ރައްޔިތުންގެ ގެއަށް ކުއްލި މައްސަލަ ހުށަހެޅުމަކީ އެ ގޭގެ ކޮންމެ މެންބަރަކަށްމެ އޮންނާނޭ ފުރުސަތެކެވެ. އެ ފުރުސަތު ލިބިދީފައި އޮތީ އެ ގޭގެ ގަވާއިދުގެ 170 ވަނަ މާއްދާގެ ދަށުންނެވެ. އެ މާއްދާގައި އޮންނަނީ "ރައްޔިތުންގެ ނުވަތަ ގައުމުގެ މަސްލަތު ހިމެނިގެންވާ މުހިންމު ކަމެއް ކުއްލި މައްސަލައެއްގެ ގޮތުގައި ޖަލްސާއަކަށް ހުށަހެޅުމުގެ ފުރުސަތު ކޮންމެ މެންބަރަކަށް ވެސް ލިބިގެންވެއެވެ." މިހެންނެވެ.
ކުއްލި މައްސަލައެއް ކަމުގައި ބަލާނީ ކޮން މައްސަލަތަކެއްކަން އެ މާއްދާގެ (ށ) ގައި ބުނެފައި އޮވެ އެވެ. އެ މާއްދާގައި އޮންނަނީ؛
މި މާއްދާގެ ދަށުން ހުށަހެޅޭ ކުއްލި މައްސަލައަކީ ރައްޔިތުންގެ ނުވަތަ ގައުމުގެ މަސްލަހަތަށް ސީދާ އަސަރުކުރާފަދަ ބޮޑު ކަމެއް ކުއްލިއަކަށް ދިމާވުމުން އެކަމެއް ސަރުކާރުގެ ސަމާލުކަމަށް ގެނައުމަށާއި، ސަރުކާރުން އެކަމާމެދު އަޅާފައިވާ އަޅާފައިނުވާ ފިޔަވަޅަކަށް ފާޑުކިއުމުގެ ގޮތުން، އަދި މައްސަލަ ހުށަހެޅުމަށް މި ގަވާއިދުގައި އޮންނަ އުސޫލުން ހުށަހަޅައިފިނަމަ އެކަމުގެ މުއާލާތް ކެނޑިދާނޭތީ ނުވަތަ ވަގުތު ފާއިތުވެދާނެތީ ހުށަހަޅާ މައްސަލައެވެ.
އެހެންވީމާ، ކުއްލި މައްސަލައެއް ކަމުގައި ބެލެވޭނީ މި މާއްދާގައި ބަޔާންކުރާ ދެ މިންގަނޑު ގިރާކުރާ މައްސަލަތަކެވެ. އެއީ އެ މައްސަލައަކީ ރައްޔިތުންގެ ނުވަތަ ގައުމުގެ މަސްލަހަތަށް ސީދާ އަސަރުކުރާފަދަ ބޮޑުކަމަކަށްވުމާއި އާންމު އުސޫލުން މައްސަލަ ހުށަހަޅައިފި ނަމަ އެ ކަމެއްގެ މުއާލާތް ކެނޑުމުގެ އިހުތިމާލު އޮތުމެވެ.
'ރައްޔިތުން' އަދި 'ގައުމު' އަކީ އެމްޑީޕީ އޭ ކިޔާ ސިޔާސީ ޕާޓީއެއް ނޫނެވެ. އެ ޕާޓީގެ ބައެއް މެންބަރުންގެ ހިތްތަކުގައި އުފެދޭ ނުތަނަވަސް ކަމަކީ ގައުމަށް ނުވަތަ ރައްޔިތުންނަށް ސީދާ އަސަރުކުރާފަދަ ބޮޑު އަދި ކުއްލި ކަމެއް ކަމުގައި ބަލާނޭ ނުވަތަ ބެލެވޭނޭ ގާނޫނީ އަދި ބުއްދީގެ ހަމައެއްވެސް ނެތެވެ.
ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގެ އިބާރާތް މިހާ ސާފުކޮށް އޮތްއިރު، ރައްޔިތުންގެ މަޖިލީހުގެ ތަޅުމުން އެމްޑީޕީގެ މެންބަރުންގެ ފަރާތުން އިއްޔެ އެ ފެނުނީ ހުތުރު އަމަލެކެވެ. ކުއްލި މައްސަލައެއް ކަމުގައި ބަލާނޭ އޮޅިގަނޑު ގިރާނުކުރާ އެ މައްސަލަ ހުށަހެޅުމުގެ ހުތުރުކަން އޮތްތަނުގައި އޮއްވައި، އެ މައްސަލަ މަޖިލީހަށް ބަލައިގަނެ، އެއްގަޑިއިރު ވަންދެން ހުއްޓާނުލައި އެ މައްސަލައަށް ބަހުސް ވެސް ކުރީ އެވެ.
