އދ.، އެމެރިކާ (މާޗް 2) - އދ. އަށް ކަނޑައަޅާފައި ހުންނަ ރަޝިއާ މިޝަންގެ މެމްބަރުން ޖާސޫސް ކުރާ ކަމަށް އެމެރިކާއިން ތުހުމަތު ކުރިތާ އެއް ދުވަސް ފަހުން، އދ. ގެ މުވައްޒަފެއްގެ ގޮތުގައި އުޅޭ ރަޝިއާ މީހަކަށް ވެސް ޖާސޫސް ކުރުމުގެ ތުހުމަތުކޮށް، މަގާމުން ވަކިކޮށްދޭން ރަސްމީކޮށް އެދެފި އެވެ.
އެމެރިކާގެ މިޝަނުން އަންގާރަ ދުވަހު އޭއެފްޕީއަށް ބުނީ "ރަޝިއާގެ ޖާސޫސީ އެޖެންޓެއްގެ" ގޮތަށް މަސައްކަތް ކުރާ މީހަކު ވަކިކުރަން އދ. ގައި އެދިފައިވާ ކަމަށެވެ.
އެމެރިކާގެ ތަރުޖަމާނަކު ބުނީ އދ. ގެ މުވައްޒަފެއްގެ ގޮތުގައި އެމެރިކާގައި އުޅެން ލިބޭ ހުއްދައިގެ ނާޖައިޒު ބޭނުންކޮށް، ޖާސޫސް ކުރަމުން ދިޔަ މީހަކު ފޮނުވާލަން އެދިފައި ވާނެ ކަމަށެވެ.
އެ ފިޔަވަޅަކީ ރަޝިއާގެ ރައީސް ލެޑިމިއަ ޕުޓިން އެ ގައުމުގެ ސިފައިން ޔޫކްރެއިނަށް ފޮނުވުމާ ގުޅުން ހުރި ކަމެއްތޯ ސުވާލު ކުރުމުން، ތަރުޖަމާނު ބުނީ އެއީ މީގެ އެތައް މަހެއް ކުރިން ފާހަގަވެ، ބަލަމުން ދިޔަ ކަމެއް ކަމަށެވެ.
އދ. ގެ ތަރުޖަމާނު ސްޓެފަނީ ޑުޖަރިކް ވިދާޅުވީ އދ. ގެ މުވައްޒަފަކު ވަކިކުރަން އެމެރިކާއިން އެދިފައިވާ ކަމަށާއި އެއީ އދ. ގެ ސެކްރެޓޭރިއެޓްގެ މުވައްޒަފެއް ކަމަށެވެ. ނަމަވެސް އެއީ ސެކެޓްރީ ޖެނެރަލް އެންޓޯނިއޯ ގުޓެރޭޒްގެ އޮފީހުގެ މުވައްޒަފެއްކަން ސާފެއް ނުކޮށްދެ އެވެ.
އދ. ގެ މުވައްޒަފަކު ވަކިކުރަން އެދުމުގެ ކުރިން، މިދިޔަ ހޯމަ ދުވަހު އެމެރިކާއިން ވަނީ އދ. އަށް ކަނޑައަޅާފައި ހުންނަ ރަޝިއާ މިޝަންގެ 12 ޑިޕްލޮމެޓުންނަށް "ޖާސޫސް ކުރުމުގެ" ތުހުމަތުކޮށް، އެ މީހުން އެމެރިކާއިން ދިޔުމަށް އަންގާފަ އެވެ.
އެގޮތުން މާޗް ހަތް ވަނަ ދުވަހުގެ ކުރިން އެމެރިކާގެ ފަސްގަނޑު ދޫކޮށް ދާން ޑިޕްލޮމެޓުންނަށް އެންގުމުން، ރަޝިއާއިން ވަނީ ނުރުހުން ފާޅުކޮށްފަ އެވެ. އދ. ގެ މައި އިދާރާ ހުންނަނީ ނިޔު ޔޯކްގަ އެވެ.
ނިއު ޔޯކްގައި ހުންނަ އދ. ގެ މައި އިމާރާތުގެ ބޭރުގައި ގައުމުތަކުގެ ދިދަ ނަގާފައި.
"މިއީ އަޅުގަނޑުމެންގެ ގައުމާ ދެކޮޅަށް އަދާވާތްތެރިވުމުގެ އަމަލެއް،" ރަޝިއާއިން އެމެރިކާއަށް ކަނޑައަޅާފައި ހުންނަ ސަފީރު އެނެޓޮލީ އެންޓޮނޯވް ފޭސްބުކްގައި ވިދާޅުވި އެވެ.
ވަކިކުރި ޑިޕްލޮމެޓުންގެ ތެރޭގައި ރަޝިއާ މިޝަންގެ ވެރިޔާ ޑިމިޓްރީ ޕޮލްޔަންސްކީ، އދ. އަށް ކަނޑައަޅާފައި ހުންނަ ރަޝިއާގެ ސަފީރު ވަސިލީ ނެބެންޒިއާ އަދި އެފްރިކާގެ ކަންކަމަށް ހާއްސަ ޑެޕިއުޓީ ސަފީރު އަނާ އެވެސްޓިގްނީވާ ނުހިމެނެ އެވެ.
ރަޝިއާގެ ޑިޕްލޮމެޓުން ބުނީ އެމެރިކާގެ އެ ފިޔަވަޅަކީ އދ. ގެ ހޯސްޓު ގައުމުގެ ގޮތުގައި ގެންގުޅެން ޖެހޭ އުސޫލާ ހިލާފު ކަމެއް ކަމަށެވެ. ނަމަވެސް އެމެރިކާއިން ބުނީ އެއީ އެއްވެސް އުސޫލަކާ ހިލާފު ނިންމުނެއް ނޫން ކަމަށެވެ.
ރަޝިއާގެ އދ. މިޝަންގެ މެމްބަރުންގެ ގޮތުގައި 100 ވަރަކަށް މީހުން އެމެރިކާގައި އުޅެ އެވެ.
