިންޓަށް ކުޑަވެފަ އެވެ.
ކުޅުނު ހަތަރު މެޗުން ވެސް މޮޅުވެގެން މާޒިޔާ އެއް ވަނައިގައި 12 ޕޮއިންޓާ އެކު އޮތްއިރު، ވެލެންސިއާ ދެ ވަނައިގައި އޮތީ ނުވަ ޕޮއިންޓް ހޯދައިގެންނެވެ. ތިނެއްގައި އޮތް ޔުނައިޓެޑް ވިކްޓްރީ އާއި ހަތަރެއްގައި އޮތް އީގަލްސް އަށް ވަނީ ހަތް ޕޮއިންޓް ލިބިފަ އެވެ.
މެޗު ފަށައިގެން ފުރަތަމަ ދެ ހަމަލާ ފޮނުވާލީ ޓީސީގެ ފޯވާޑް މުހައްމަދު މުސްލިހު (މުއްޓި) އެވެ. ހަތަރު ވަނަ މިނިޓްގައި މުއްޓި ވޮލީއަކުން ޖެހި ބޯޅަ ދަނޑިކައިރިން ދިޔައިރު، އޭގެ މިނިޓެއް ފަހުން އޭރިއާތެެރެއިން މުއްޓި ޖެހި ބޯޅަ ވެލެންސިއާގެ ކީޕަރު މުހައްމަދު ފައިސަލް ވަނީ މަތަކޮށްފަ އެވެ.
ވެލެންސިއާ އިން ފުރަަތަމަ 10 މިނިޓަށް ފަހު ރަނގަޅަށް ކުރިއަށް ޖެހިގެން ކުޅެން ފެށިތާ ހަތަރު މިނިޓް ތެރޭގައި ލަނޑު ޖެހި އެވެ. މިއީ ޕެނަލްޓީ އަކުން ސްޕެއިންގެ ފޯވާޑް ބޯހަސް މާޓިން ޖެހި ގޯލެކެވެ. މި ޕެނަލްޓީ އަކީ ޓީސީގެ އޭރިއާތެރެއިން ވެލެންސިއާގެ އަބްދުﷲ ޔާމީން (ޔާނު) އަށް ކުރި ފައުލަކަށް ރެފްރީ އަބްދުﷲ ޝާތިރު ދިން ޕެނަލްޓީ އެކެވެ.
ނަތީޖާ ހަމަހަމަކުރަން ޓީސީން ކުރިއަށް ޖެހިގެން ކުޅެން ފަށައި މެޗުގެ 23 ވަނަ މިނިޓްގައި އޭރިއާބޭރުން އަހުމަދު ސާމިއު ޖެހި ބޯޅަ ކީޕަރު ފައިސަލް ވަނީ މަތަކޮށްފަ އެވެ. މެޗުގެ 32 ވަނަ މިނިޓްގައި ވެލެންސިއާގެ ޑިފެންޑަރު ހޯސޭ ޑޮމިންގޭޒް ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އޭގެ ފަހުން ކައުންޓަ އެޓޭކެއްގައި ބޯހަސް ހުސްކޮށްލާފައި ޔާނު އަށް ދިން ބޯޅައިގައި އޭނާ އަށް ފޮނުވާނުލެވި ފުރުސަތު ގެއްލުނީ އެވެ.
ފުރަތަމަ ހާފެކޭ އެއްގޮތަށް ދެ ވަނަ ހާފް ފެށީ ވެސް ޓީސީގެ އެޓޭކަކުންނެވެ. މި ފަހަރު ވެސް މުއްޓި ޖެހި ބޯޅަ ކީޕަރު ފައިސަލް ވަނީ މަތަކޮށްފަ އެވެ.
ދެ ވަނަ ހާފްގައި ވެލެންސިއާގެ ފުރަތަމަ ނުރައްކާތެރި ހަމަލާ ފެނުނީ 66 ވަނަ މިނިޓްގަ އެވެ. ބޯހަސް އޭރިއާތެެރެއިން ކޮންޓްރޯލް ކޮށްލުމަށް ފަހު ޔާނު އަށް ދިން ބޯޅަ ފޮނުވާލުމުން ދިޔައީ ހުރަސްދަނޑި މަތިންނެވެ. އޭގެ ދެ މިނިޓް ފަހުން ބޯހަސް އޭރިއާތެރެއަށް ވަދެ ޖެހި ބޯޅަ ޓީސީގެ ކީޕަރު ލަންކާގެ ސުޖަން ޕެރޭރާ ވަނީ މަތަކޮށްފަ އެވެ.
މެޗުގެ 70 ވަނަ މިނިޓްގައި ވެލެންސިއާގެ މިސްރު މިޑްފީލްޑަރު ހަލީލް ޖަމާލް ނެގި ހުރަހަކުން ޔާނު ބޮލުން ޖެހި ބޯޅަ އަމާޒުވީ ގޯލުގެ ދަނޑިއަށެވެ.
ބަދަލު ކުޅުންތެރިއެއްގެ ގޮތުގައި ކުޅެން އަރައި ޓީސީގެ ހަމްދޫން އަބްދުލް ލަތީފް ފޮނުވާލި ތިން ބޯޅަ ވެސް ކީޕަރު ފައިސަލް ވަނީ މަތަކޮށްފަ އެވެ. ވެލެންސިއާ އަށް ދެ ވަނަ ލަނޑެއް ޖަހައިދޭން މެޗުގެ 89 ވަނަ މިނިޓްގައި އަހުމަދު ރިލްވާން (ރިލޭ) އަށް ރަނުގެ ފުރުސަތެއް ލިބުނެވެ. ބޯހަސް އޭރިއާތެރެއިން ހުސްކޮށްލާފައި ރިލޭ އަށް ދިން ބޯޅަ ފޮނުވާލުމުން ޓީސީގެ ކެޕްޓަން މުހައްމަދު އަޖުފާން ވަނީ ބްލޮކްކޮށްފަ އެވެ.
ލީގުގައި މިރޭ ކުޅޭނީ ސަސް އާއި ގްރީން ސްޓްރީޓްސް އެވެ. ފަށާނީ 9 ޖަހާއިރު އެވެ.