މައްސަލަ ހުށަހެޅީ އެމްޑީޕީއަށް ނިސްބަތްވާ މެންބަރެކެވެ. މައްސަލަ ބަލައިގަތުމަށް ވޯޓުދިނީ އެމްޑީޕީއަށް ނިސްބަތްވާ މެންބަރުންނެވެ. ބަހުސް ކުރެއްވީ ވެސް އެމްޑީޕީގެ މެންބަރުންނެވެ. ވާހަކަ ދެއްކީ އެމްޑީޕީގެ މެންބަރުންގެ ވަޒީފާއާ ގުޅޭ ގޮތުންނެވެ. އެމްޑީޕީއަށް ކުރިއަށް އޮތް ރިޔާސީ ދައުރު ނެގޭނޭ ގޮތަކާ ގުޅޭގޮތުންނެވެ. އެމްޑީޕީގެ އިދާރީ އިސް ގޮނޑިއަށް ރަނގަޅީ ކޮން ކެންޑިޑޭޓެއްތޯ އާއި އެމްޑީޕީއަށް އެންމެ އިހުލާސްތެރީ ކޮން މެންބަރުންނެއްތޯ ކަނޑައެޅުމުގެ ބަހުސެކެވެ.
މިއީ ގައުމަށް ނުވަތަ ރައްޔިތުންނަށް ދިމާވެފައި އޮތް ކުއްލި މައްސަލައެއްކަމުގައި ބަލަންވެއްޖެ ނަމަ އެހެން ޕާޓީތަކުގެ މެދުގައި ވެސް މިފަދަ މައްސަލަތައް މަދެއް ނޫނެވެ. ޖުމްހޫރީ ޕާޓީ ހިންގުމުގެ އިސް ސަފުގައި ތިބި ބަޔަކު އެ ޕާޓީން ނުކުމެ އަމިއްލަ ޕާޓީއެއް ހަދައިފި އެވެ. އެއީ އެ ޕާޓީއަށް މެދުވެރިވި ކުއްލި، ބޮޑު މައްސަލައެކެވެ. އެ ޕާޓީގެ ލީޑަރު އެކަމުގެ ކަންބޮޑުވުމުގައި ބަހެއް ވިދާޅުނުވެވިފައި ހުންނެވި އެވެ. މަޖިލީހާ ހަމައަށް އެ ކަންބޮޑުވުމެއް ނާދެ އެވެ.
ޕީޕީއެމްގެ އެތެރޭގެ ހާލަތު ރަނގަޅެއް ނޫނެވެ. ކުރީގެ ރައީސް ޔާމީން މިނިވަންވެ، އެޕާޓީގެ ހިންގުމާމެދު ބަސްވިދާޅުވާން ފެއްޓެވުމަކީ އެ ޕާޓީގެ އިސްސަފުގައި ހިމެނޭ ކިތަންމެ މެންބަރުންނެއްގެ މެދުގައި އޮތް ކަންބޮޑުވުމެކެވެ. މެންބަރުން ގިނަ އެ ޕާޓީގައި ރައްޔިތުންގެ މަޖިލީހުގެ މެންބަރުން ވެސް އެބަތިއްބެވެ. އުފެދިފައި އޮތް ހިލާފުގެ ކަންބޮޑުވުން މަޖިލީހުގެ ތަޅުމަކަށް ނާދެ އެވެ.
