ރާއްޖެއަށް ތައާރަފުކުރަން މަސައްކަތް ކުރަމުން އަންނަ ފްލޯޓިން އައިލެންޑްސްތަކުގެ ކުލި ހިސާބުކުރާ ބިމުގެ ސަރަހައްދުގެ ގޮތުގައި ބަލާނީ، އެ ވިލާއެއްގެ ފެނުން މައްޗަށް އިމާރާތްކޮށްފައި ހުންނަ ބައި ކަމަށް ޓޫރިޒަމް މިނިސްޓްރީން ކަނޑައަޅައިފި އެވެ.
ފްލޯޓިން އައިލެންޑްސްތަކާއި ޕްލެޓްފޯމުތަކުން ކުލި ހިސާބުކުރާނެ ގޮތް ހިމަނާ މިނިސްޓްރީން ގެޒެޓުކޮށްފައިވާ ޓޫރިޒަމަށް ދޫކުރާ ތަންތަނުން ކުލި ދެއްކުމުގެ އާ ގަވާއިދު ބުނާ ގޮތުން، އިމާރާތްކޮށްގެން ބޭނުންކުރާ ސަރަހައްދު ކަމުގައި ބަލަނީ ފްލޯޓިން އައިލެންޑް ނޫނީ ޕްލެޓްފޯމުތައް ކަނޑުގެ ލޮނުގަނޑުގައި ބީހޭ ހިސާބެވެ.
އެއީ ބިން ހިއްކައިގެން ހަދާ ފަޅުތަކުން ކުލި ނަގާ ގޮތާ ދާދި އެއްގޮތެކެވެ. ބިން ހިއްކައިގެން ހަދާ ފަޅުތަކުން ކުލި ނަގަނީ ހިއްކާފައި އޮންނަ ސަރަހައްދުގެ މީން ޓައިޑްލައިން (ދިޔަވަރު ބޮޑުވާ ގަޑި އާއި ދިޔަވަރު ހިކޭ ގަޑީގައި ލޮނުގަނޑު އޮންނަ ހިސާބުގެ އެވަރެޖު) ގެ މައްޗަށް ބިނާކޮށް ބިމުގެ ސަރަހައްދު (ލޭންޑް އޭރިއާ) ކަނޑައަޅައިގެންނެވެ.
titledesc
މީގެ ކުރިން ގަވާއިދުތަކުގައި މިފަދަ ތަންތަނުން ކުލި ނެގޭނެ ގޮތެއް ނޯވެ އެވެ. ކުލި ނެގޭނެ ގޮތެއް ނެތް ނަމަވެސް ފްލޯޓިން ކޮންސެޕްޓަށް ރަށްތައް ތަރައްގީކުރަން ފަޅުތައް ހަވާލުކޮށްފަ ހުންނަތާ އަހަރުތަކެއް ވެއްޖެ އެވެ.
ފުރަތަމަ މިފަދަ ޕްރޮޖެކްޓެއްގެ ވާހަކަތައް ދެކެވުނީ ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު އެވެ. އޭރު ފްލޯޓިން ރަށްތަކަކާއި ގޯލްފްކޯހެއް ހަދަން ޑަޗް ޑޮކްލެންޑްސް ކުންފުންޏާ ހަވާލުކުރި ކަމަށް އޭރުގެ ހަބަރުތަކުން ފެންނަން އެބަހުއްޓެވެ. ނަމަވެސް އެ ޕްރޮޖެކްޓު ވުޖޫދަކަށް ނާދެ އެވެ.
އޭގެ ފަހުން އަނެއްކާވެސް ހަމަ އެ ކުންފުންޏާއެކީ ޖޮއިންޓް ވެންޗާއެއް ހަދައިގެން ފްލޯޓިން ރަށްތަކެއް ހަދަން މި ސަރުކާރުން ސޮއިކުރީ މިދިޔަ އަހަރުގެ މާޗުގަ އެވެ.
"ފްލޯޓިން ސިޓީ މޯލްޑިވްސް" ގެ ނަން ދެވިފައިވާ މި އެއް ބިލިއަން ޑޮލަރުގެ ޕްރޮޖެކްޓުގެ ފުރަތަމަ ފިޔަވަހީގެ ތެރޭގައި ރިސޯޓާއި ޑޮކްޔާޑާއި ލަގްޒަރީ ވިލާތަކުގެ އިތުރުން ދިވެހިންނަށް ވިއްކާލަން އަޅާ ގެތައް ހިމެނެ އެވެ.
ޓޫރިޒަމް މިނިސްޓްރީގެ ވެބްސައިޓުގައި ހުރި މައުލޫމާތަކުން އެނގޭ ގޮތުގައި މާލެ އަތޮޅުން ހަތަރު ފަޅެއް ޑަޗް ޑޮކްލޭންޑްސް ކުންފުންޏާ ހަވާލުކޮށްފައި އެބަހުއްޓެވެ. އެއީ ބަނޑޮހާ ބަރޮހާ ދޭތެރޭގައި އޮންނަ ފަޅަކާއި ހުވަފެންފުށީ ހުޅަނގުން އޮންނަ ފަޅަކާއި އާރަށުގެ އުތުރުން އޮންނަ ދެ ފަޅެކެވެ.
ފުރަތަމަ ތަރައްގީކުރަނީ އާރަށާ އެންމެ ކައިރިން އޮންނަ 200 ހެކްޓަރުގެ ފަޅެވެ. އެ ފަޅުގައި ތަރައްގީކުރާ 5000 ހައުސިން ޔުނިޓުގެ މަސައްކަތް ނިމުނު ފެބްރުއަރީ މަހުގެ 10 ގައި ވަނީ ބައިސަން މޯލްޑިވްސްއާ ހަވާލުކޮށްފަ އެވެ.
ބައިސަން މޯލްޑިވްސްއާ ހަވާލުކޮށްގެން އަޅާ ގެތަކުގެ ކޮންސެޕްޓް: މީގެ ފުރަތަމަ ގެތައް އަންނަ ރޯދަ މަހަށް ނިންމާލެވޭނެ ކަމަށް އެ ކުންފުނިން ބުނި. -- ފޮޓޯ: ބައިސަން މޯލްޑިވްސް
ބައިސަން ކުންފުނިން ބުނި ގޮތުގައި ފްލޯޓިން ސިޓީގެ ފުރަތަމަ ގެ އަންނަ ރޯދައަށް ނިންމާލެވޭނެ އެވެ. އަދި ފުރަތަމަ ހަދާ ގެތައް ނިމުމުން އެތަން ބަލާލަންދާން އާންމުކޮށް ހުޅުވާލާނެ އެވެ.
