ރިޔާދް، ސައުދީ އަރަބިއްޔާ (މާޗް 3) - ސައުދީ އަރަބިއްޔާގެ "އެކުވެރިޔަކަށް ވުމުގެ ފުރުސަތު" އިޒްރޭލަށް އެބަ އޮތް ކަމަށް ވަލީ އަހުދު އަމީރު މުހައްމަދު ބިން ސަލްމާން ވިދާޅުވެއްޖެ އެވެ.
"އަޅުގަނޑުމެންގެ އުއްމީދަކީ އިޒްރޭލާއި ފަލަސްތީނާ ދެމެދު އޮތް ހަމަނުޖެހުން ނިމުމަކަށް އައުން،" އެމެރިކާގެ މަޖައްލާ ދަ އެޓްލާންޓިކްއަށް ވަލީ އަހުދު ވިދާޅުވި ކަމަށް ސައުދީ ޕްރެސް އެޖެންސީން ބުންޏެވެ.
"އިޒްރޭލަކީ ދުޝްމަނެއްގެ ގޮތުގައި އަޅުގަނޑުމެން ނުދެކެން. އަޅުގަނޑުމެން ދެކެނީ އެއީ އެކުވެރިއަކަށް ވުމުގެ ފުރުސަތު އޮތް ގައުމެއް ކަމަށް... އެކަމަކު އެ ހިސާބަށް ދިޔުމުގެ ކުރިން ބައެއް މައްސަލަތައް ހައްލު ކުރަން ޖެހޭނެ."
ސައުދީ އަރަބިއްޔާ އާއި އިޒްރޭލާ ދެމެދު ޑިޕްލޮމެޓިކް ގުޅުމެއް ނޯވެ އެވެ. ނަމަވެސް ގަލްފު ސަރަހައްދުގައި ސައުދީ އަރަބިއްޔާއާ އެންމެ އެކުވެރި ބަހްރެއިން އަދި ޔޫއޭއީން ވަނީ 2020 ވަނަ އަހަރު އިޒްރޭލާ އެކު ޑިޕްލޮމެޓިކް ގުޅުން ގާއިމްކޮށްފަ އެވެ.
އޭގެ ކުރިން އިޒްރޭލާ އެކު ގުޅުން ގާއިމްކުރި އަރަބި ގައުމުތަކަކީ އުރުދުން އަދި މިސްރެވެ. އަރަބި ގައުމުތަކުން އިޒްރޭލާ އެކު ގުޅުން ގާއިމް ކުރުމާ ފަލަސްތީން ރައްޔިތުން ހިތްހަމަނުޖެހު އެކަން ސިފަކުރީ "ބުރަކައްޓަށް ވަޅިއެއް ޖެހުމުގެ" ގޮތުގަ އެވެ.
ސައުދީ އަރަބިއްޔާއިން އަބަދުވެސް ބުނަމުން ދަނީ އަރަބި ލީގުގެ ވިސްނުމަކީ ފަލަސްތީނާ އެކު އޮތް ހަމަނުޖެހުން ހައްލު ނުވަނީސް އިޒްރޭލާ ގުޅުން ގާއިމް ނުކުރުން ކަމަށާއި އެ ގައުމުން އަމަލު ކުރާނީ އެ ވިސްނުމާ އެއް ގޮތަށް ކަމަށެވެ.
ނަމަވެސް ސައުދީގެ ރަސްގެފާން ސަލްމާނާއި ވަލީ އަހުދު މުހައްމަދުގެ ވިސްނުން ކޮންމެވެސް ވަރަކަށް ތަފާތުކަން ފާހަގަކުރެވެ އެވެ. އެގޮތުން ވަލީ އަހުދު ވަނީ އިޒްރޭލުގެ ކޮމާޝަލް ވައިގެ އުޅަނދުތައް ސައުދީގެ ސަރަހައްދުން ދަތުރު ކުރުމުގެ ހުއްދަ ދެއްވާފަ އެވެ.
އޭގެ އިތުރުން ނޮވެމްބަރު 2020 ވަނަ އަހަރު އިޒްރޭލުގެ ކުރީގެ ބޮޑު ވަޒީރު ބެންޖަމިން ނަތަންޔާހޫ ސައުދީ އަރަބިއްޔާއަށް ސިއްރު ދަތުރެއް ކުރެއްވި ކަމަށް ވެސް ރިޕޯޓުތައް ފެތުރުނެވެ. ނަމަވެސް ނަތަންޔާހޫ އާއީ ވަލީ އަހުދާ ދެމެދު ބައްދަލުވުމެއް ނުބާއްވާ ކަމަށް ސައުދީ އަރަބިއްޔާއިން ބުނެ އެވެ.