އިއްޔެގެ ޖަލްސާގައި އެމްޑީޕީގެ ހުރިހާ މެންބަރުން ދެއްކެވި ހުރިހާ ވާހަކައެއް ވެސް ރަނގަޅެވެ. މެންބަރުން ދޫފަރިތަ އެވެ. މޮޅުފުޅެވެ. އަޅުގަނޑަށް މައްސަލައަކަށްވީ އެންމެ ކަމެކެވެ. އެމްޑީޕީގެ އިހުލާސްތެރި މެންބަރުންގެ މި ހޫނު ބަހުސަށް ރައްޔިތުންގެ ފައިސާއިން ހަރަދުކުރުމެވެ. މަޖިލީހުގެ އެއް ދުވަހުގެ ކޮއްތު ހަރަދަކީ 13،000ރ. ކަމަށް މީގެ ކުރިން ޖަލްސާއެއްގައި ރައްޔިތުންގެ މަޖިލީހުގެ ރައީސް ވިދާޅުވި އެވެ. މަޖިލިސް ބާއްވާ ދުވަހަކަށް މެންބަރުންގެ މުސާރައިގެ ނިސްބަތް ހިމަނައިގެން ބެލީމާ އެއީ ލައްކަ ފައިސާ އެވެ. އެ ފައިސާ ހޭދަވެގެން އެ ދިޔައީ އެމްޑީޕީގެ މެންބަރުންގެ ހިތްނުތަނަވަސް ކަމަށް ހައްލެއް ހޯދުމަށާއި އުދާސް ބޭރުކުރުމަށެވެ.
ރައްޔިތުންގެ މަޖިލީހުގައި ތިބި އެމްޑީޕީއަށް ނިސްބަތްވާ މެންބަރުންނަކީ އެއް ދައުރަށްވުރެ ގިނަ ދައުރު އެ މަޖިލީހުގެ މެންބަރުކަން ކޮށްފައިތިބި ބައެކެވެ. އެ މަޖިލީހުގެ ގަވާއިދަށް އެ މެންބަރުން ނުހަނު ފަރިތަފުޅުވާނެ އެވެ. އެ މެންބަރުންގެ ތެރޭގައި ފުންނާބު އުސް ގާނޫނީ ވަކީލުން އެބަތިއްބެވެ. އެކަމަކު، އެ ހުރިހާ ބޭފުޅުން ތިއްބަވައިގެން ވެސް ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާ މާނަކޮށްފައިވާ ގޮތް ވަރަށް ބޮޑަށް ގޯހެވެ.
މިއީ ކުރީގެ ރައީސް ޔާމީންގެ ވެރިކަމުގެ ދައުރުގައި، ފޮނަދޫ ދާއިރާގެ އިއްޒަތްތެރި މެންބަރު، އަބްދުއްރަހީމް ކުރެއްވި ކަމެއް ނަމަ މިކަމުގައި މީހަކު ދައްކާކަށް ވާހަކައެއް ނޯންނާނެ އެވެ. އެއީ ހިނގާފާނެ ކަމެއްކަން އެންމެން ވެސް ގަބޫލުކުރާނެ އެވެ. އެއިރަކު އެ ނޫން ގޮތަކަށް އުއްމީދު ކުރާނެ މީހަކު ވެސް ނުހުންނާނެ އެވެ. އެހެންނަމަވެސް މިއީ އެމްޑީޕީ އެވެ. މަޖިލިސް 19 އެވެ. މަޖިލިސް 19 ތަފާތުވާނެ ކަމަށް އެމްޑީޕީގެ މެންބަރުންގެ އުއްމީދު އޮތެވެ. އެކަމަކު މިފަހަރު ތަފާތުވެފައި މިއޮތީ ހީކުރި ގޮތާ އެވެ.
އެމްޑީޕީގެ އޮފީހަކީ ޖާގަ ތަނަވަސް އޮފީހެކެވެ. ޕާޓީގެ 65 މެންބަރުންނަށް ރީތިކޮށް އިށީނދެލައިގެން ތިބެވޭނޭވަރުގެ ތަނަވަސް މީޓީން ރޫމެއް އެ އޮފީހުގައި ހުރެ އެވެ. ޕާޓީގެ މެންބަރުންގެ ނުތަނަވަސް ކަމަށް ހައްލު ހޯދުމަށްޓަކައި އެ އޮފީސް ބޭނުންކުރުމަކީ ޕާޓީއަށް ވެސް އަދި ގައުމަށް ވެސް ރަނގަޅުވާނޭ ގޮތެވެ. އުދާސް ބޭރުކުރުމާއި ޕާޓީގެ އެތެރޭގެ ހިތްހަމަނުޖެހުންތަކަށް ވާހަކަދައްކައި ހިތަށް ތަސައްލީ ހޯދުމުގެ ބައްދަލުވުންތައް ޕާޓީ އޮފީހުގައި ބޭއްވުން ރަނގަޅުވާނެ ނޫންތޯ އެވެ؟
