ބިންބޮޑު މީހުން މަދު ގއ. ކޮނޑޭގަ ހަތަރު ހެކްޓަރު ހުންނަ ވަރުގެ ޓޫރިޒަމް ޒޯނެއް ތަރައްގީ ކުރުމަށް ބޭނުންވާ ބިން ތަކުގެ ބީލަން ކުރިއަށް ގެންދިއުމަށް، ޓޫރިޒަމް މިނިސްޓްރީ އާއެކު އެއްބަސްވުމެއްގައި މިއަދު ސޮއިކޮށްފި އެވެ.
ކޮނޑޭގަ ޓޫރިޒަމް ތަރައްގީ ކުރުމަށް ކަނޑައަޅާފައިވާ ބިންތައް ބީލަމަށް ހުޅުވާލުމާއި، އެކަމާ ބެހޭ ގޮތުން ކޮނޑޭ ކައުންސިލް އަށް ބޭނުންވާ ފަންނީ ލަފާ ދިނުމުގެ އެއްބަސްވުމުގައި ކޮނޑޭ ކައުންސިލްގެ ފަރާތުން ސޮއިކުރެއްވީ ކައުންސިލުގެ ރައީސް އަހުމަދު އަބްދުލް ހަކީމް އެވެ. ޓޫރިޒަމް މިނިސްޓްރީގެ ފަރާތުން ސޮއި ކުރެއްވީ ޕާމަނަންޓް ސެކްރެޓަރީ ފާތިމަތް ނިލްފާ އެވެ.
ލާމަރުކަރީ ގާނޫނު ދަށުން ޓޫރިޒަމް ބޭނުމަށް ބިން ދޫކުރުމުގެ އިހްތިޔާރު ކައުންސިލްތަކަށް ލިބިގެން ވެއެވެ. ކޮނޑޭ ކައުންސިލުން ބުނި ގޮތުގައި ޓޫރިޒަމް މިނިސްޓްރީ އާއެކު އެއްބަސްވުން ހެދީ މިނިސްޓްރީ މެދުވެރިކޮށް އެކަން ކުރިއަށް ގެންދިއުމުގެ ފައިދާ ހުރިހާ ގޮތަކުން ބަލާއިރު ވެސް ބޮޑުވުމާއި މިނިސްޓްރީގެ ވަރަށް ބޮޑު އެހީތެރިކަމެއް އެކަމުގައި މިހާތަނަށް ވެސް ލިބިފައިވާތީ އެވެ.
ޓޫރިޒަމް މިނިސްޓްރީން ބުނި ގޮތުގައި ކައުންސިލުން ކަނޑައަޅާ ބިންތައް ބީލަމަށް ހުޅުވާލުމުގެ އިދާރީ ކަންކަން ކުރިއަށް ގެންދާނީ މިނިސްޓްރީންނެވެ. ބިން ކުއްޔަށް ހިފާ ފަރާތްތަކާއެކު އެއްބަސްވުމުގައި ސޮއިކުރާނީ ކައުންސިލުންނެވެ.
ކޮނޑޭގެ ލޭންޑް ޔޫސް ޕްލޭން: ޓޫރިޒަމަށް ހާއްސަ ކުރަނީ ފިޔާތޮށި ކުލާގައި ފާހަގަ ކޮށްފައިވާ ސަރަހައްދު
"ބިންތައް ދޫކުރަން އިއުލާނު ކުރާނީ ލޭންޑް ޔޫސް ޕްލޭން ރިވިއުކޮށް ނިމުނީމަ، ލޭންޑް ޔޫސް ޕްލޭނުގައި ރަށުގެ ދެކުނު ކޮޅުން ބީޗު ކައިރިން ހަތަރު ހެކްޓަރުގެ ބިން ކަނޑައަޅާފައި ވަނީ ގެސްޓު ހައުސް އާއި ސިޓީ ހޮޓާ ތަރައްގީ ކުރުމަށް،" ފަސްސަތޭކަ ވަރަކަށް މީހުން ދިރިއުޅޭ ރަށުގެ، ކައުންސިލު ރައީސް އަހުމަދު ވިދާޅުވި އެވެ.
ކޮނޑޭގެ ބޮޑު މިނުގައި 118 ހެކްޓަރު ހުންނައިރު މީހުން ދިރިއުޅެނީ ރަށުގެ މެދުގައި ވަރަށް ކުޑަ ތަންކޮޅެއްގަ އެވެ. އަހުމަދު ވިދާޅުވި ގޮތުގައި ޓޫރިޒަމަށް ހާއްސަ ކުރި ސަރަހައްދުން، ރެސްޓޯރަންޓާއި ވޯޓާ ސްޕޯޓްސް ފަދަ ކަންކަމަށް ވެސް ބިން ދޫކުރާނެ އެވެ.
"ރަށުން ބޭރު މީހުންނާއި ރަށު މީހުންނަށް ބިން ވިއްކަން ވެސް ވަނީ ނިންމާފައި، ވިއްކަނީ ތިން ހާހާއި ހަ ހާހާ އަކަފޫޓު ބޮޑު މިނުގެ ބިން، ރަށުގެ ބީޗު ސަރަހައްދުން ވެސް އެއް ގަމުން ވެސް ބިން ވިއްކާނެ،" އޭނާ ވިދާޅުވި އެވެ.
ބީޗަށް ކުރިމަތިވާ ގޮތަށް އޮންނަ ބިމެއް ވިއްކަން ކަނޑައަޅާފައި ވަނީ އަކަފޫޓެއް 150ރ. ގެ ރޭޓުން ނެވެ. މޫދާ ކައިރި ސަރަހައްދު ތަކުން ބިމެެއް 100ރ. އަަށް ވިއްކަން ނިންމާފައިވާއިރު، އެއްގަމުން ވިއްކާ ބިމަކަށް އަކަފޫޓަކަށް ނަގަން ހަމަޖައްސާފައި ވަނީ 70ރ. އެވެ.
ޓޫރިޒަމް މިނިސްޓްރީން ބުނި ގޮތުގައި ޓޫރިޒަމަށް ތަރައްގީ ކުރަން ބޭނުންވާ ކޮންމެ ރަށަކަށް ވެސް އެކަމުގައި ބޭނުންވާ ފަންނީ ލަފާ އާއި އެހެނިހެން އެހީތެރިކަން މިނިސްޓްރީން ފޯރުކޮށްދޭނެ އެވެ.
