ވޮޝިންޓަން، އެމެރިކާ (މާޗް 2) - ރަޝިއާ އާއި ޔޫކްރެއިނުން މިހާރު ކުރަމުންދާ ހަނގުރާމައަކީ ޑިމޮކްރަސީ އާއި ހުދުމުހުތާރު ވެރިކަމާ ދެމެދު ކުރެވޭ ހަނގުރާމައެއް ކަމަށް އެމެރިކާގެ ރައީސް ޖޯ ބައިޑެންގެ ރިޔާސީ ބަޔާނުގައި ވިދާޅުވެއްޖެ އެވެ.
"ސްޓޭޓް އޮފް ދަ ޔޫނިއަން" ނުވަތަ އެމެރިކާގެ ހާލަތު ބަޔާންކޮށްދެއްވައި ކޮންމެ އަހަރަކު ވެސް ޕާލިމެންޓުގައި ރައީސް ދެއްވަން ޖެހޭ ބަޔާން ބުރާސްފަތި ދުވަހު އިއްވުމުން، ގިނަ މެމްބަރުންތަކެއްގެ ތަރުހީބު ބައިޑެންއަށް ލިބިވަޑައިގެންނެވި އެވެ.
އެއް ގަޑިއިރުގެ ބަޔާނުގެ ފުރަތަމަ ބައި އެއްކޮށް ހާއްސަ ކުރެއްވީ ރަޝިއާ އާއި ޔޫކްރެއިންގެ ހަނގުރާމައަށެވެ. ބައިޑެން ވިދާޅުވީ ރަޝިއާގެ ރައީސް ލެޑިމިއަ ޕުޓިންއަކީ "ހުދުމުހުތާރު ވެރިއެއް" ކަމަށާއި ޔޫކްރެއިނަށް އެމެރިކާއިން އެހީވަމުން ދާނެ ކަމަށެވެ.
ރަޝިއާގެ މަހުޖަނުން "ނާޖައިޒު ގޮތް ގޮތުން ހޯދާފައިވާ" ޔޮޓުތައް އެމެރިކާއިން ހިފަހައްޓާނެ ކަމަށް ބައިޑެން ވިދާޅުވުމާ އެކު ރިޕަބްލިކަން ޕާޓީ އާއި ޑިމޮކްރެޓިކް ޕާޓީގެ މެމްބަރުން ވެސް ތެދުވެ ތަރުހީބު ދެއްވި އެވެ. އެ މަންޒަރު އެމެރިކާގެ ޕާލިމެންޓުން ފެނިފައި ވަނީ މީގެ ކުރިން ވަރަށް މަދު ފަހަރަކު އެވެ.
"ޑިމޮކްރަސީ އާއި ހުދުމުހުތާރު ވެރިކަމުގެ ހަނގުރާމައިގައި، ޑިމޮކްރަސީތައް ދަނީ ދިފާއުގައި ތެދުވަމުން،" ބައިޑެން ވިދާޅުވި އެވެ.
ކެނެޑާ އާއި އީޔޫއިން އެޅި ފިޔަވަޅާ އެއް ގޮތަށް ރަޝިއާގެ ވައިގެ އުޅަނދުތައް އެމެރިކާގެ ސަރަހައްދަށް އެތެރެވުން މަނާކުރިކަން ބަޔާނުގައި އިއުލާނު ކުރެއްވި އެވެ.
ބައިޑެންގެ އަނބިކަނބަލުން ޖިލްގެ ދައުވަތަކަށް ޕާލިމެންޓް ޖަލްސާގައި ބައިވެރިވެވަޑައިގެންނެވި ޔޫކްރެއިންގެ ސަފީރު އޮކްސާނާ މަރްކަރޯވާއަށް މެމްބަރުން ތެދުވެ، މަރުބަހާ ދެންނެވި އެވެ.
ޔޫކްރެއިންގެ ސަފީރު އޮކްސާނާ މަރްކަރޯވާ.
ރިޔާސީ ބަޔާން ދެއްވި އިރު، އެމެރިކާގެ ރައްޔިތުންގެ މެދުގައި ބައިޑެންގެ މަގްބޫލްކަން ވަނީ ވަރަށް ބޮޑަށް ކުޑަވެފަ އެވެ. ހިޔާލު ހޯދުމުގެ ވޯޓުތަކުން ދައްކާ ގޮތުގައި އެމަނިކުފާނުގެ މަސައްކަތާ މެދު ހިތްހަމަޖެހެނީ 40.6 ޕަސެންޓު މީހުންނެވެ.
ގައުމުގެ ހާލަތު ބަޔާން ކުރައްވަމުން ބައިޑެން ވިދާޅުވީ "މިހާރަށް ވުރެ ފުރިހަމަ އެމެރިކާއެއް ބިނާކުރަން" ރާވާފައިވާ ކަމަށެވެ.
އެމެރިކާގެ ވަޒީފާގެ ބާޒާރުގެ ހާލަތު ރަނގަޅުވި ނަމަވެސް، އިންފްލޭޝަން ވަނީ 40 އަހަރުގެ ތެރޭގައި މަތި ނުވާ މިންވަރަށް މަތިވެފަ އެވެ.
ބައިޑެން ވިދާޅުވީ ތަކެތީގެ އަގު ތިރިކުރެވޭނީ ކާރާއި ސެމީކޮންޑަކްޓަރު ފަދަ ތަކެތި އިމްޕޯޓް ނުކޮށް އެމެރިކާގައި އުފައްދައިގެން ކަމަށެވެ. އޭގެ އިތުރުން މަގުތަކާއި ބްރިޖުތައް މަރާމާރު ކުރާނެ ކަމަށް ވިދާޅުވި އެވެ.
